11
1 Dadi bila maꞌ nituꞌ, tinolikudan taꞌ buan gidoy nog Mikpongon og pigotowan non? Ondaꞌ da. Poꞌ akon og gotow Israel u tanan bu og pangkat ni Apuꞌ Abraham bianan sog kipongkatoy u dia ni Apuꞌ Benjamin.
2 Og Mikpongon, ondaꞌ non tolikudoy og pigotowan non nog piniliꞌ non tidu sog donsamaꞌ. Poꞌ kosunan niu da og taluꞌ nog polomolatas kituꞌ nog taluꞌ nog Mikpongon nog si Iladya nog sinulat dia sog Kitab. Sinumbung non og salu bansa non nog Israel dia sog Mikpongon. Maꞌ long non dun,
3 “Pogbayaꞌ, pimunuꞌ nilan og polomolatasanan nika, bu linoglag nilan og pogbotangan nog pomalas nilan dianika. Sala u da misamaꞌ, bu boyaꞌan bunuꞌon nilan tanan bosia akon dun.”
4 Kosunan niu dosop bog olo tabal nog Mikpongon dia ni Iladya nog sinulat sog Kitab,
“Sinumamaꞌ u lagaꞌ pitu ngibu kotow og pigotowan ku nog daꞌ poktamuy dia ni Baal.”
5 Dadi, domikian da maꞌ nog numun koni, ngon dosop og sinamaꞌ nog Mikpongon poꞌ pimiliꞌ non sabap sog tulung non kituꞌ.
6 Konaꞌ poꞌ sabap sog ginang nog gotow, sugaꞌid non, sabap da sog tulung non kituꞌ. Poꞌ somoꞌ tulungon non og gotow sabap sog ginang non, og maꞌana non, konaꞌ na og tulung.
7 Dadi, olo ma doksuꞌan nog poktoluꞌon koni? Og ponontongon nog gotow Israelanan nog minsan landuꞌ kopogapas nilan monontong dun, daꞌ nilan kalap. Saka, og duma nilan kituꞌ nog piniliꞌ nog Mikpongon nog mingandol dianon, mikalap ilan dun. Ain daꞌ kituꞌ pokalap dun, mitogas og pusung nilan.
8 Poꞌ maꞌ nini sinulat sog Kitab,
“Sabap sog Mikpongon, miimung miglokobol og pikilan bu pusung nilan boyaꞌan og mata nilan ondiꞌ mokotongow bu og tolinga nilan ondiꞌ mokodongog asta pa sog numun koni.”
9 Bu maꞌ nini dosop og pongoningoni ni Dabid nog sinulat sog Kitab,
“Solian nilan mogloliag sog kologyaꞌan nilan, motaban ilan bu mangka kukpaꞌoy. Modogdag ilan bu kosuliꞌan ilan nog kolaton nilan.
10 Molamong mata nilan boyaꞌan nog ondiꞌ ilan mokotongow, bu mogbokutut ilan mogbaba nog sinsaan asta sog daꞌ kopus non.”
Og paꞌali sog kogawon nog ain konaꞌ Hudyu
11 Dadi, bila maꞌ nituꞌ nog mikpogbuksak ilan ma, mibuksak ilan notaꞌ gidoy boyaꞌan nog diꞌ ilan na motabang dun? Ondaꞌ da. Sugaꞌid non, sabap sog dusaanan nilan koyon, og tabang midopot na minsan sog gotowanan nog ain konaꞌ Hudyu. Bu saꞌan ituꞌ maꞌ nituꞌ, poꞌ bagun dosop og gotow Hudyuanan koyon, mima ilan dun.
12 Dadi, bianan sog dusaanan nog gotow Hudyuanan bu bianan dosop sog kosimoy nilan sog glegan nog Mikpongon dianilan, miimung mosolag popia sog duma gotowanan nog konaꞌ Hudyu. Tibua, bila midopot na og dakol nog gotow Hudyuanan nog misunuꞌ na kogawon dianilan tidu sog dusa, labi pa dituꞌ og popia dia sog gotowanan.
13 Og poktoluꞌon ku koni dianiu, nog ain konaꞌ Hudyu. Akon, sinuguꞌ u mogustal dia sog gotowanan nog konaꞌ Hudyu. Bu monamal u mogustal dianiu.
14 Poꞌ gomonsunoy sabap sog suguꞌan koni dianakon, mima og salu bansa u dun nog Hudyu boyaꞌan ngon tanan mogawon dianilan tidu sog dusa.
15 Poꞌ bianan sog daꞌ ilan kodukakit dun solianlian sabap sog kopongmungyas nilan, og gotowanan nog konaꞌ Hudyu, miimung nog mitiguliꞌ ilan dun dia sog Mikpongon. Tibua, bila modopot na nog modukakit ilan sabap sog tud nilan sog Mikpongon, mamaꞌ ilan na nog mitubuꞌ tidu sog patoy.
16 Ibalat da sog kopogimung nog pan, bila ngon sotibuk og pan, saka og putuk non koyon bogoyon sog Mikpongon, asta pa og samaꞌ non koyon ion na dun. Bu domikian dosop sog gamut nog kayu, bila og gamut non binogoy na sog Mikpongon, asta glam nog pangaanan nog kayu koyon, ion na dosop dun.
17 Bu ibalat dosop sog kayu nog pimula, bila ngon panga non nog sinopek poꞌ suklian nog len panga tidu sog len kayu nog konaꞌ pomulan, motubuꞌ dosop dion og len panga koyon. Dadi, amu koyon domikian da maꞌ nog pangaanan nog kayu koyon nog konaꞌ pomulan. Pisolabuk amu na dia sog gamut nog kayu koyon nog pimulan. Dadi bila maꞌ nituꞌ, miksolabuk amu na nog kotubuꞌ. Poꞌ og gotow Hudyuanan koyon domikian da maꞌ ilan nog kayu kituꞌ nog pimula.
