4
O Papat Ruk O Mia Ngat Kais Kmikkiem Mar Kam Mnorvek Pum Endo E Nut Thim Orom Ka Msasaen
1 Kolenar ruk kom vu kaelongtok mang nguk, mguak or kam gi vrong kolaspa kam gi vrong kor mnam muk mang o gi vrong serppak ruk mkor o vrong mia va o vrong tgoluk e. Mguak or tok! Vanang mgua kle va sim ktua nho kun mnam mar na, kmegom mar kam mnor mang oni vrong serppak te, ngat ottek kuon kim E Nut, i o nop. Kua re tok, ko o propet kavurgem ruk la ppiagar ngat her ngae he ngrok tete he. Va ngta khanang ngar kam vraik orom mularo papat petgim E Nut kat.
2 To mut kais kam mnorvek pum endruk ngat pal mnam E Nut ka ngausie ka pun vgum E Nunu A Totur nngia? Mguer ktua mnorvek pum mar ko ani serppak to a mhel tkaeha kngae orom, va a mhel to endo na mrua havae ma mmok mang en mruo orom te, tkor mnam en mang e Yesus te, en her Endo E Nut Thim Orom Ka Msasaen he tmur ellik orom enang a mi mhel msim. He ani mhel to ta ngarngar mang e Yesus orom ka serppak to tok, mguer kais kam ktua mnorvek pum kat te, a serppak to a mhel to endo tkaeha kngae orom enang tok tkottek ekam E Nut.
3 Vanang ani serppak to a mhel tkaeha kngae orom kam klai mang e Yesus ko thavae te, en nong Endo E Nut Thim Orom Ka Msasaen, va mut kais kam kle ktua mnorvek pum a serppak to endo kat ge te, en tlo ottek ekam E Nut e. A serppak to ta kpom a mhel to endo tok, ta kle mrua ppiak kmelel en mruo vat te, en Endo E Nut Thim Orom Ka Msasaen. He enang tok, a mhel to endo nma sir malngaeng Endo E Nut Thim Orom Ka Msasaen lsir. Mare, o mia ruk endri nong te, muta ngnek mang ngar her gi tete yek e, te ngara pagis. Nove. Muta ngnek mang ngar vur ktar he. To tete muta vokom anito he? He her o mia ruk endruk ngta vle kngae kun pgegom o mia tete he.
4 Vanang muk ruk koma kvam muk te, koles ruk kom kaelongtok mang nguk, mut her pal mnam E Nut ka ngausie ka pun he. He ekam tok, mut her kok kikir kim akro propet la ppiagar ruk endruk ekam ko E Nut to ta kha orom muk ko tel rengmat kun mnam muk, En a ho mi kut serppak to a ngaurar hak, he her Endo arhe tkir kim e Seten to nam kaenen o mia ruk mo mmie kmeharom o kerkeknen.
5 Yu, va akro propet ruk la ppiagar ruk endruk, ngat pal ekam a serppak to mkor e Seten to nam kaenen o mia kmeharom o kerkeknen ruk endruk mo mmie tok kat arhe. Mare, he ngartaro rhek ngat ottek mnam o papat ruk nkong ngar mo mnam a mmie to enda kat gi. He ekam tok, akro propet ruk la ppiagar ruk endruk ngama rere mang anito anito, va ngartaro mia mruo, endruk nga pun to mar, ngam ktua ngan vgum mar ge.
6 Vanang mor, mor ngot kle kut pal mnam E Nut ka ngausie ka pun he. He ani mhel to nama ngan vgum mor, a mhel to endo nam mrua khenam en mruo ma mmok tok te, a mhel to endo ta mokpom kar E Nut. Vanang ani mhel to nam lua ngan vgum mor, va en ta kle va mrua khenam en mruo ma mmok tok kat ge te, tlo pal mnam E Nut ka ngausie ka pun. Ii, he ekam tok, o mia mruo ngam mrua khenam mar mruo ma mmok tok he ngot kais kam ktua vokom mar ka mnor mang ngar ge te, endrim mnam mar ngat pal mnam a serppak to a minar to mkor E Nunu A Totur, va endrim mnam mar ngat pal mnam a serppak to la ppiagar to mkor e Seten.
A Keknen To Kmelongtok Mang O Mia Tottek Ekam E Nut
7 Kolenar ruk kom kaelongtok mang nguk, ekam ko a keknen to kmelongtok mang o mia ka pun ko mkor E Nut, mor he, ngruak mo kaelongtok mo kmor. Ko o mia ruk ngam kaelongtok mang o mia ngam mrua khenam mar ma mmok te, ngat pal mnam E Nut ka ngausie ka pun he kmokpom kar En.
8 Vanang a mhel to tlua kpom a keknen to kmelongtok mang o mia, a mhel to endo ta kle mrua khenam en mruo ma mmok kat te, en tlo pal mnam E Nut ka ngausie ka pun he lua mokpom kar En e. Ii, va ngot kais kam mnorvek pum a mhel enang tok, ekam ko E Nut ka keknen to kmelongtok mang o mia, tmur kut vle orom En mruo.
