38
चोशा चढ़ेतीके सेल्शो
प्रस्थान २७:१-८; प्रस्थान ३०:१८-२१
1 मिनु बेचालेलमी बोल्यो शी के चोशा चढ़ेतीके सेल्तु। मेको ५ कुबीत लाइश्शो नु ५ कुबीत ब्रेम्शो, ४ पाटे नु कुबीत सां ग्येत्थ लाइश्शो पा सेल्तु।
2 आ ४ सुरमी ग्रोव़ सेल्तु। मेको ग्रोव़पुकी मेको चढ़ेतीक फलेक का केन सेल्शा, कांसामी गिल्तु।
3 चढ़ेतीके कली माल्शो मारेइ मारेइ कांसा के सेल्तु। पुलु वोइक्तीक बोसपुकी, पुलु ताप्तीकपुकी, ब्रुइक्तीक बोसपुकी, श्ये ग्रुंइतीक कांटापुकी नु मी कोइला कुर पतीकपुकी सेल्तु।
4 चोशा चढ़ेतीक कली कुबीत का नु आधा ङा पा ग्येत्थ पा मी तिक्तीक कांसा के जाली सेल्तु। कुबीत का ०.५ मिटर, हात का खोदेंशो बाक्ब।
5 कुरतीक कोक्के शुइक्चा कली, ४ ओटा मुन्द्रा सेल्शा, आ ४ सुरमी क्येप्ताक्व।
6 बोल्यो शी के कुरतीक कोक्के निक्शी सेल्शा, कांसामी गिल्तु।
7 चढ़ेतीक कुरचा कली मेको कोक्के मुन्द्राम शुइक्ताक्व। फलेक के सेल्शो चोशा चढ़ेतीके आगाम श्येत्थ बाक्शो बाक्त।
चिक्तीके ठेयब बोस सेल्शो
8 बेचालेलमी कांसा के चिक्तीक ठेयब बोस नु आ निप्पाइक्तीके सेल्तु। मेको ग्रुम्तीक ताम्बु ओव़तीकेम गेय पाइब मीश मुर आन कांसा के ऐना के सेल्तु।
ताम्बु आ लाङगा
प्रस्थान २७:९-१९
9 मिनु बेचालेलमी ताम्बु आ लाङगा थरपु हिरचा कली रिम्शो पा किरशो सुती श्येले के वा प्रोव़पाइक्तु। मेको फारतीक दक्खिन गे सहे का कुबीत लाइश्शो पा सेल्तु। कुबीत का ०.५ मिटर खोदेंशो बाक्ब।
10 मेको फारतीक ग्याइक्पाइक्चा कली खाल का ङा थाम नु खाल का ङा कांसा के राप्पाइक्तीके के सेल्तु। मुन्द्रापुकी नु कोक्केपुकी चहिं चांदी के सेल्तु।
11 मिनु मोदेंशो पा उत्तर गे यो सहे का कुबीत लाइश्शो फारतीक प्रोव़पाइक्तु। मेको कली २० ओटा थाम, २० ओटा कांसा के राप्पाइक्तीके सेल्तु। मुन्द्रापुकी नु कोक्केपुकी चहिं चांदी के सेल्तु। सहे का कुबीत ५० मिटर बाक्ब।
12 पच्छिम गे ५० कुबीत ङा फारतीक सेल्तु। मेको कली १० ओटा थाम नु १० ओटा राप्पाइक्तीके सेल्तु। आन मुन्द्रा नु कोक्केपुकी चहिं चांदी के सेल्तु।
13 मिनु लाङगा आ ङोंइती पूर्ब गे कली ५० कुबीत ङा फारतीक वा सेल्तु।
14 ओव़तीके पटटी का कली १५ कुबीत ङा फारतीक वा सेल्तु। थाम नु राप्पाइक्तीके सां सां सेल्तु।
15 मिनु ओव़तीके ङा अर्को पटटी कली यो १५ कुबीत ङा फारतीक वा सेल्तु। थाम नु राप्पाइक्तीके सां सां सेल्तु।
16 लाङगा ङा एर ओंथ नेल्ल ङा फारतीक रिम्शो पा किरशो सुती श्येले के प्रोव़शो वा के सेल्तु।
17 मेको थाम आन राप्पाइक्तीक कांसा के बाक्तेक्म। थाम आन मुन्द्रा नु कोक्केपुकी चहिं चांदी के बाक्तेक्म। थाम आन पिया चांदीम गिल्शो बाक्तेक्म। थाम आन फ्रेंतीके नेल्ल चांदी के बाक्तेक्म।
18 मेको लाङगा ङा ओव़तीके ङा फारतीक नीलो, प्याजी नु लल श्येले नु रिम्शो पा किरशो सुती श्येले के प्रोव़शो वाम दारशो बुटा आप्शा सेल्तु। मेको आ लाइश्शो २० कुबीत नु आ ग्येत्थ ५ कुबीत ङा पा अर्को फारतीक नु उइक्थ उइक्थ पा सेल्तु। कुबीत का ०.५ मिटर, हात का खोदेंशो बाक्ब।
19 मिनु ओव़तीक ङा ४ ओटा थाम नु आन ४ ओटा राप्पाइक्तीके कांसा के बाक्तेक्म। मेको फारतीक कली ब्वेक्तीक, थाम आन पिया नु फ्रेंतीके चांदी के बाक्तेक्म।
20 मिनु परमप्रभु यावे आ बाक्तीके नु लाङगा ङा किला नेल्ल कांसा के बाक्तेक्म।
सुन चांदी नु कांसा नाक्शो
21 परमप्रभु यावे आ बाक्तीक सेल्चा कली मार मार माल्दा, मेको ब्रेक्शो बाक्त। मेको बाक्तीके कबल पशो सन्दोस वोइक्तीके बाक्त। मोसामी “मेको नेल्ल ब्रेक्चा माल्ब” दे अरेशो बाक्त। चढ़ेब हारून आ तौ इथामार लेवी आन कली गेय पपाइक्ब बाक्त। गन्ती ४:२८
22 परमप्रभु यावेमी मोसा कली शेंशो खोदेंशो पा, यहूदा आ थर ङा हुर आ चच, ऊरी आ तौ बेचालेलमी मारेइ मारेइ सेल्तु। प्रस्थान ३१:१-११
23 मेको नु दान आ थर ङा अहीसामाक आ तौ ओहोली-आब यो बाक्त। मेको मार मार मुशा सेल्तीक गेय जोक्ब, ब्रेक्स ब्रेक्शा सेल्चा जोक्ब नु नीलो, प्याजी नु लल रङ ङा रिम्शो पा किरशो सुती श्येलेम दारशो बुटा आप्तीक गेय यो जोक्ब बाक्त।
24 परमप्रभु यावे आ बाक्तीक नु मेकेर माल्शो मारेइ मारेइ सेल्चा कली मुर आन गेशो सुन गिश दुम्माक्त देंशा हना, २९ टलेन्ट नु ७ सहे ३० शेकेल दुम्त। नेल्ल नाक्शा, हजार का किलो खोदेंशो दुम्त। टलेन्ट का ३४ किलो बाक्ब। शेकेल का ११.५ ग्राम, तोला का खोदेंशो बाक्ब।
25 ङोंइती हिक्शो वोंइश मुर आन रे पोक्शो चांदी सहे का टलेन्ट नु हजार का ७ सहे ७५ शेकेल दुम्त।
26 मिनु २० बर्स गाप्शो नु मेको क्येङा लाक्शो वोंइश मुर ६ लाख हजार सां ५ सहे ५० जना बाक्तेक्म। मेको आन के का का पा आधा आधा शेकेल पोक्तेक्म। प्रस्थान ३०:१२-१६; गन्ती १:४६
27 ताम्बु आन फलेक राप्पाइक्तीक नु नेल्ल क्येङा चोव़खो कोठा कली फारतीक ङा थाम आन राप्पाइक्तीक कली सहे का टलेन्ट माल्ताक्व। सहे का राप्पाइक्तीके कली सहे का टलेन्ट माल्ताक्व। का कली टलेन्ट का माल्ताक्व।
28 मेको हजार का ७ सहे ७५ शेकेल चांदीमी ब्वेक्तीक सेल्शा, थाम आन पिया गिल्तीक नु आन फ्रेंतीकपुकी सेल्तेक्म।
29 मुर आन चाक्शो कांसा ७० टलेन्ट नु हजार निक्शी ४ सहे शेकेल दुम्शो बाक्त।
30 मेको के ग्रुम्तीक ताम्बु ङा ओव़तीके ङा थाम आन राप्पाइक्तीके, कांसा के चोशा चढ़ेतीके, आ मी तिक्तीक जाली नु चढ़ेतीक आ मारेइ मारेइ सेल्पाइक्तु।
31 मिनु लाङगा ङा थाम आन राप्पाइक्तीकपुकी, ठेयब ओव़तीके ङा थाम आन राप्पाइक्तीकपुकी, ताम्बु नु लाङगा ङा किला नेल्ल सेल्पाइक्तु।