3
عَلَ شَ كِرَ
1 شَ نْندِ نَ عَ رَ، وٌ نُن عَلَ شَ مِشِ سُفَندِشِ نَن بِرِن نَكٍلِشِ قَشّ مَ، وٌ شَ عَرِيَننَ قٍن، عَلَ شَ مِشِ سُفَندِشِ مَفٌرٌشِ عَلَ يِرٍقَنيِ مَ دّننَشّ.
2 وٌ شَ عَرِيَننَ قٍ قٍن، دُنِحَ قٍ مُ عَ رَ.
3 بَرِ مَ وٌ بَرَ قَشَ، وٌ شَ سِمَيَ قَ نْشُنشِ عَلَ شَ مِشِ سُفَندِشِ شَ قٍ عِ عَلَ شَ قٌنِسِرٍيَ كُي.
4 وٌ رَكِسِمَ عَلَ شَ مِشِ سُفَندِشِ نَ قَ، وٌ قَن لُمَ عَ شَ نْرّ نَن كُي.
5 نَ نَن عَ تٌشِ وٌ لَنمَ وٌ شَ عَدَ مَدِ شَ قٍ كٌبِ بِرِن نَبّحِن؛ يّنّ قٍ، لَنفٌي قٍ، قٍ سّنِيّنتَرٍ، كٌرِنتٍحَ نَشَن مَنِيَشِ كُيٍ بَتُقٍ رَ.
6 عَلَ شْنْمَ نّ نَ قٍ مْولِ مَ، نُن نَشٍيٍ عٍ رَبَمَ.
7 سِنفٍ رَ نُ، وٌ يَتِ نُ حّرّ مَ نَ كِ نّ.
8 كْنْ يَكْسِ، وٌ شَ يِ قٍ بِرِن بّحِن؛ بْحّتٍ، فٍرٍ سٌقٍ، قٍ حَاشِ، مِشِ شِلِ كَنَقٍ، نُن كٌنبِ.
9 وٌ نَشَ وُلٍ قَلَ وٌ بٌرٍ بّ. وٌ بَرَ نَ حّرّ كِ قٌرِ بّحِن،
10 عَلَكٌ وٌ شَ حّرّ كِ نّينّ سُشُ، نَشَن لَنمَ عَلَ حّرّ كِ مَ. نَ كُي، وٌ قَمَ عَلَ كٌلٌندٍ عَ قَنيِ رَ. نَ بِرِن لُمَ عَلْ مِشِ نَشَن دُفِ قٌرِ بَمَ عَ مَ، عَ دُفِ نّينّ رَفٌرٌ عَ مَ.
11 نَ كُي، فِرّكِ نُن يُوِقِ عٍ بِرِن كٍرٍن. مِشِ سُننَشِ نُن مِشِ سُننَتَرٍ عٍ بِرِن كٍرٍن. شُنُنتَرٍيٍ، مِشِ شُنُنشِ، كٌنيِ، نُن لَسِرِ، عٍ بِرِن كٍرٍن. عِسَ نَن قِندِشِ عَ بِرِن نَ، عَ مَن نَ عَ بِرِن عِ.
12 عَلَ وٌ تَن نَن سُفَندِشِ، وٌ بَرَ قِندِ سّنِيّنتْييٍ رَ، عَلَ شَنُنتٍنيِيٍ. وٌ لَن نّ وٌ شَ كِنِكِنِ مِشِ مَ، وٌ بْحّ شَ قَن، وٌ شَ وٌ يّتّ مَفٌرٌ، وٌ بْحّ شَ بّشِ، وٌ شَ دِحّ.
13 وٌ شَ وٌ بٌرٍ سُتُرَ، وٌ مَن شَ هِننّ وٌ بٌرٍ رَ. شَ مِشِ ندٍ بَرَ قٍ حَاشِ رَبَ عَ بٌرٍ رَ، نَ كَنيِ شَ دِحّ عَلْ عَلَ شَ مِشِ سُفَندِشِ دِحّشِ وٌ مَ كِ نَشّ.
