8
पिप आ देंशो टिने
1 जोक्ब तुइक्ब मुर खोदेंशो सु बाक्बा? एको लोव़ आ अर्थ सुम तुइक्बा ङा? जोक्तीक तुइक्तीकेमी मुर आन कुल हाक्शो सेल्ब। मिनु मेको आ किक्शो कुल फाइश्शा रिम्शो सेल्ब।
2 पिप आ देंशो टिवो। मारदे हना गे परमप्रभु आ ङोंइती कसम जाप्तीवी।
3 पिप आ बाक्तीक रे गाक्चा कली मचुइक्तो। गे मरिम्शो मपावो। मारदे हना पिपमी मार पचा दाक्बा, मेको पाइब।
4 पिप आ लोव़मी सक्ति बाक्ब। सुम मेको कली “हजुर, गे मार पनी” देंने चाप्बा?
5 सुम परमप्रभु आ शेंशो टीबा, मेको कली मारेइ मरिम्शो मदुम्ब। मिनु जोक्ब तुइक्ब मुरुमी ठीक गेय पची ना गेय पस जोक्ब।
6 मुरुमी मार मार पाइनीमी, मेको पतीके ना नु निसाफ पची ना बाक्ब। मुर आन मरिम्शो पतीकेम मुर आन कली दिप्ब। उपदेसक ३:१
7 नोले ङा लोव़ सुइमी मतुइक्नीम। मोपतीके सुइम मुर आन कली नोले मार दुम्बा, मेको देंने मचाप्नीम। उपदेसक १०:१४
8 फश कली तेक्शा वोइक्तीक सक्ति सुइ के मबाक्ब। मोपान आंम बेक्तीक नाक्त कली सुइमी तेक्ने मचाक्ब। दोपा लडाइ पची ना सुइ खिं लचा मताइनीमी, मोपान मरिम्शो पतीकेमी मरिम्शो पाइब कली गेनायो मप्रोंइब।
9 गो रागीम पशो नेल्ल कोव़ङुनु, नेल्ल ताता। सक्ति पाइश्शो मुरुमी अरु आन कली दिप्शा वोइक्नीम।
ठीक पाइब नु ठीक मपाइब
10 मिनु गो परमप्रभु आ अरेशो मटीब मुर थिम्चा पुंइसीशो ताता। ठीक पाइब चहिं परमप्रभु आ सहर रे ग्रुंइचा पुंइसीशो बाक्तेक्म। मिनु सहरमी सुइमी मेको आन कली ममिम्बाक्तेक्म। मेको यो जाम्शा लाइब बाक्ब।
11 मुरुमी मरिम्शो पाप्तु हना, रीब पा सजाइ मताप्तु हना, मेकोमी मरिम्शो पना पन बाक्ब। अय्युब ३५:१५-१६; मलाकी ३:१४-१५
12 मरिम्शो पाइब मुर सहे का खेयप मरिम्शो पशा यो शुश नाक्त सम्म ब्रोंइशा बाक्नीम। मो हना यो परमप्रभु कली मान पा हिंब नु आ ङोंइती बाक्ब आन कली रिम्शो दुम्ब, दे गो तुइक्नुङ। भजन संग्रह ३७:१८; भजन संग्रह ७३:१७-२६
13 तन्न परमप्रभु यावे आ अरेशो मटीब आन कली गेनायो रिम्शो मदुम्ब। मिनु शुश ब्रोंइचा यो मताइनीम। मारदे हना मेकोपुकीमी परमप्रभु कली मान पा महिंनीम।
14 रागीम अर्को जाम्शा लाइब गेय का यो दुम्ना दुम्न बाक्ब। ठीक पाइब बाक्नीम। मेकोम परमप्रभु आ अरेशो मटीब खोदेंशो पा ताइनीम। मिनु परमप्रभु आ अरेशो मटीब बाक्नीम। मेको ठीक पाइब खोदेंशो पा बाक्चा ताइनीम। एको यो जाम्शा लाइब बाक्ब। उपदेसक ७:१५
15 मोपतीके गे ग्येरसीशा बाक्कीन। मारदे हना रागीमी मुर आन कली जचा तूचा नु ग्येरशा बाक्चा ङा लाक्शा, अरु मारेइ रिम्शो मबाक्ब। परमप्रभुमी गेशो ब्रोंइतीकेमी गिश श्येत बाक्त हना यो, मेको पने चाप्नीम। उपदेसक २:२४
16 मिनु गो रागीमी मुरपुकीमी मइप्थु नाक्दो नाक्ती गेय पशो कोव़चा कली नु जोक्तीक तुइक्तीक मार बाक्मे, मेको तुइक्चा कली आं थुं हिरताक्ङ।
17 मिनु परमप्रभुमी पशो गेय नेल्ल ताता। रागीम मार दुम्बा, मेको सुइमी तुइक्ने मचाप्नीम। मुरपुकीमी मेको तुइक्चा कली शुश श्येत पाम्तेक्म हना यो, मेको नेल्ल रुप्ने मचाप्नीम। तेकोइ जोक्ब तुइक्ब मुरुमी “गो मेको तुइक्नुङ” देंत हना यो, मेकोम थमा पा मतुइश्शो बाक्ब। उपदेसक ३:११; यसैया ५५:८-९