18 Dadi, naꞌ niu tokodoy ilan poksudiꞌan nog mikpoksopek ilan domikian maꞌ nog pangaanan. Naꞌ amu mogbonsag poꞌ sagya panga amu da. Bu kosunan niu konaꞌ og panga mokpotubuꞌ sog gamut, sugaꞌid non, og gamut mokpotubuꞌ sog panga non.
19 Dadi, sumboy dosop daꞌidun momikil nog saꞌan sinopek og pangaanan kituꞌ poꞌ bagun ion posuklion dun.
20 Minsan siꞌoy motud nog sinopek ilan, sabap da sog kopongmungyas nilan dia sog Mikpongon. Dadi, saꞌan mikosukli amu, sabap sog kopongandol niu dia sog Mikpongon. Dadi, sumboy popogonon niu og kopongandol niu bu ondiꞌ amu mogbonsag dun, sugaꞌid non, kondok amu.
21 Poꞌ bila og Mikpongon, pingawaꞌ non og gotow Hudyuanan nog saka ilan domikian da maꞌ nog tantu panga nog batang nog kayu koyon nog pomulan, labi na amu nog konaꞌ Hudyu, pongowaꞌon non dosop amu.
22 Dadi sabap dituꞌ, motongow ta og glolat bu kopihit doma nog Mikpongon. Ompihit ion dia sog ain mibuksak sabap sog kopongmungyas nilan dianon. Bu mololat ion dianiu, bila kobon non dia amu da sog glolat non. Bila ondaꞌ amu sog glolat non, amu siꞌoy gomonsunoy sopekon non dosop.
23 Bu og gotow Hudyuanan siꞌoy, bila lumotaꞌ ilan na momungyas dia sog Mikpongon, moksud dosop glolaman nog Mikpongon dianilan. Poꞌ og Mikpongon moto tumiguliꞌ dianilan.
24 Poꞌ amu og gotowanan nog konaꞌ Hudyu, domikian da maꞌ nog panga nog len kayu nog konaꞌ pomulan. Bu tidu amu sopekon, pitapek amu nog Mikpongon dia sog batang nog kayu koyon nog pomulan. Saka, mologon bosia potopekon. Tibua, molomu da potopekon puliꞌ bila og tantu panga non da og sinopek dituꞌ.
25 Dadi pigilugan, og piktaluꞌ u koni mologon ta bosia sobuton. Tibua, piosun ku na dianiu bagun niu da mosabut, bu bagun dosop diꞌ amu mogbugalbugal dun. Poꞌ mitogas og pikilan nog kodokolan nog bansa Hudyu dia sog Mikpongon asta kotoktuban og dakol nog gotowanan sumolabuk dia sog Mikpongon nog ain konaꞌ Hudyu.
26 Dadi sabap dituꞌ, og glam nog bansa Hudyu mogawon tidu sog dusa. Poꞌ maꞌ nini sinulat sog Kitab,
“Og Polonabang matong tidu sog bonua nog Sion. Pongowaꞌon non glam nog kohinangan nog sinoitan nog pangkatanan ni Apuꞌ Jakub kituꞌ.
27 Koni og pasad u dianilan sog tang nog pongowaꞌon ku glam nog dusaanan nilan.”
28 Dadi maꞌ nituꞌ siꞌoy, solian numun koni paꞌali sog Gombaꞌis kituꞌ nog Guksugan, og gotow Hudyuanan miimung nog banta nog Mikpongon bagun da molakit ain konaꞌ Hudyu nog mamaꞌ niu sog pigdotuꞌan nog Mikpongon. Tibua, paꞌali sog kopiliꞌ nog Mikpongon sog bansa Hudyu, ilan dodaꞌ og kololaman non sabap sog pasad non sog mokogulanganan kituꞌ kobon nituꞌ.
29 Poꞌ og Mikpongon, ondiꞌ non sopon og pikilan non paꞌali sog piniliꞌ non kituꞌ otawaka popia non sog gotowanan.
30 Dadi, amu nog konaꞌ Hudyu, dini kituꞌ mingantu amu sog Mikpongon. Tibua numun koni, kilolatan non na amu sabap sog pongantu nog gotow Hudyuanan kituꞌ dianon.
31 Sabap sog glolatan nog Mikpongon sog ain konaꞌ Hudyu, miimung mingantu og Hudyuanan dun bagun ilan dosop kololatan nog Mikpongon.
32 Og maꞌana non, glam nog gotow inimung non maꞌ nog binilangguꞌ sabap sog kopongantu nilan sog Mikpongon bagun da ompotongow nog Mikpongon og glolatan non dia sog glam nog gotow.
Sanglit sog Mikpongon
33 Og kolongas nog Mikpongon ondiꞌ mubadubad sog ponoluꞌon. Bu og kotoan bu sabut non, daꞌidun mokadal dun. Ondiꞌ mustal og glegan non. Bu daꞌidun dosop mokosabut
34 nog pondayan non. Poꞌ maꞌ nini og sinulat sog Kitab,
“Sima gidoy buan mokosabut nog pikilan nog Pogbayaꞌ? Sima gidoy buan mokopomali dianon?”
35 “Sima gidoy buan mikopogbogoy sog Mikpongon nog sumboy sugdaan ion nog Mikpongon dun?”
36 Poꞌ ion og Mikpongon nog glam non. Dadi, glam nog piongon, miongon bianan dianon, bu glam non ion da dun. Dadi, dia non og sanglit, bu gadab, bu kotas asta sog daꞌ kopus non. Amen.