51
सियोन आ थुं बारपाइश्शो
1 परमप्रभु यावे कली माल्ब नु ठीक पचा दाक्ब आन कली “आं लोव़ नेनीन। तेको सेरथे फुल्लु रे मुचा पुंइसीशो बाक्नी नु तेको खप रे दोशा ग्रुंइचा पुंइसीनी, मेको कली कोव़ङीन। यसैया ४८:१; ब्यवस्था ३३:२८
2 इन किकी पिपी अब्राहाम नु इन कली थीब सारा आस कली कोव़ङीन। मारदे हना गो मेको कली आ का बाक्मेनु, ब्रेत्ताक्ङ। मिनु मेको कली आसीक गेशा, आ चच युइ आन कली सोपाइश्शा बोपाइश्शा शुश सेल्ताक्मी” देंत। यसैया ४१:८; उत्पत्ती १२:१-२
3 परमप्रभु यावेमी सियोन आ थुं बारपाइक्ब। आ खतम सेल्शो बाक्तीके नेल्ल नक सेल्ब। आ मुर मबाक्तीके कली एदेन खोदेंशो सेल्ब। आ गोरशो रागी कली परमप्रभु यावे आ रू खोदेंशो सेल्ब। मेकेर शुश ग्येरनीम। “गे रिम्शो पाइब बाक्नीनी” दे कुम्सो पशो नेंसीब। उत्पत्ती २:८
4 मिनु परमप्रभुमी “आं मुरपुकी, आं लोव़ नेनीन। आं रागी ङा मुरपुकी इन नोफा दाइक्तीन। मारदे हना गो आं लोव़ शेंनुङ। आं ठीक निसाफ जात जात ङा मुर आन कली तुइक्पाइक्नुङ। मेको आन कली छेङछेङ दुम्ब।
5 गो आं ठीक पतीके रीब पा चाक्नुङ। गो ग्राचा चिक्शो बाक्नुङ। मिनु गो जात जात ङा मुर आन कली निसाफ पाइनुङ। समुन्द्र आ नेक्था बाक्ब मुरपुकीम आं लां कोव़नीम। आं वारच पतीके रिम्नीम। यसैया ४२:४
6 मिनु सरीङ गे कोव़ङीन। खप गे कोव़ङीन। मारदे हना सरीङ कुन खोदेंशो पा जाम्ब। रागी वा खोदेंशो पा जेक्ब। रागीम बाक्ब मुर नेल्ल भुस्ना खोदेंशो पा बेक्नीम। आं पाप रे प्रोंइतीके चहिं गेना हना यो लीशा बाक्ब। आं ग्रातीके गेनायो मनुप्ब। भजन संग्रह १०२:२६-२७; मत्ती २४:३५
7 गे ठीक पतीके तुइक्बपुकी आं लोव़ नेनीन। आं शेंशो थुंमी वोइक्ब मुर आं लोव़ नेनीन। मुर आन शुक्शी पशो नेंशा महिनीन। मेको आन तोक्शा पशो लोव़ नेंशा सुर्ता मपने। यसैया मत्ती ५:११
8 मारदे हना तुम्बुम वा नेक्शो खोदेंशो पा, मेको आन कली नेक्नीम। बुस्सुम ऊन ख्रोइश्शो खोदेंशो पा ख्रोइक्नीम। आं ग्राचा चहिं गेना हना यो लीशा बाक्ब। आं पाप रे प्रोंइतीके पाला पाला नेल्ल आन कली लीब” देंत।
परमप्रभु यावे आ गेय
9 परमप्रभु यावे सेंसीन, सेंसीन। सक्ति पाइश्शो दुमीन। साइ ङोंइती आंइ किकी पिपी आन कली पशो खोदेंशो पा, पने। साइ गे राहाब माइश्शो समुन्द्र ङा जन्तु कली मसाइक्नी ङा? ठेयब बुस्स कली मतूदीनी ङा? भजन संग्रह ८९:११
10 समुन्द्र सोव़पाइक्ब, गे मननी ङा? गे समुन्द्र कली चेश्शा आ पुंम लां मसेल्नी ङा? इन पाप रे प्रोंइशो, इन मुर आन कली शोक्पाइक्चा कली मोदेंशो पाइतीनी। प्रस्थान १४:२१-२२
