11
عَلَ مُ مّيشِ عِسِرَيِلَ رَ
1 نَ كُي، ﭑ شَ مَشْرِنيِ تِ، عَلَ مّيشِ نّ عَ شَ حَمَ رَ؟ عَستْقُلَهِ! ﭑ تَن يّتّ قِندِشِ عِسِرَيِلَكَ نَن نَ، عِبُرَهِمَ شَ مَمَدِ، كٍلِقٍ بُنيَمِن بْنسْي.
2 عَلَ مُ مّيشِ عَ شَ حَمَ رَ عَ بَرَ نَشَن سُفَندِ نُ. وٌ مُ عَ كٌلٌن كِتَابُي نَشَن مَسٍنشِ عَننَبِ عٍلِيَ شَ قٍ رَ، عَ تٌ عَ شُي رَ سِفَ عَلَ مَ عِسِرَيِلَ شِلِ مَ؟
3 عَ نَشّ، «مَرِفِ، عٍ بَرَ عِ شَ نَمِحْنمّيٍ قَشَ، عٍ بَرَ عِ شَ سّرّشّبَدٍيٍ رَبِرَ. ﭑ كٍرٍن ثٍتِ نَن قَ لُشِ، عٍ كَتَقٍ عٍ شَ ﭑ تَن قَن قَشَ.»
4 عَلَ قَ عَ يَابِ دِ؟ عَ نَشّ، «ﭑ بَرَ مِشِ وُلُ سٌلٌقٍرٍ رَفَتَ ﭑ يّتّ بّ نَشٍيٍ مُ نُ عٍ شِنبِ سِن بَالِ كُيٍ بّ.»
5 عَ مَن نَ نَ كِ نّ يَكْسِ. عَلَ شَ حَمَ دْنشْي لُشِ، عَ بَرَ نَشٍيٍ سُفَندِ عَ شَ هِننّ سَابُي رَ.
6 كْنْ شَ عَ بَرَ عٍ سُفَندِ هِننّ سَابُي رَ، كّوَلِ سَابُي شَ مُ عَ رَ سْنْن، شَ نَ مُ عَلَ شَ هِننّ مُ قِندِ مَ هِننّ يَتِ يَتِ رَ نُ.
7 وٌن قَ نَ مَ دِ؟ عِسِرَيِلَ نُ نَشَن قٍنقٍ عَ مُ عَ سْتْ، كْنْ عَلَ نُ بَرَ نَشٍيٍ سُفَندِ، نٍيٍ تَن بَرَ عَ سْتْ. عَ دْنشْييٍ تَن بْحّيٍ نَشَ بَلَن.
8 عَ سّبّشِ،
«عَلَ نَشَ عٍ شَشِلِ دْنشُ،
عَ عَ نِيَ عٍ يَيٍ مُ سٍ تٌ،
عٍ تُلِيٍ مُ قٍ مّ،
هَن يِ تٌ لْشْي.»
9 عَننَبِ دَوُدَ قَن نَشَ عَ مَسٍن،
«عٍ شَ شُلُنيِيٍ شَ قِندِ فَنتَنيِ رَ عٍ بّ،
يّلّ نَشَن عٍ سُشُمَ،
فّمّ نَشَن عٍ رَبِرَ مَ.
نَ شَ قِندِ عٍ شَ وَلِ سَرٍ رَ.
10 عٍ يَ شَ رَقْورْ، عٍ شَ دْنشُ.
عٍ شَ كُنكُرُن عٍ شَ تْورّ بُن مَ وَشَتِ بِرِن.»
11 نَ كُي، ﭑ مَن شَ مَشْرِنيِ تِ، عِسِرَيِلَكَيٍ تٌ بَرَ تَنتَن، عٍ بِرَ، عٍ مُ نْمَ رَكٍلِدٍ سْنْن؟ عَستْقُلَهِ! كْنْ عٍ شَ تَنتَنيِ بَرَ عَ نِيَ سِ فبّتّيٍ بِرِن شَ نْ كِسِ سْتْدٍ، عَلَكٌ نَ كِسِ شْلِ شَ عِسِرَيِلَكَيٍ قَن سُشُ.
