10
चढ़ेनीम तन्न दूली पाइनीम
1 ङोंइती इस्राएल ब्राक्शो नु शुश फल सिप्ब अङगुर बोट का बाक्त। मिनु इस्राएल ङा मुरपुकी शुश क्येट थीब दुम्तेक्म। मिनु मोपा मेकोपुकीमी फुल्लु के चढ़ेतीक यो शुश सेल्तेक्म। मिनु मेको रागीमी दोशो क्येट चेम्मे, मोशोन मे कोपुकीमी आन थाम ङा मूर्ति दारपाइक्तेक्म। येरमीया २:२१; लेवी २६:१
2 मेको आन थुं दूली बाक्ब। मुल मेकोपुकीमी आन मरिम्शो पशो आ सजाइ तचा माल्नीम। परमप्रभुमी मेको आन चढ़ेतीक नु आन ख्रुक्शो फुल्लु प्रेप्ब। मेको आन थाम ङा मूर्ति यो खतम सेल्ब।
श्येत जशा, थुं लेश्शो
3 मिनु मुल मेकोपुकीमी “गो परमप्रभु यावे कली मान पा महिंतीके गो आंइ के पिप मबाक्ब। मिनु पिप बाक्त हना यो मेकोमी आंइ कली मार पने चाप्बा ङा?” देंनीम।
4 मेकोपुकीमी शुश फश लोव़ पाइनीम। मार फश लोव़ पाइनीम देंशा हना, जोल पा कसम जशा कबल पाइनीम। मोपतीके वाक्शो रूमी ओशेर पाइश्शो सुवा वाशो खोदेंशो पा मुददा बारनीम।
मूर्ति पूजा पचा थुम्शो
5 सामरीयामी बाक्ब मुरपुकी बेथ-आवेन ङा बाछा आ मूर्ति आ पर्बम हिंनीम। ङोंइती मेको मूर्ति आ दारस तशा, ग्येरसीशो मुरपुकी मेको आ पर्बम रोंका पाइनीम। चढ़ेबपुकी यो मेको आ पर्बम रोंका पाइनीम। मारदे हना मेको मूर्ति ङोन लाइक्सीशो बाक्ब। होसे ४:१५
6 मेको मूर्ति कली अस्सुर लाइक्नीम। मिनु ठेयब पिप कली सोइक्नीम। एफ्राइम मुने दोक्ब, इस्राएल चहिं आ मिम्शो आ पर्बम मुने दोक्ब। होसे ५:१३
7 सामरीया ङा पिप ब्वाक्कुम बाक्शो जिक्शो राशी खोदेंशो पा योल्सीब।
8 मिनु आन मरिम्शो पतीक मूर्ति बाक्शो आवेन डांडा खतम पोक्नीम। मेको इस्राएल ङा मुर आन पाप पशो बाक्ब। मेको आन फुल्लु के चढ़ेतीकेमी चुं नु चोंक वाशा सुम्नीम। मिनु मेकोपुकीमी पहाड कली “आंइ कली सुम्की” दे डांडा कली “आंइ तारी दोक्कीन” देंनीम। होसे ९:६; लूका २३:३०; प्रकाश ६:१६
9 गे इस्राएलीपुकीमी गिबा आ नाक्त रे पाप पाइतीनी। मिनु मुल सम्म पाप पना पन बाक्नीनी। गिबा ङा मरिम्शो पाइब मुर आन कली मार, लडाइमी मसदमे ङा? होसे ९:९
10 गो गेना दाक्नुङा, मेना मेको आन कली सजाइ गेनुङ। मेको आन साप्पा मरिम्शो पशो आ पर्बम रागी रागी ङा मुर आन हुलमी मेको आन कली फ्रेंशा लाइक्नीम।
आन दला दाक्स पशो
11 मिनु एफ्राइम मगिक्शो बी का खोदेंशो बाक्ब। मिनु दांइ पशोनु, मेको ग्येरसीब। मोपतीके मेको आ दारशो बलामी गो जुवा लाप्नुङ। गो एफ्राइम कली दोरपाइक्नुङ। यहूदामी ब्यफ वाक्चा माल्ब। मिनु याकूबमी डल्ला प्रोल्चा माल्ब।
12 ठीक पतीक शोक्कीन। मिनु मप्रोंइचा ङा दाक्तीक अन्न खोदेंशो पा खुप्तीन। गे इन मवाक्शो रू वाक्तीन। मारदे हना इन परमप्रभु यावे कली माल्ची नाक्त जाक्त। मिनु मेको जाक्शा, गे इन कली पाप रे प्रोंइब। येरमीया ४:३; यसैया ५५:६
13 तन्न गेपुकी परमप्रभु यावेमी अरेशो मटितीकेम ग्रुम्शा बाक्तीनी। मिनु ठीक मदुम्तीके खुप्शा बाक्तीनी। गेपुकी जोल आ फल जाइब बाक्तीनी। मारदे हना गे आंम बोल नु इन लडाइ पाइब आन कली थमा सुइक्तीनी। अय्युब ४:८
14 मोपतीके इन मुर आन कली लडाइ तोइनीम। मिनु शाल्मनमी बेथ-आरबेल कली खतम पोक्शो खोदेंशो पा इन दरवार नेल्ल खतम पोक्शा गेनीम। मेना आल नु आ ममा कली यो साइक्नीम।
15 मारदे हना इन मरिम्शो पतीके मोदेंशो ठेयब बाक्ब। मोपतीके मोदेंशो दुम्ब। मेको नाक्त सुनी नां दाम चोटीन इस्राएल ङा पिप आन कली खतम पोक्नीम।