6
परमप्रभुमी मारेइ मारेइ गेब
1 गो रागीमी अर्को मरिम्शो का यो तशो बाक्नुङ। मेकोमी मुर आन कली थाम्पा दिप्शो बाक्ब।
2 परमप्रभुमी मुर आन कली शोंप, रू नु मान ततीक गेब। मोपा मेको कली आ दाक्शो पचा कली मारेइ श्येत मदुम्ब। तन्न परमप्रभुम मेको कली मेको ग्येरशा जचा मगेथु, अर्को मुर कली ग्येरशा जचा गेब। मेको यो जाम्शा लाइब बाक्ब।
3 सुइ मुर का के सहे का जना आल बाक्शा, मेको शुश बर्स ब्रोंइशा यो आ चेम्शो जशा मग्येरसीब, रिम्शो पा थिम्चा यो मपुंइसीब। मेको क्येङा शाम्शा लशो आल कली रिम्शो बाक्ब। उपदेसक ४:३
4 शाम्शा लशो आल जाम्शा लचा कली जरमेसीशो बाक्ब। मिनु मेको छिङछिङमी जाम्शा लाइब। मिनु छिङछिङमीन मेको आ नें सुम्ब।
5 मेकोम गेनायो नां मतशो बाक्ब। मेकोम मारेइ मजोक्शो यो बाक्ब। मो हना यो मेको मुर क्येङा मेको आल आ नाइश्शो रिम्शो बाक्ब।
6 मेको मुर हजार का बर्स ब्रोंइशा यो आ दाक्शो पने मचाप्तु हना, मेको मार नाइक्चा ताइबा ङा? मेको नेल्ल मबेक्नीमी ङा?
7 मुर आ श्येत पशो नेल्ल आ कोव़ज प्रिंचा कली ला बाक्ब। मो हना यो मेको आ शोव़लु बेक्तीक गेनायो मनुप्ब। उपदेसक १:८
8 मूर्ख मुर क्येङा जोक्ब तुइक्ब मारम रिम्शो बाक्नीमी? प्रुङग मुर अर्को आन ङोंइती रिम्शो पस जोक्शा, मार ताइबा ङा?
9 मार मार माल्नुङ, दे शुश मिम्चा क्येङा आ तशोम ग्येरसीशा बाक्चा रिम्शो बाक्ब। मेको यो जाम्शा लाइब नु फश कली खेदा पशो खोदेंशो बाक्ब।
10 मार बाक्बा, मेको नेल्ल आन नें वोइक्ने थुम्शो बाक्ब। मिनु मुर आ थुंम मार बाक्बा, मेको तुंइसीब। आंम क्येङा बोल्यो मुर कली सुइमी मारेइ देंने मचाप्ब। अय्युब ९:२-४,३२
11 मेको शुश लोव़ पाप्तु हना यो, मेको क्येङा शोर गाक्शो बाक्ब। मिनु तेको रिम्शो बाक्बा?
12 मुर इच्का नाक्त ब्रोंइब बाक्ब, मार रिम्शो बाक्मे, मेको सुम तुइक्बा ङा? मुर आ नाक्त वांकु खोदेंशो पा लाक्ब। मेको बेक्शा लम नोले मार दुम्बा, दे सुम देंने चाप्बा ङा? १इतिहास २९:१५; भजन संग्रह १४४:४