12 عَ دِ، شَ عٍ شَ تَنتَنيِ قِندِشِ هّيرِ شُنفبٍ نَن نَ دُنِحَ بّ، عَ قِندِ بَرَكّ رَ سِ فبّتّيٍ قَن بّ، عٍ شَ قٍ نَ رَكَمَلِ، هّيرِ نُن بَرَكّ شُن مُ مَسَمَ شّ كِ قَنيِ؟
13 ﭑ شَ قَ وْيّن وٌ بّ، وٌ تَن نَشٍيٍ مُ قِندِشِ عِسِرَيِلَكَيٍ رَ. ﭑ تٌ قِندِشِ شّيرَ رَ وٌ تَن سِ فبّتّيٍ بّ، ﭑ سّيوَ مَ نّ ﭑ مَ وَلِ رَ، ﭑ عَ مَتْشْ،
14 عَلَكٌ تّمُندٍ نَ شَ عَ نِيَ ﭑ بٌورٍ يُوِقِيٍ شَ مِلَ ﭑ مَ مَسٍنيِ مَ، ندٍيٍ شَ نْ كِسِدٍ عٍ يَ مَ.
15 عَلَ عَ كٌبٍ سٌقٍ عٍ رَ، شَ نَ بَرَ عَ نِيَ لَنيِ شَ سٌ عَلَ نُن دُنِحَ تَفِ، عَ دِ، عَلَ عٍ رَفبِلٍنقٍ عَ يّتّ مَ، نَ مُ لُمَ شّ عَلْ مِشِ نَ رَكٍلِ قَشَمِشِيٍ يَ مَ؟
16 شَ سَنسِ شْرِ شُن سِنفٍ بَرَ قِ عَلَ مَ، عَ دْنشْي بِرِن بَرَ قِندِ عَ فبٍ رَ. شَ وُرِ بِلِ سَنكٍ بَرَ قِ عَلَ مَ، عَ سَلٌنيِيٍ قَن بَرَ قِندِ عَ فبٍ رَ.
17 عَ لُشِ نّ عَلْ عٌلِوِ بِلِ سَلٌنيِ ندٍيٍ نَ شَبَ عَ بِلِ مَ عَلَكٌ وُلَ عٌلِوِ سَلٌنيِيٍ شَ دَقُ نَ شَبَدٍ رَ. عِ تَن مِسَالِشِ نَ وُلَ عٌلِوِ سَلٌنيِ نَن نَ، نَشَن بَلٌمَ نَ عٌلِوِ بِلِ سَابُي رَ، عِ دَقُشِ نَشَن نَ.
18 نَ كُي، عِ نَشَ عِ يّتّ عِفبٌ نَ سَلٌنيِ شَبَشِيٍ مَ. بٍينُن عِ شَ عِ يّتّ عِفبٌ، عِ مَحْشُن سِندٍن، عَ عِ تَن شَ مُ وُرِ بِلِ سَنكٍ رَبَلٌشِ. وُرِ بِلِ سَنكٍ نَن عِ تَن نَبَلٌشِ.
19 كْنْ عِ قَمَ نّ عَ قَلَدٍ، «وُرِ سَلٌنيِيٍ شَبَشِ نّ عَلَكٌ ﭑ تَن شَ دَقُ عٍ شَبَدٍ رَ.»
20 نْندِ نَ عَ رَ. عٍ شَبَ عٍ شَ دَنشَنِيَتَرٍحَ نَن مَ، عِ قَن دَقُشِ نَا عِ شَ دَنشَنِيَ نَن مَ قٍ رَ. كْنْ عِ نَشَ عِ يّتّ عِفبٌ. عِ حَن شَ فَاشُ،
21 بَرِ مَ شَ عَلَ مُ عٌلِوِ بِلِ قَنيِ سَلٌن سِنفٍيٍ لُ نَ، عَ مُ عِ قَن لُمَ نَ دٍ!
22 نَ كُي، عِ حْشْ سَ عَ شْن مَ عَ عَلَ شَ قَنيِ فبٌ، كْنْ عَ شَ قٍ مَن مَشْرْشْ. عَ شَ قٍ مَشْرْشْ مِشِيٍ نَن مَ نَشٍيٍ بَرَ عَ شَ كِرَ بّحِن، كْنْ عَ شَ قَنيِ فبٌ عِ تَن بّ شَ عِ لُمَ عَ شَ قَنيِ كِرَ شْن مَ. شَ نَ مُ عَ رَ عَ عِ قَن مَ قٍ رَبَمَ نّ عَلْ عَ نَ عٌلِوِ سَلٌنيِ شَ قٍ رَبَ كِ نَشّ.
23 يُوِقِيٍ قَن، شَ عٍ عٍ شَ دَنشَنِيَتَرٍحَ بّحِن، عٍ مَن قَمَ دَقُدٍ وُرِ بِلِ رَ، عٍ شَبَ نَشَن مَ، بَرِ مَ عَلَ سّنبّ فبٌ. عَ تَن نْمَ عٍ رَفبِلٍندٍ عٍ لُدٍ قٌرِ.
