6
मोरदेकैमी ठेयब मान तशो
1 मिनु मेको नाक्दो पिप इप्ने मचब। मिनु पिपमी इतिहास ब्रेक्शो किताब चाक्पाइक्तु। मिनु मेको पढेपपाइश्शा नेंतु। एस्तर २:२१-२२
2 मिनु मेको किताबमी पिप आ लाप्चोम बाक्ब बिग्थान नु तेरेश माइश्शो ठेयब लाप्चोम गेय पाइब निक्शीमी चुरशा पिप अहासूरस कली साइक्चा माल्शो लोव़ नु मोरदेकैमी पिप कली तुइक्पाइश्शो आ पर्बम ब्रेक्शो बाक्त।
3 मिनु पिपमी “एको ओं पशो आ पर्बम मोरदेकै कली मारेइ मान नु दर्जा गेशो बाक्मे?” दे हिल्लो पाप्तु। मिनु मेकेर बाक्ब पिप आ गेय पाइबपुकीमी “मोरदेकै आ पर्बम मारेइ मपशो बाक्ब” देंतेक्म।
4 मिनु पिपमी “लाङगाम सु बाक्मे?” दे हिल्लो पाप्तु। मेना हामानमी आ ग्रुक्शो, मुर कली क्युक्शा साइक्तीक थाममी “मोरदेकै कली साइक्चा गेयीनी” दे पिप कली पुंइथ लाङगामी नक जाक्शो बाक्त। एस्तर ५:१४
5 मिनु पिप आ गेय पाइबपुकीमी “हामान लाङगामी राप्शा बाक्त” देंतेक्म। मिनु पिपमी “मेको कली खिं गा ब्रेत्तीन” देंत।
6 मिनु हामान खिं गा ओव़मेनु, पिपमी मेको कली “पिप आंमान मान गेचा दाक्शो मुर कली मार पचा माल्बा?” दे हिल्लो पाप्तु। मिनु हामानमी आ थुं थुंमी “आं ङा लाक्शा, तेको मुर कली पिपमी मान गेचा दाक्बा ङा?” दे मिम्ताक्व।
7 मिनु मेकोमी पिप कली “पिप सु कली मान गेचा दाक्नीनी,
8 मेको कली पिप आ ङोंइती फेक्शो वा नु पिया ग्योम्सीशो पिप आ शारा चाक्पतीने। दानीएल ५:२९
9 मिनु मेको पिप आ ङोंइती फेक्शो वा नु आ शारा नेल्ल आन क्येङा मान तशो मुर कली गेचा माल्ब। मिनु नेल्ल क्येङा अधिकार पाइश्शो मुरुमी पिपम मान गेचा दाक्शो मुर कली फेक्तल। मिनु मेको कली शारा ङोइक्पाइश्शा, सहर ङा लांमी गाक्पाइक्चा माल्ब। मिनु नेल्लेमी ‘पिपमी मान गेचा दाक्शो मुर कली मार पवा, मेको कोव़ङीन’ देंना देंन हिरदमेक्ल” देंत। उत्पत्ती ४१:४२-४३
10 मिनु पिपमी हामान कली “गे इ देंशो खोदेंशो पा फेक्तीक नु शारा मुल कना चाक्शा, लाप्चोम बाक्ब यहूदी मोरदेकै कली मोदेंशो पावो। इ देंशो का यो मख्राइक्थु, पावो” दे माइक्तु।
11 मिनु हामानमी फेक्तीक वा नु शारा चाक्शा, मोरदेकै कली मेको वा फेक्शा, शाराम ङोइक्पाइश्शा, सहर ङा लां मेर लाइश्शा, आ ङोंइती “पिपमी मान गेचा दाक्शो मुर कली मार पवा, मेको कोव़ङीन” देंना देंन मोरदेकै कली हिरताक्व।
12 मिनु नोले मोरदेकै पिप आ दरवार ङा ठेयब लाप्चोम लेत्त। मिनु हामान चहिं मुने पा कुल सुम्शा दोरोर पा दोरशा, आ खिं लत।
13 मिनु मेकोमी आ मीश जेरेश नु आ वारच नेल्ल आन कली मार दुम्मे, मेको नेल्ल का का पा शोव़तु। मिनु मेको आ वारचपुकी नु आ मीशेमी मेको कली “इन जोरी सत्रु मोरदेकै, यहूदी बाक्त हना, गे मेको कली मारेइ पने मचाप्नीनी। मुल गे मेको आ ङोंइती खतम दुम्नीनी” देंतेक्म।
14 मोपा लोव़ पना पन बाक्मेनु, पिप आ गेय पाइबपुकी जाक्शा, हामान कली पिपीम एस्तरमी सेल्शो भोज जचा कली लाइक्तेक्म। एस्तर ५:८