10
Na bhaan ba tu aꞌgaꞌ gu Paablo gu Israel kam jaꞌtkam gio gux bhaiꞌm kaiꞌchdham ñioꞌkiꞌñ guch Xoiꞌkam
1 Jiñ jaaduñ jich Xoiꞌkam bhaan, aañ tɨix aaꞌ nam gɨt gu Israel kam jaꞌtkam cham mu jaꞌk bhɨɨyaꞌ nam paiꞌ gammɨjɨ miꞌ pup jum tulhiiñdhaꞌ, tɨi ja aꞌmkam puiꞌ jaꞌk tu daañchuꞌndaꞌ iñ buiñor gu Dios.
2 Jix maat iñ aañ nam gu Israel kam jaꞌtkam tɨix aaꞌ nam gɨt miꞌ puiꞌ xi jiimdaꞌ na jax jix aaꞌ gu Dios, dai ji nam guꞌ cham maat na jax pɨk jaꞌk jum aaꞌ nam miꞌ puiꞌ jiimdaꞌ.
3 Cham tɨ jɨɨgiꞌñ am guꞌ na gu Dios pɨx dɨɨlh nax kɨɨꞌ maaꞌnkam tɨgiaꞌ gu jaroiꞌ, cham tuꞌ na dɨɨlh jix kɨɨꞌ maaꞌnkam jum ɨlhiiꞌñdhaꞌ nam jax tu jim dɨɨlh. Dhiꞌ bhaan baꞌ cham tuꞌ miꞌ puiꞌ jiim am buiñor gu Dios na jax pɨk jaꞌk jum aaꞌ nam miꞌ puiꞌ jiimdaꞌ.
4 Na guꞌ puiꞌ na jɨꞌk jax tu aagix guiꞌ nat Moisees tu uaꞌnak, miꞌ bhaan ji juu buiñor guch Xoiꞌkam. Puiꞌ ku baꞌ gu jaroiꞌ noꞌ buiñor ba tɨ jɨɨgiꞌñ guch Xoiꞌkam, gu Dios puiꞌ ba ɨlhdhaꞌ nar jix kɨɨꞌ maaꞌnkam kaꞌ.
5 Janoꞌ nat gu Moisees tu uaꞌnak na jɨꞌk jax tu aagix, jaꞌpni jaꞌk jup xi chu uaꞌna: “Gu jaroiꞌ na miꞌ puiꞌ jimiaꞌ dhiꞌ na jɨꞌk jax ba tu aagix, dhiꞌ buiñor jimiaꞌ gu Dios.”
6-8 Baꞌ jaꞌp jaꞌk iam nat dhiꞌ pɨx Moisees jup tu uaꞌnak, tu aaꞌ ɨp nam sɨlh pɨx buiñor tɨ jɨɨꞌñdhaꞌ gu Dios nam baꞌ buiñor jimiaꞌ, na guꞌ puꞌñi jaꞌk cham pɨk xijai. Na guꞌ cham jum aaꞌ kiaꞌ nam jax jum aaꞌndaꞌ: Jix xijai na jaroiꞌ mu tɨsdiaꞌx dhaam na baꞌ tɨgiaꞌ gu Dios, piam ku guꞌ mɨjɨmmɨ paiꞌ nam jum jumpaꞌn gu ja iꞌiiꞌmdaꞌ gu koiꞌñgaꞌn na baꞌ mu jaꞌk tɨgiaꞌ noꞌ ampɨk mu jaꞌk oirɨ. Matgɨm guꞌ jaꞌpji sap ja aꞌm nap tuꞌiiꞌ gu ñioꞌkiꞌñ gu Dios, ja chiichiñ am gio ja jujur am. Baꞌ xib dhiꞌ puꞌñi ɨp, gu jaroiꞌ noꞌt jaꞌp pɨx soiꞌm ɨlhdhak buiñor ba tɨ jɨɨꞌñ guch Xoiꞌkam, gu Dios puiꞌ ba tɨgiaꞌ na dhiꞌr jix kɨɨꞌ maaꞌnkam kaꞌ. Cham jum aaꞌ nax xijaim ɨlhiiꞌñdhaꞌ, noꞌ guꞌ jax jum aaꞌ: “Jix xijai nañ mu tɨsdiaꞌx dhaam nañ baꞌ tɨgiaꞌ guch Xoiꞌkam, piam ku guꞌ mu jaꞌk nam paiꞌm jumpaꞌn gu ja iꞌiiꞌmdaꞌ gu koiꞌñgaꞌn noꞌ ampɨk mu jaꞌk oirɨ.” Guꞌ jaꞌpji na guꞌ na jax bam kaiꞌch nach aꞌm jup tuꞌiiꞌ gux bhaiꞌm kaiꞌchdham ñioꞌkiꞌñ guch Xoiꞌkam. Dhiꞌ baꞌr diꞌ gux bhaiꞌm kaiꞌchdham ñiꞌook nach jax chuꞌm bhaan tu aꞌga aach. Puiꞌ ja tɨtdaim ich guꞌ gu jaꞌtkam nax bhaaiꞌ nam soiꞌm ɨlhdhai buiñor ba tɨ jɨɨꞌñdhaꞌ guch Xoiꞌkam, puiꞌ pɨx, cham tuꞌ nam aaꞌ nam tuꞌ pɨk jax dhuñiaꞌ.