9-10 To E Nut mruo tmur khenam ka keknen to kmelongtok mang o mia ma mmok he tel mit kun pgegom o mia nngia he? E Nut ta khenam te, nam kaelongtok mang o mia ko tmeng Khal msim to ke tro kam pis kar mo mmie he kliepum mor kam yor, he nang mor kam kle kol a ktalhok to kam plong vle ko kim En ngnik ngnik vgum en tok. Ii, to E Nut ka keknen to kmelongtok mang o mia ka her mimit to arhe E Nut mruo ta khenam ngang ngor orom Khal msim. Vanang nong mor ruk ngota ktar elongtok mang En e, nove. Parem ko, her E Nut to arhe ta ktar pakvom kmelongtok mang ngor ko tpet la vnek kuon mang ngor kam mur en Khal mruo kam yor mang ngor, yek Khal kam ngam menglol mnam E Nut ka vrek, he nang E Nut kam lol nguaro kerkeknen ruk ngom kaeharom mar patgiang ngaiting he kikiangae mang ngar hak.
11 Yu, he kolenar ruk kom kaelongtok mang nguk, ekam ko E Nut tngae sei kmelongtok mang ngor kmeharom enang tok, va mor he, ngruak kolkol ekam En he mo kaelongtok mo ngor tok kat.
12 Pu lmien te, a mhel tang tlo mi vokom E Nut kalo keik vop, vanangko enangthe ngop mo kaelongtok mo ngor, va ngop kais kam mrua vokom a keknen to endo orom En ko na kael rengmat kun mnam mor. Va enangthe ngop mo kaelongtok mo ngor, va ngot mrua khenam mor mrua ma mmok te, E Nut tmi kael rengmat kun mnam mor ko ta kha orom mor, va E Nut ka keknen to endo ner ho kle klaut kngae ka ngmeang ge kun mnam mor kat.
13 Mare, mor ruk ngot kor mnam mor mang e Yesus he kmokpom kar ngot her mnor he te, E Nut ten E Nunu A Totur ngkun mnam nguaro vurkul kam khenam ngang ngor te, En tmi el rengmat kun mnam mor ko ta kha orom mor va mor kat ngot par mnam En kat.
14 Vanang mor ruk o aposel, tesgun mor mruo ngota vle ko kim e Yesus he mur keketar karo keknen orom nguaro mur kerok mruo. He tete, ngot le khavaeng o mia tgus lmien mang Ngor Teit E Nut te, tmeng Khal msim to endo ngte mmie kam pis kam mi ktua susulgim o mia tgus mo mmie.
15 He ani mhel to ta mrua havae ma mmok mang en mruo te, tkor mang en mang e Yesus te, en E Nut Khal msim he kmokpom kar, va a mhel to endo ta mrua khenam en mruo ma mmok tok te, E Nut tel rengmat kun mnam en ko ta kha orom a mhel to endo va a mhel to endo kat tpar mnam E Nut.
16 He ekam tok, ngot her mnor he te, E Nut ta khenam ngang ngor te, nam kaelongtok mang ngor enang tok, he ngota serppak orom En, En kam kle kaelongtok mang ngor kngorom kngorom ge.
Ii, he E Nut ka keknen to kmelongtok mang o mia tmur kut vle orom En mruo. He ani mhel to tgia vle orom E Nut ka keknen to kmelongtok mang o mia va tmur khenam en mruo ma mmok te, E Nut tel rengmat kun mnam en ko ta kha orom a mhel to endo, va a mhel to endo tpar mnam E Nut kat.
17 To enangthe ngop mo kaelongtok mo ngor, va E Nut ka keknen to enda ner ho kael rengmat kun mnam mor he klaut kngae ka ngmeang ge kun mnam mor kat. Mare, to mnam a kolkha to a kser kim ko ngruak sir ko pum E Nut kalo keik, va ngrer lo kais hak kam ruokar kim E Nut e, ekam ko mnam o kolkhek ruk ngota vle mo mmie vop, ngoma kolkol ekam En kmelongtok mo ngor.
18 He ekam tok, a mhel to nam kaelongtok mang o mia, nam lua kaum ka vle orom a pagor ka mten to nam kaenen ka vrek kam kervavle pum a kapnes to nera kol ko mkor E Nut e. Ko a keknen to kmelongtok mang o mia nam kle va ka tver kim a pagor to mang a kapnes to endo hak. Vanang a mhel to nma kaum ka vle orom a pagor ka mten to endo, a mhel to endo ta mrua khenam en mruo ma mmok tok kat te, en nam lo kaelongtok mang o mia e.
19 He enang tok, ngom gi kael kerok mang kam gi kaelongtok mang o mia ekam ko her E Nut mruo arhe ta ktar elha pum mor kmelongtok mang ngor.
20 Vanang enangthe a mhel tang na havae mang en mruo te, en nam kaelongtok mang E Nut, vanang kle gia vle orom a vrek kiin he gi kaelat knopia langto, o-o a mhel to endo ta mrua mon ppiagam en mruo hak. Ko ta vle te, enangthe na lo kaelongtok mang knopia to tkais kam vokom, to tis nngia kam le kaelongtok mang E Nut to nam lo kais kam vokom?
21 Ii, ta vle tok, ko E Nut mruo tmur en a pos to enda ngang ngor te: Ani mhel to na kaelongtok mang E Nut, na mrua khenam en mruo ma mmok tok kam kle kaelongtok mang o mia tok kat.