24 عِ تَن نُ قِندِشِ وُلَ عٌلِوِ سَلٌنيِ نَن نَ، نَشَن شَبَشِ عَ دَقُ عٌلِوِ بِلِ فبّتّ مَ، وٌ نُن نَشَن كٍرٍن مُ عَ رَ. شَ عَلَ بَرَ نَ رَبَ عِ بّ، عَ مُ تَفَنمَ عٌلِوِ بِلِ قَنيِ سَلٌنيِ رَفبِلٍندٍ عَ لُدٍ قٌرِ، عَ عَ دَقُ نَ عٌلِوِ بِلِ قَنيِ مَ، عٍ نُن نَشَن كٍرٍن عَ رَ.
25 ﭑ نفَشَكٍرٍنيِيٍ، ﭑ وَشِ نّ وٌ شَ يِ فُندٌ كٌلٌن، عَلَكٌ وٌ نَشَ وٌ يّتّ مَحْشُن لْننِلَيٍ رَ. عِسِرَيِلَكَيٍ بْحّ بَلَنشِ نّ سِندٍن، هَن بٍينُن سِ فبّتّ دَنشَنِيَتْييٍ كْنتِ شَ كَمَلِ.
26 نَ كُي، عِسِرَيِلَ بِرِن قَمَ نّ رَكِسِدٍ، عَلْ عَ سّبّشِ كِ نَشّ؛
«مِشِ شُنسَرَ مَ قَمَ نّ كٍلِ سِيٌنِ،
عَ يَشُبَ بْنسْي بَ عَلَ كٌلٌنتَرٍيَ قْشْ رَ.
27 سَاتّ نَن نَ كِ ﭑ نَشَن تٌنفٌمَ عٍ بّ،
ﭑ نَ عٍ شَ يُنُبِيٍ شَقَرِ لْشْ نَشّ.»
28 يُوِقِيٍ تٌ تٌندِشِ عَلَ شَ شِبَارُ قَنيِ رَ، عٍ قِندِشِ عَلَ يَشُييٍ رَ وٌ تَن نَن مَ مُنَقَنيِ شَ قٍ رَ. كْنْ عَلَ تٌ عٍ سُفَندِ عَ يّتّ بّ، عَ عٍ شَنُشِ عٍ بٍنبَيٍ نَن مَ قٍ رَ،
29 بَرِ مَ شَ عَلَ بَرَ عَ حَنِفٍ عَ شَ مِشِ ندٍيٍ شِلِ، عَ شَ عٍ بَرَكَ، نَ قٍ مُ كَنَمَ قٍوٌ!
30 سِنفٍ رَ نُ وٌ نُ قِندِشِ عَلَ مَتَندِلَيٍ نَن نَ، كْنْ يَكْسِ وٌ هِننّ سْتْشِ يُوِقِيٍ نَن مَ عَلَ مَتَندِ سَابُي رَ.
31 عٍ تَن بَرَ قَ قِندِ عَلَ مَتَندِلَيٍ رَ عَلَكٌ وٌ تَن شَ هِننّ سْتْ عَلَ يِ، نَ شَنبِ، عَ مَن شَ هِننّ عٍ قَن نَ.
32 نَ كُي، عَلَ بَرَ عَدَ مَ بِرِن لُ تِنشِنتَرٍيَ شَ نْي بُن مَ عَلَكٌ عَ شَ هِننّ عٍ بِرِن نَ.
عَلَ بَتُي
33 عٍٍ! دَنيِ مُ نَ عَلَ شَ مُنَقَنيِ مَ!
عَ شَشِلِ نُن عَ شَ قَهَامُي تِلِنيِ دَن مُ نَ!
عَ شَ نَتّ تٌنفٌشِ كُي مُ كٌلٌنمَ،
عَ حّرّ كِ مُ قَهَامُمَ!
34 ندٍ مَرِفِ شَ مَحْشُنيِ كٌلٌن؟
ندٍ نْمَ عَ رَ سِدٍ؟
35 ندٍ بَرَ عَ دٌنِ،
عَ نَشَن شَ دٌنِ رَفبِلٍنمَ عَ مَ؟
36 سٍ بِرِن كٍلِشِ عَ تَن نَن مَ،
سٍ بِرِن بَلٌشِ عَ تَن نَن سَابُي رَ،
عَ سٍ بِرِن دَاشِ عَ يّتّ نَن بّ.
تَنتُي نَ عَ بّ عَبَدَن! عَمِنَ.