9 Naꞌ guꞌ daipuꞌ noꞌ jaroiꞌ dɨɨlh chiñiiꞌñ kɨꞌn puiꞌ ba kaiꞌch na guch Xoiꞌkam jir Gɇꞌkam, gio na bɨɨx juraaꞌn kɨꞌn ba tɨ jɨɨgiꞌñ nat gu Dios pɨx duaꞌñdhak giop bamiiꞌ mu dɨr koiꞌñgaꞌn tɨr, cham tuꞌ mu jaꞌk ka jimdaꞌ na paiꞌ gammɨjɨ gɨt miꞌ pup jum tulhiiꞌñdhaꞌ.
10 Na guꞌ noꞌch bɨɨx jich jur kɨꞌn buiñor ba tɨ jɨɨgiꞌñ guch Xoiꞌkam, gio noꞌch dɨɨlh jich chiñ kɨꞌn puiꞌ ba kaiꞌch nar Gɇꞌkam, gu Dios jix kɨkɨɨꞌ jaꞌtkam bach chɨgiaꞌ, baꞌ cham tuꞌ mu jaꞌk ka jiimdaꞌ ich nach paiꞌ gammɨjɨ gɨt miꞌ pup jich chulhiiñdhaꞌ.
11 Jup jum kaiꞌch guꞌ maaꞌn kap miꞌ na mɨt paiꞌ tu uaꞌnak gu bɨjɨk dɨr kam: “Gu Dios pɨx dɨɨlh puiꞌ tu duñiaꞌ nam cham tuꞌ bhaan jum xiꞌɨꞌrboꞌ guiꞌ nam tuꞌ sɨlhkam soiꞌm ɨlhdhai buiñor tɨ jɨɨꞌñdhaꞌ.”
12 Baꞌ dhiꞌ bɨɨx pɨx ja aagɨt jup kaiꞌch gu jaꞌtkam sia nar jaroiꞌ, cham jax bua noꞌr Israel kam maaꞌnkam piam ku guꞌ cham. Bɨɨx pɨx jir ja Dios tuk guꞌ gu Dios nam jɨꞌk jix jaiꞌch gu jaꞌtkam, baꞌ gɇꞌ makiaꞌ gu tuꞌ gu jaroiꞌ noꞌ soiꞌm ɨlhdhat taan.
13 Na guꞌ jaꞌpnip jum kaiꞌch maakam jaꞌk na mɨt paiꞌ tu uaꞌnak gu bɨjɨk dɨr kam: “Guiꞌ nam jɨꞌk soiꞌm ɨlhdhat buiñor ba tu daandaꞌ gu Dios, guiꞌ dɨɨlh miꞌ dhɨr ba ja boosgaꞌ nam paiꞌ mu jaꞌk jiim nam gammɨjɨ miꞌ pup jum tulhiiñdhaꞌ.”
14 ¿Guꞌ pɨx ji na guꞌ jax jam dui soiꞌm ɨlhdhaip tu dañiaꞌ buiñor gu Dios noꞌm guꞌ cham buiñor tɨ jɨɨgiꞌñ? ¿Gio jax jam dui buiñor jup tɨ jɨɨꞌñdhaꞌ noꞌm cham paiꞌ pu chuꞌm tɇ kɇɇ na tum aꞌga? ¿Gio jax jam dui pu chuꞌm jup tɨ kaayaꞌ noꞌ pu cham jaroiꞌ pu chuꞌm tu ja aꞌgiꞌñ?
