16
1 ’Pu xib dɨr jañ moo xi jam aagiꞌñ bɨɨx dhiꞌ puiꞌ na pim baꞌ gammɨjɨ tɨ jɨɨꞌñdhat aañ jiñ buix biiñak kaꞌ, na pim baꞌ cham buimuk gu maaxdhi jix oodai cham tuꞌ kap jum buixdhaꞌ.
2 Nam guꞌ bhaiꞌ ji jam bhaamkidhaꞌ jia guiꞌ nam bhaiꞌ gɇꞌ chiop ja aꞌmkam ñiokdaꞌ jix dhaam gu jaꞌtkam, noꞌ mɨt ba maat na pim aañ jiñ kaichuꞌ. Maiꞌ jam aadimiaꞌ am noꞌm xi ɨlhiiꞌñ miꞌ dhɨr jam chichiopiꞌ am na pim jax tu daandaꞌ. Gio guꞌ kam aayaꞌ ɨp gu tanoolh nam paiꞌ dhuuk boi jam bhɨichdhaꞌ noꞌ mɨt moop xi ɨlh, puiꞌm xim aagat nam Dios bhaankamuꞌn puiꞌ jam doodaꞌ, nam guꞌ jaꞌp jum aaꞌndaꞌ nam dai guiꞌ miꞌ puiꞌ jiim na jax jix aaꞌ, aapiꞌm baꞌ cham.
3 Guꞌ jaꞌpji nam pu cham jich mat kaꞌ ji nach jir tuