9
श्येत रे प्रोंइशो
1 शुश हिंबपुकी नोले छिङछिङम मगाक्नीम। ङोंइती परमप्रभु यावेमी जबूलून नु नाप्ताली आस रागी महिक्सीशो सेल्तु। तन्न नोले मेकोमी यर्दन आ आइक्ची हांबु, समुन्द्र आ नेक्था ङा नु रागी रागी ङा मुर आन गालील रागी रिम्शो सेल्ब। भजन संग्रह १०७:१०-१४; २राजा १५:२९; मत्ती ४:१२-१६
2 छिङछिङम गाक्बपुकीम ठेयब छेङछेङ ताइनीम। थम छिङछिङ ङा रागीम बाक्ब आन तार थम छेङछेङ दुम्ब।
3 परमप्रभु, गे रागी रागी ङा मुर आन कली सोशा बोशा दुम्पाइक्तीनी। मेको आन कली थाम्पान ग्येरपाइक्तीनी। मेको आन कली इन ङोंइती बाली नाली ओंइची ना खोदेंशो पा ग्येरपाइक्तीनी। लडाइ ग्राशा, आन रोइश्शो मार मार योक्सीची ना खोदेंशो पा ग्येरपाइक्तीनी।
4 मेको आन हेल्शो जुवा, मेको आन बला ङा भार नु मेको आन कली दिप्ब मुर आन कोक्के जिक्ताक्नी। गे मिदयान रागी ङा लडाइम खोदेंशो पा मेको आन कली युक्ब आन युक्तीके जिक्तीनी। भजन संग्रह ८१:७; न्यायाधीस ७:१४; न्यायाधीस १५:२२
5 मारदे हना लडाइ पाइब आन जुत्ता नु आन फेक्तीक वा नेल्ल हुश लुम्सीशो बाक्नीम। मेको मीम चोतीक दुम्नीम।
6 मारदे हना आंइ कली आल का थिशो बाक्ब। तौ का गेशो बाक्ब। मेको आंइ कली रिम्शो पा सासन पाइब दुम्ब। मेको आ नें मार बाक्ब देंशा हना, छक लाक्चा ङा गेय पाइब, जोक्तीक तुइक्तीक अर्ती गेब, सक्ति पाइश्शो परमप्रभु, गेना हना यो बाक्ब आफ नु थुं नाइश्शा बाक्चा गेब पिप बाक्ब। यसैया २२:२२; मीका ५:१; मीका ४:३
7 मेको आ अधिकार गेना हना यो बारब। दाऊद आ राज्य कली गेना हना यो थुं नाइक्तीके दुम्ब। मेको आ राज्य गेना हना यो ठीक निसाफ नु ठीक पतीकेमी बाक्ब। मेको मुर नेल्ल आन परमप्रभु यावेमी पाइब। २सामुएल ७:१२-१३; लूका १:३२; यसैया ११:१-५; भजन संग्रह ७२:३-४
परमप्रभु इस्राएल आ पर्बम गाइश्शो
8 परमप्रभुमी याकूब कली लोव़ का सोइश्शो बाक्त। मेको इस्राएल रागी कली दुम्त।
9 मिनु मेको एफ्राइम नु सामरीयाम बाक्ब नेल्लेम तुइक्ताक्म।
10 मेकोपुकीमी ठेयब लेश्शा “इंटाम सेल्शो खिं नेल्ल ब्रेत्तेक्म। तन्न गोपुकीम चेम्शो फुल्लुम लेंशा सेल्नीकी। आइक्च रवा नेल्ल तिम्तेक्म। तन्न मेकेर ठेयब दुम्ब रवा ख्रुम्नीकी” देंनीम।
11 मोपतीके परमप्रभु यावेमी मेको आन कली श्येत गेब पोक्ब। मिनु मेको आन जोरी सत्रु आन कली “गो लडाइ ग्रानीकी” दे मिम्पाइक्ब।
12 मिनु अराम ङा मुर नु रेसीन पूर्ब रे नु पलिस्ती ङा मुर पच्छिम रे जाक्शा, मेकोपुकीमी शुश पाक्शो शोव़मी खोदेंशो पा इस्राएली आन कली दाक्नीम। मोपा यो परमप्रभु आ गाइश्शो मनाइक्थु, आ गुइ दिंस ङा दिंस बाक्त।
13 मो हना यो मुर आन कली तुप्ब गे मलेम्म। मिनु मेकोपुकीमी मुर नेल्ल आन परमप्रभु यावे कली ममाल्नीम। यसैया १०:३३
14 मोपतीके परमप्रभु यावेमी इस्राएल रे पिया नु मीलु क्योरतु। खजूर रवा आ राशी नु बुदी मीलु घांस काबुमीन क्योरतु।
15 खाल्पा नु हुकुम पाइबपुकी पिया नम। जोल पा परमप्रभु यावे आ लोव़ पाइबपुकी चहिं मीलु नम।
16 मारदे हना इस्राएल ङा मुर आन कली शेंबपुकीमी हेंथे लां गाक्पाइक्तेक्म। मिनु आन शेंशो नेंबपुकी लां मतुइक्ब दुम्तेक्म।
17 मोपतीके परमप्रभु यावेम मेको आन वोंइश आल आन कली तशा, शिशी मपावो। मेको आन रोम रोइक्च नु वोंइश बेक्शो मीश मुर आन कली तशा यो शिशी मपावो। मारदे हना मेको नेल्ल परमप्रभु आ अरेशो मटीब दुम्शा, काइ मरिम्शो पाइब ला बाक्तेक्म। मिनु नेल्लेमी मरिम्शो लोव़ पाम्तेक्म। मोपा यो परमप्रभु आ गाइश्शो मनाइक्थु, आ गुइ दिंस ङा दिंस बाक्त।
18 परमप्रभु यावे आ अरेशो लोव़ मटीब मी खोदेंशो पा ब्राइब। मिनु मेकोमी चू नु चोंक नेल्ल नेक्ब। मिनु मेको ब्वाकीमी कोक्त बुद पा ब्राइब। आ कुन गोस्स खोदेंशो पा रोम्सीशा सरीङ गे लाइब।
19 मुर नेल्ल आन परमप्रभु यावे आ गाइश्शोमी रागी नेल्ल ग्रोइश्शो बाक्ब। मिनु मुरपुकी चोतीक शी खोदेंशो दुम्तेक्म। सुइम सुइ आन कली वारच मपामे।
20 मेकोपुकीमी ग्युरा गे ङा रोइक्ताक्म। तन्न शोव़लु बेक्तेक्म। आन पेरा गे ङा ब्वाम्तेक्म। तन्न मरूम। मिनु आंम आन खिं ङा मुर आन श्ये ब्वाम्तेक्म।
21 मनस्सेमी एफ्राइम कली ब्वाप्तु। मिनु एफ्राइममी मनस्से कली ब्वाप्तु। मिनु मेको निक्शी यहूदा नु लडाइ पाम्ताक्स। मोपा यो परमप्रभु आ गाइश्शो मनाइक्थु, आ गुइ दिंस ङा दिंस बाक्त।