14 نَشَن دَنفِ عَ بِرِن نَ، وٌ شَ وٌ بٌرٍ شَنُ بَرِ مَ نَ قِندِ مَ لَنيِ قَنيِ رَ.
15 عَلَ شَ مِشِ سُفَندِشِ نُ وَ مَ لَنيِ نَشَن شْن وٌن بّ، وٌن بْحّ شَ بِرَ نَ لَنيِ قْشْ رَ. عَلَ بَرَ وٌ شِلِ وٌ شَ قِندِ قَتٍ كٍرٍن نَ، لَنيِ شَ لُ وٌ تَفِ. وٌ شَ عَلَ تَنتُ نَ مَ.
16 عَلَ شَ مِشِ سُفَندِشِ شَ مَسٍنيِ قَنيِ شَ لُ وٌ بْحّ كُي. وٌ شَ وٌ بٌرٍ شَرَن، وٌ مَن شَ مَرَ سِ نُن لْننِ قِ وٌ بٌرٍ مَ. وٌ شَ نَ رَبَ سُوكِ نُن بّيتِ رَ نَشَن قَتَنشِ عَلَ شَشِلِ سّنِيّنشِ رَ. وٌ شَ عَلَ تَنتُ نَ بّيتِيٍ رَ، عٍ شَ كٍلِ وٌ بْحّ يَتِ يَتِ نَن كُي.
17 وٌ قٍ نَشَن بِرِن قَلَمَ، وٌ قٍ نَشَن بِرِن نَبَمَ، وٌ شَ نَ بِرِن نَبَ وٌ مَرِفِ عِسَ شِلِ رَ. وٌ شَ بَبَ عَلَ تَنتُ عِسَ سَابُي رَ.
دٍنبَيَ سّرِيّ
18 فِنّيٍ، وٌ شَ لُ وٌ شَ مْرِيٍ شَ يَامَرِ بُن مَ، عَلْ مَرِفِ وَ مَ عَ شْن مَ كِ نَشّ.
19 شّمّيٍ، وٌ شَ وٌ شَ فِنّيٍ شَنُ، وٌ نَشَ حَاشُ عٍ رَ.
20 دِ مّدِيٍ، وٌ شَ وٌ بَرِ مِشِيٍ شُي رَتِنمّ قٍ بِرِن كُي، بَرِ مَ نَ رَقَن مَرِفِ مَ.
21 بَرِ مِشِيٍ، وٌ نَشَ وٌ شَ دِيٍ بْحّ رَحَاشُ عٍ مَ، عَلَكٌ لِمَنِيَ نَشَ بَ عٍ يِ.
22 كٌنيِيٍ، وٌ شَ وٌ مَرِفِيٍ شُي بِرِن نَتِنمّ. وٌ نَشَ وَلِ عٍ يَ تٌدٍ شَ فبَنسَن نَ، عَلَكٌ وٌ شَ رَقَن مِشِيٍ مَ. وٌ شَ وَلِ عٍ بّ وٌ بْحّ قِيشّشِ رَ، بَرِ مَ وٌ فَاشُشِ وٌ مَرِفِ عَلَ يَ رَ.
23 وٌ قٍ نَشَن بِرِن نَبَمَ، وٌ شَ عَ رَبَ وٌ بْحّ قِيشّشِ نَن نَ، عَلْ وٌ عَ رَبَمَ مَرِفِ بّ كِ نَشّ. وٌ مُ عَ رَبَمَ مِشِيٍ شَ بّ.
24 نَ كُي، وٌ شَ عَ كٌلٌن مَرِفِ نَ سَرٍ رَفبِلٍنمَ نّ وٌ مَ، نَشَن قِندِ مَ وٌ كّ رَ. وٌ نَ وَلِقٍ عَلَ شَ مِشِ سُفَندِشِ نَن بّ، وٌ مَرِفِ يَتِ يَتِ.
25 نَشَن قٍ كٌبِ رَبَمَ، مَرِفِ نَ قَن سَرٍ رَفبِلٍنمَ نّ عَ مَ. مِشِ بِرِن عَ فبٍ سْتْمَ نّ، عَلَ مُ مِشِ يٌ رَقِسَ عَ بٌورٍ بّ.