4
परमप्रभुमी मोसा कली चिन्ड कोंइशो
1 मिनु मोसामी परमप्रभु कली “मेकोपुकीमी आं देंशो थमा मसुइक्थु, मटीनीमी कों? ‘परमप्रभु यावेमी इ कली मग्रुम’ देंनीमी कों” देंत।
2 मिनु परमप्रभु यावेमी “इ गुइमी मार कुरी?” दे हिल्लो पाप्तु। मिनु मोसामी “कोक्के कुरता” देंत।
3 मिनु “खपीम ब्वारदो” देंत। मिनु मोसामी आ कोक्के ब्वारदानु, बुस्स दुम्त। मिनु मोसा मेको तशा प्रोक्त। प्रस्थान ७:१०
4 मिनु परमप्रभु यावेमी “आ मीलुम ग्याइक्तो” देंत। मिनु मोसामी आ गुइ दिंशा, बुस्स कली ग्याइक्दीमेनु, आ गुइमी लेंशा कोक्के दुम्त।
5 मिनु मेको तशा, मेकोपुकीमी “परमप्रभु यावे, आन किकी पिपी अब्राहाम, इसहाक नु याकूब आन परमप्रभुमी इ ङोंइती ग्रूशा, इ कली ग्रुम्तु, दे थमा सुइक्नीम” देंत।
6 मिनु परमप्रभु यावेमी लेंशा “इ गुइ इ फेक्शो वा आगाम वोतो” देंत। मिनु मोसामी मो पाप्तु। मिनु नोले आ गुइ ग्रुंइशा कोव़ङानु, कोव़र मुशा बुश दुम्शो ताप्तु।
7 मिनु मेकोमी “लेंशा, इ गुइ इ फेक्शो वा आगाम वोतो” देंत। मिनु वोइश्शा ग्रुंइदानु, आ गुइ ङोंइती ङा खोदेंशो पा सेस दुम्शो ताप्तु।
8 “इ ङोंइती ङा चिन्ड तशा, इ लोव़ थमा मसुइक्थु, मटिम्तेक्म हना, नोले ङा चिन्ड तशा, थमा सुइक्नीमी कों?
9 तन्न मेकोपुकीमी चिन्ड निक्शी तशा यो, थमा मसुइक्थु, इ कली मटिम्तेक्म हना, गे नील खोला ङा ब्वाक्कु लाइश्शा, सोव़शो खप तारी मोतो। खोला रे लाइश्शो ब्वाक्कु सोव़शो खप तारी मोदीनु, मेको हुश दुम्ब” दे परमप्रभु यावेमी देंत। प्रस्थान ७:१७-२१
10 मिनु मोसामी परमप्रभु यावे कली “आं परमप्रभु, गो लोव़ पस मजोक्नुङ। गे, मुल इन गेय पाइब नु लोव़ पनीनु यो, आं कली लोव़ पचा मपी। गो थांइशो लें पाइश्शो मुर बाक्नुङ” देंत। प्रस्थान ३:११; प्रस्थान ६:१२-३०
11 मिनु परमप्रभु यावेमी “सुमी मुर आ शोव़ सेला? सुम लोव़ पपाइक्ब, नोफा नेंब नु मनेंब, मिक्च ताइब नु मताइब सेला? गो, परमप्रभु यावे मनङा ङा? भजन संग्रह ९४:९
12 मुल लावो। गो इ कली लोव़ पपाइक्नुङ, मार देंचा माल्बा, मेको इ कली शेंनुङ” देंत। ब्यवस्था १८:१८; मत्ती १०:१९
13 मोसाम चहिं “आं परमप्रभु, आं पा ङा अरु कली सोइक्ने चाप्नीनी कों? तन्न आं कली मसोइक्तीनी” देंत।
14 मिनु परमप्रभु यावे मोसा आ पर्बम गाइश्शा “लेवी थर ङा इ लोक्ब हारून रिम्शो लोव़ पस जोक्ब बाक्ब, गो मतुइक्नुङा ङा? मिनु मुल इ कली ग्रुम्थ जाक्ब। इ कली तशा शुश ग्येरब।
15 गो इ पचा माल्शो लोव़ नेल्ल शेंनुङ। मिनु गे मेको हारून कली देंचा माल्नेवे। मिनु मेकोमी इ पा ङा मुर आन कली लोव़ पचा माल्ब। मेको इ शोव़ खोदेंशो दुम्ब। गो इ कली लोव़ पाइब परमप्रभु खोदेंशो पा, गे हारून कली लोव़ पाइब बाक्नीनी।
16 दोपा गो, परमप्रभुम इ कली लोव़ पाइनुङा, मोपा गे हारून कली लोव़ पचा माल्नेवे। मिनु मेकोमी मुर आन कली लोव़ पचा माल्ब। प्रस्थान ७:१-२
