11
1 To ko pekam tok, E Nut ten ke ho to enang a kop ngang dok kam kol a tong mang o tgoluk orom. Va ta havaeng dok te, “Ngiak ngae he kol a tong mang E Nut ka maksien va mang a psen to a totur kat. Va ngiak him o mia ruk ngma totu pum E Nut kam mnor mang ngar te, mar aner.
2 Ngiak kaeharom tok, vanangko ngior kam kol a tong mang E Nut ka maksien ka mhe to ko ma gi vle ku mnok mang Ka Taban To A Totur. Orim a mhe to endo, ekam ko E Nut ther en a mhe to endo ngang o vrong rhek. He her endruk arhe ngara pis kmus kar a rengmat to a totur he karkar mang kngongae kam ngae kais mo kenho ruk alo mhelom alomin hori orom alomin he kmemget krum kim hak.
3 Ii, va kun mnam a venloot to endo, ngor kaen a serppak ngang kualo mhel ruk nginak hahavae orom kuaro rhek, va nginera vor pa ngaor kam mrung o mia to kle khahavae orom kuaro rhek kngae kais ko ngak rum a venloot to endo tgus.”
4 Alo mhel ri, ennginduk alo ho ruk ngma mon min te, alo Olip, ennginduk a propet ta tootkinre mang ngin tennik. Va min alo krie alomin kat, ennginduk orom o mmok ruk aktiek hori orom alomin ko nginma sir ko kim E Nut to ka tavgo ta vle kuo mang a mmie tgus.
5 Ii, he enangthe a mhel tang na kaegom kam kering tang mnam min, va nginera rum kim ngina imuo to endo orom a paei ko ner kottek kun mnam nginalo gu he kaem krum tgus hak. Ii, ani vrong mhel to tre kam kering ngin tok, E Nut tmur el a paei to endo kam mi kut paneng en kam rum kim ekam tok kngam a yoror.
6 Va alo mhel ri ngina serppak, min kam vat o varhek orom, he nang a kus kam lo kat kaerik kat kun mnam a venloot to nginak hahavae mang E Nut karo rhek. Va ngina serppak kat, min kam hortgem o itok kam nho enang a mhel ka gidiel kat. Va ngint kais kmim a mmie orom o vrong yor ruk laol hak kun mnam o gi vrong kolkha kmikkiem nginalo gi svil kat.
7 Nginak hahavae lmien orom E Nut karo rhek knop, yek a ngaenkuo to naka grap kottek kun mnam a mmie ka ho ngaesik hak, na kaus kar min, kir kim min he kngam min alo yoror.
8 Va nginalo mnes nginer gia konit ku mmie kun mnam a rengmat to endo orom ka munik to alaut ko tok ko ngat im Nginlaip kat ko ngat krong orom o ot kvat engnang a ho kngam en a yoror tok kat. Ii, he ekam tok, ngma tootkinre orom a rengmat to endo kam mon orom a rengmat to e Sodom ka munik va a mmie ka mhe to e Isip ka munik kat.
9 Nginer gia vle lonit ku mmie kam ngae kais mo kolkhek ruk korlotge va ka mhe ko o mia ruk ngat pal mnam o vrong valngan, o vrong usiel, o vrong rhek ko mnam o vrong marhok tgus ngara kees kmeguyang nginalo mnes, nang kle gia vle keter min ko tok.
10 Ii, o mia tgus ruk mo mmie ngara kpiem min ko tok he ksirei to kle knovvur orom min. Ii, ngara sirei he kmo nngiar mo ngar ekam ko alo propet ri nginma mon o mia orom ngaro kerkeknen he kael mar tgus ma kernonhommok orom ngaro kerkeknen ruk nginma mon mar orom mar tok.
11 Vanangko ko pekam o kolkhek ruk korlotge va ka mhe ko nginaka vle lonit ku mmie tok, ko vokom ko E Nut ta kta klang ngin ma ngausgi kat he min tgus nginta kta hop ksir. Va a ho pagor hak tkomor endruk tgus ruk ngat vokom min.
