12
बेक्शो मुर सेंसीशो
1 मिनु परमप्रभु यावे आ स्वर्ग ङा गेय पाइबमी “मेना नेल्ल क्येङा ठेयब स्वर्ग ङा गेय पाइब मिकाएल जाक्ब। मिनु मेकोमी इ रागी ङा मुर आन कली कोव़ब। मेना रागी दुम नोले गेनायो मदुम्शो श्येत जाक्ब। तन्न इ मुर श्येत रे प्रोंइचा पुंइसीनीम। सु सु आन नें किताबम ब्रेक्शो बाक्मे, मेको ब्रोंइचा ताइनीम। दानीएल १०:१३; प्रकाश १२:७; मत्ती २४:२१; दानीएल ७:१०
2 मिनु खपीमी बेक्शा इप्शो नेल्ल बोक्नीम। का निक्शी गेना हना यो ब्रोंइचा कली बोक्नीम। का निक्शी चहिं गेना हना यो शुश मुने दोक्चा कली बोक्नीम। यूहन्ना ५:२९
3 मिनु जोक्ब तुइक्बपुकी सरीङ ङा छेङछेङ खोदेंशो दुम्नीम। मिनु सु सुमी मुर आन कली ठीक लांमी गाक्पदमे, मेकोपुकी गेना हना यो सोरुल आ छेङछेङ खोदेंशो दुम्नीम। दानीएल ११:३३; हितोपदेस ४:१८; मत्ती १३:४३
4 तन्न गे दानीएलमी, एको लोव़ सुइ आन कली मदेनो। एको नोले ङा नाक्त कली ब्रेक्शो किताब मप्राक्थु, छाप थोक्शा वोतो। नोले ङा नाक्तीम शुश मुर आन थुं मनाइक्थु, थमा लोव़ माल्शा शुश तुइक्ब दुम्नीम” देंत। प्रकाश १०:४
नोले ङा नाक्त
5 मिनु गो, दानीएलमी, अर्को मुर निक्शी तातासी। का खोला आ ओंथ हांबु नु अर्को खोला आ आइक्ची हांबुम बाक्ताक्स।
6 मिनु कामी सुती वा फेक्शा आइक्ची हांबुम बाक्ब कली “एको लोव़ गाप्चा कली गिश नाक्त बाक्नीमी?” दे हिल्लो पाप्तु।
7 मिनु मेको आइक्ची हांबु बाक्ब बुश सुती वा फेक्शोमी आ गुइ निम्फा सरीङ गे पोक्तु। मिनु गेना हना यो ब्रोंइशा बाक्ब आ नें थिशा कसम जशो नेंता। मिनु मेकोमी “एको पाला का बाक्शो ना, पाला निक्शी बाक्शो ना नु आधा पाला बाक्शो ना कली दुम्ब। मिनु परमप्रभु यावे आ मुर आन कली श्येत जची ना नु्म्मेनु, मेको देंशो लोव़ नेल्ल गाप्ब” दे गेना हना यो ब्रोंइशा बाक्ब आ नेंमी कसम जाप्तु। दानीएल ७:२५; प्रकाश १०:५-६
8 गो मेको लोव़ नेंता, तन्न मरुबु। मोपतीके गो “आं प्रभु, एको नेल्ल रे मार दुम्बा?” दे हिल्लो पाता।
9 मिनु मेकोमी “दानीएल, गे इ लां खोतो। मारदे हना एको लोव़ नोले ङा नाक्त सम्म ख्रुइश्शा छाप थोक्शा वोइक्चा माल्ब।
10 मिनु शुश मुर नाक्चा, रिम्शो सेल्चा नु सुन यपाइश्शो खोदेंशो पा रिम्शो सेल्चा पुंइसीनीम। तन्न परमप्रभु कली मटीब, मटिना टिन बाक्शा, मारेइ मरुप्नीम। तन्न जोक्ब तुइक्बपुकीमी एको लोव़ रुप्नीम।
11 मिनु नाक्त किंत किंत ङा चोशा चढ़ेतीक चढ़ेचा नाइक्तमे नोले नु ग्रांग्रा दिशो थोव़क चढ़ेमे सम्म हजार का, सहे निक्शी ९० नाक्त दुम्नीम। दानीएल ९:२७
12 सु सु हजार का सहे सां ३५ नाक्त सम्म फाल्शा बाक्नीमी, मेको ग्येरसीशो मुर बाक्नीम।
13 तन्न गे, दानीएल, इ लां लशा, थुं नांइसो। मिनु नोले ङा नाक्ती इ इनाम तचा कली बेक्चा रे सेंचा पुंइसीनेवे” देंत।