15 ¿Gio jax dhuip jaiꞌchdhɨlhiaꞌ gu jaroiꞌ na pu chuꞌm tu ja aꞌgidhaꞌ noꞌ guꞌ gu Dios cham jaroiꞌ pu chuꞌm kɨꞌn naiꞌ jootos? Jup jum kaiꞌch guꞌ maaꞌn kap na mɨt paiꞌ tu uaꞌnak gu bɨjɨk dɨr kam: “¡Jaꞌp moo joidham jix bhaiꞌ tu tatdaꞌ noꞌm paiꞌ dhɨr jiim guiꞌ nam tu aꞌgidhaꞌ gux bhaiꞌm kaiꞌchdham ñioꞌkiꞌñ gu Dios!”
16 Guꞌ ji na guꞌ cham tuꞌ nam moo bɨɨx kɇɇji miꞌ puiꞌp jimiaꞌ na jax jum kaiꞌchdhaꞌ gux bhaiꞌm kaiꞌchdham ñioꞌkiꞌñ guch Xoiꞌkam, jaꞌp na jax jum kaiꞌch miꞌ nat paiꞌ tu uaꞌnak gu Isaiiyas bɨjɨk, jup jum kaiꞌch: “Aapiꞌ Dios, cham jaroiꞌ iam tɨ jɨɨꞌñdhak miꞌ puiꞌ ba ji jii sia ku mɨt tɨi ba kai gux bhaiꞌm kaiꞌchdham jum ñiꞌook.”
17 Na guꞌm aaꞌ na bɨɨpɨꞌ kaayaꞌ gu jaroiꞌ gux bhaiꞌm kaiꞌchdham ñioꞌkiꞌñ guch Xoiꞌkam na baꞌ miꞌ dhɨr bhaiꞌ ji tɨ jɨɨꞌñdhaꞌ bɨɨx juraaꞌn kɨꞌn.
18 Baꞌ aañ dɨɨlh jup jiñ aaꞌndaꞌ: ¿Kux chakui aa chi paiꞌ dhuuk kai mɨt gux bhaiꞌm kaiꞌchdham ñioꞌkiꞌñ guch Xoiꞌkam bɨɨx nam jɨꞌk jir Israel kam jaꞌtkam? Ba kai mɨt ji matgɨm, na guꞌp jum kaiꞌch maaꞌn kap na mɨt paiꞌ tu uaꞌnak gu bɨjɨk dɨr kam:
Bɨɨx kap naiꞌ puiꞌ tum aꞌga gux bhaiꞌm kaiꞌchdham ñioꞌkiꞌñ gu Dios,
na mɨt guꞌ bɨɨx kap ai na jɨꞌx oiꞌñgaꞌn guiꞌ nam puꞌñi naiꞌ tu aꞌga.
19 Guꞌ baꞌ jaꞌp jañ jup jiñ aaꞌ: ¿Kaꞌ guꞌ pu cham maatɨt kɇɇ am aa na tuꞌ bhaan tum aꞌga? Jaꞌpji na guꞌ gu Moisees jup kaiꞌch maaꞌn kap nat paiꞌ tu uaꞌnak bhaankamuꞌn gu Dios:
Aañ puiꞌ ja duñiaꞌ gu Israel kam jaꞌtkam nam ja jɨɨꞌmui bhaiꞌ ji bhaakuꞌ ja bui guiꞌ nam cham jir Israel kam jaꞌtkam,
puiꞌñ ja duñiaꞌ nam ja bhaamkidhaꞌ guiꞌ nam pu cham tuꞌ maatɨt tɇ kɇɇ.
20 Baꞌ jaꞌp jaꞌk gu Isaiiyas jix bhaiꞌ puiꞌp xi kaiꞌch bhaankamuꞌn gu Dios, jup kaiꞌch:
Jiñ chɨɨ mɨt gu jaꞌtkam guiꞌ nam tɨi cham jiñ gaꞌnga,
ja buiñ maax jañich gu jaꞌtkam guiꞌ nam cham jɨꞌx iam paiꞌ dhuuk tɨñ chɨkka.
21 Baꞌ gu Isaiiyas pɨx na bhaankam tu aꞌga gu Dios jup kaiꞌch ɨp na bhaan tu aꞌga gu Israel kam jaꞌtkam: “Aañ bɨx chanoolh muiꞌ tɨi pu ja daagiꞌñ guñ ñob dhi jaꞌtkam, guꞌ ji nam guꞌr jix kaapak, pu cham tuꞌ kaꞌm tɨ nɨiꞌñ am.”