17 मेको कोक्के लाइश्शा, आं देंशो चिन्ड कोंइदो” दे परमप्रभु यावेमी मोसा कली माइक्तु।
मोसा इजीप्त रागी लेश्शो
18 मिनु मोसा आ शिउ, यित्रो आ खिं लशा, मेको कली “इजीप्त रागीम बाक्शो आं लोक्ब आन कली ग्रुम्थ लचा गेयीनी। बेक्मा कों, ब्रोंइमा, गो तुइक्चा दाक्ती” दे पुंइतु। मिनु यित्रोमी “इ थुं नाइश्शा, लावो” देंत। प्रस्थान ३:१
19 मिनु मोसा मिदयान रागीम बाक्मेनु, परमप्रभु यावेमी “लेंशा इजीप्त रागी लावो। मारदे हना इ कली साइक्चा माल्बपुकी बेक्तेक्मे” दे लोव़ पाप्तु।
20 मिनु मोसा आ मीश नु आ तौ निक्शी नु गधा ङोइश्शा, इजीप्त रागी लेत्त। परमप्रभु आ गेशो कोक्के यो कुरतु। प्रस्थान १८:३-४
21 मिनु परमप्रभु यावेमी मोसा कली “इ नोफा दाइश्शा नेनो। गे इजीप्त रागी जाक्दीश्शा, गो इ कली पपाइश्शो छक लाक्चा ङा गेय नेल्ल फाराओ आ ङोंइती पावो। गो चहिं मुर आन कली लचा मगेचा ङा पा फाराओ कली काइ मटीब सेल्नुङ। प्रस्थान ७:३,१३; ब्यवस्था २९:३; यसैया ६:१०; रोमी ९:१८
22 मिनु गे मेको कली ‘परमप्रभु यावेमी इन कली मार लोव़ पाप्तु देंशा हना, इस्राएल आं ङोंइती जरमेशो तौ बाक्ब। ब्यवस्था ३२:६
23 आं तौ कली आं कली चढ़ेतीक चढ़ेथ लचा गेवो। गे मटिप्तीवी हना, गो इ ङोंइती जरमेशो तौ कली साइक्नुङ’ देंत, देनो” दे परमप्रभु यावेमी मोसा कली माइक्तु। प्रस्थान ११:५; प्रस्थान १२:२९
मोसा आ तौ कली चिनु ख्रोइश्शो
24 मिनु लांम बास बाक्मानु, परमप्रभु यावेमी मोसा आ नेक्था जाक्शा, मेको कली साइक्चा माल्तु। उत्पत्ती १७:१४; उत्पत्ती ३२:२५
25 मिनु सिप्पोरामी चहिं हेश्शो फुल्लु का गुप्शा, आ तौ कली ख्रोइक्तीक चिन्ड ख्रोदा बाक्त। मोपा मेकोमी आ तौ आ चारतीक ङा कुशुल ख्रोइश्शा, आ तौ आ कुशुलम मोसा आ रां थिशा “गे हुश के ग्युम्ले नवे” देंमाक्त। यहोसु ५:२
26 मोदेंशो पतीके, परमप्रभुमी मोसा कली मसाइक्थु, प्रोना बाक्त। सिप्पोरामी मारदे “हुश के ग्युम्ले” देंत देंशा हना, ख्रोइक्तीक चिन्ड रे हुश यिमाक्त।
मोसा नु हारून
27 ङोंइती परमप्रभु यावेमी हारून कली “मोसा गोरशो रागीम जाक्चा चिक्शो बाक्ब। मेको कली ग्रुम्थ लावो” दे माइक्तु। मिनु लशा, परमप्रभु आ डांडाम मोसा कली ग्रुम्शा, पुक्पु पाइक्तु।
28 मोसामी आ कली सोइक्ब परमप्रभु यावे आ लोव़ नेल्ल नु आ पचा माल्शो चिन्ड यो हारून कली शेंताक्व।
29 मिनु मेको निक्शीमी इस्राएली आन खाल्पा नेल्ल आन कली खुप्ताक्से।
30 हारूनमी परमप्रभु यावेमी मोसा नु पशो लोव़ नेल्ल मेको आन कली शेंताक्व। मोसा कली कोंइशो चिन्ड, हारूनमी मुर आन ङोंइती कोंइताक्व।
31 मिनु मुरपुकीमी थमा सुइक्तेक्म। मिनु परमप्रभु यावेमी इस्राएली आन कली ग्रुम्शा, आन श्येत तशा, वारच पचा चिक्शो तुइश्शा, मेकोपुकी बाप्शा, परमप्रभु कली ठेयब सेल्तेक्म। प्रस्थान ३:१६