11 परमप्रभु यावे आ प्रोंइशोपुकी लेत्नीम। मेकोपुकी कुम्सो पना पन सियोनम जाक्नीम। मिनु गेना हना यो ग्येरशा बाक्नीम। शुश ग्येरतीके, मेको आन श्येत नु हुकयी पतीके जाम्शा लाइब। यसैया ३५:१०
12 परमप्रभुमी “गो इन कली थुं बारपाइक्ब नङ। गे मुर तशा, मारदे हिंनीनी? मुरपुकी घांस खोदेंशो पा बेक्नीम। भजन संग्रह ५६:५; मत्ती १०:२८; यसैया ४०:१,६
13 गे इन कली सेल्ब परमप्रभु यावे कली प्रेंताक्नी। मेकोमी सरीङ प्राक्तु। रागी आ जग वोइक्तु। इन कली श्येत गेब मुर गाइक्तमेनु, गे नाक्त किंत किंत हिंनीनी। मेकोमी इन कली खतम सेल्चा चिक्शो बाक्त। तन्न मुल आ गाइश्शो ते लाक्गा? यसैया ४४:२४
14 मिनु चोक्सीशा गु बाप्शो मुर कली रीब पा प्रोंइनीम। मेकोपुकी मबेक्नीम। गेना हना यो जचा ताइनीम।
15 मारदे हना गो परमप्रभु यावे, इन परमप्रभु नङ। गो समुन्द्र ङा छाल पोक्नुङ। आं नें मुर नेल्ल आन परमप्रभु यावे बाक्ब। येरमीया ३१:३५
16 गो इ कली आं लोव़ पपाइक्ता। गो इ कली आं गुइ ङा वांकुमी सुम्शा वोइक्तन। सरीङ प्राक्ब नु रागी आ जग वोइक्ब गो नङ। मिनु सियोन कली ‘गे आं मुर बाक्नीनी’ देंशो बाक्नुङ” देंत।
दिप्चा पुंइसीशो यरूसलेम बोक्को
17 यरूसलेम बोक्को। परमप्रभु यावे इ पर्बम गाइश्शा, श्येत तूचा गेप्तु। गे दिङ दाङ गोल्पाइक्ब कचौरा तूशा श्येत्थ सेल्तीवी। भजन संग्रह ६०:५; भजन संग्रह ७५:९; येरमीया १३:१२-१३; प्रकाश १६:१९
18 मेको आ थिशो आल आन दातेमी, मुर आन कली शेंब सुइ मबाक्म। आ कोल्शो आल आन दातेमी मेको आन कली लां कोंइब सुइ मबाक्म।
19 इ कली श्येत निक्शी जाक्ताक्स। मेको लां नेल्लेम गोल्शो बाक्नीम। ङोंइती ङा श्येत इन सहर प्रेश्शा, खतम दुम्तीके नु नोले ङा श्येत अन्काल नु लडाइम, बेक्तीके बाक्त। सुम इ थुं बारपाइक्बा?
20 इ आलपुकी थाम्तेक्म। मेको लांम गोल्शो बाक्नीम। मेको ब्वारदम रेश्शो रोकोश खोदेंशो दुम्शो बाक्नीम। परमप्रभु यावे आ गाइक्तीके नु हुइक्तीके मोदेंशो दुम्शो बाक्नीम। बिलाप २:११,१९
21 मोपतीके गे गार पाइश्शो मुर नेनीन। गे दुक्शो बाक्नीनी, तन्न अङगुर शांबुम ममाइ।
22 परमप्रभु यावे, इ होव़प दुम्शा परमप्रभुमी “गो आं मुर आन कली वारच पाइब बाक्नुङ। गो इ दिङ दाङ गोल्पाइक्ब कचौरा इ गुइ रे लाइक्ता। मुल रे गे आं गाइक्तीक कचौरा लेंशा तूचा ममाल्नेवे।
23 मिनु इ कली श्येत गेब आ गुइमी मेको कचौरा गेनुङ। ङोंइती मेकोपुकीमी इ कली लांम बाप्पो। ‘इ तारी गाक्नीक’ देंतेक्म। मिनु गे इ ची गाक्तीक लां खोदेंशो सेल्तीवी” देंत। भजन संग्रह १२९:३