12 Ngint hop to ngint kol a re langto ko vgum E Nut ko ta rere klik kuon ma volkha ko thavaeng ngin te, “Me aol ka grap mo kim dok.” To nginta grap kuon ma volkha kun mnam o varhek. Va nginaro imuo ngat vokom min ko nginta grap tok.
13 To ko vokom kat ko mnam a venloot to endo gi, a mmie ta khi klik hak va enangthe ipa kommen o rektor tgus ruk kun mnam a rengmat to endo kmel mar o murgun ruk loktiek va o rektor tgus mnam a murgun to atgiang mnam mar ngat vuvuut ku mmie. Va o mia kavurgem kavurgem ruk ngat kais mang te, 7,000 ngat yor vgum a mmie ko ta khi klik tok. Nang endruk ngat lo yor, ngat mia gor hak to kle khover E Nut to kuon ma volkha ka munik.
14 To a tomhel to alomin orom kam suvrum o mia vgum, ther nop kat he. Vanangko endo a korlotge orom ngnok vop, he ketasuo en kam pis.
A Engyel To Aktiek Hori Orom Alomin Orom Thupum Ka Nglung
A Tomhel To A Korlotge Orom Kam Suvrum O Mia Vgum
15 To ko pekam o tgoluk ruk endruk ko vokom a engyel to aktiek hori orom alomin orom ko thupum ka nglung kat. Thupum to o engyel ruk kuon ma volkha ngat kaelha kam kni klik te,
“Ngoldaip to E Nut kar Endo Thim Orom Ka Msasaen ngint kir kim o vrong serppak tgus ruk mo mmie. He tete, nginalo serppak mruo tkomor mar tete kngorom kngorom.”
16 Va o hipun ruk a mhelom hori orom korlolo, endruk ngat korsang kuon mang ngaro ngorsang ko kim E Nut, ngat ngan ko o engyel ruk endruk ngta kni tok, to ngat mur kru ka vham ku mmie kam totu pum E Nut
17 kam kni pum te,
“Her Ngoldaip E Nut To La Ho Vu Ngaurar Hak to yin arhe. Ngota kanprim yindo a plong vleir tennik, va tete tok kat ge. Ngota kanprim yin ekam ko ye her elha orom ila tavgo kam vle kuo mang o tgoluk tgus.
18 O vrong rhek ruk ngam lua totu pmin, ngat pu esik ngang in, vanangko ila ngaesik mruo ther mi pis ma mmok ge. Ko a venloot to kam momngan kar o yoror va kmen a keik ngang ilengunes ruk o propet ther pis he. Va endruk ye mur el mar kam vle ngang in mruo va endruk ngma totu pmin, endruk orom ngaro munik ruk laol va endruk nong ngaro munik ngang ngar kat, va a venloot to kmen o momgu ngang ngar tpis kat. Ii, va si o taven ruk ngat kering o mia ruk mo mmie, va a venloot to kam kering ngar ther pis tok kat he.”
19 To pekam ko o hipun ngat kanprim E Nut tok, ko vokom E Nut ka maksien Ka Taban To A Ho Totur Hak, endo kuon ma volkha ko E Nut ta pet a yet to nam kaeltom kalo taban ruk alo totur, he ko vokom a ngaelpas to ngat klang orom o tgoluk ruk E Nut ta mokpom kar o mia ormar, endo o Yuda ngma mon te, A Ngaelpas To Kam Pat Mang E Nut Ka Mokpom Kar Mar. E Nut tpet a yet knop, to a koot tkaelha kam gurmik klik kngae, he kullung klik kngae, va a mmie ta kakhi klik he kael ka muktim to klalaut hak kngae, va a kus tkaerik orom a ye to tvua serppak ko tvua menglol hak.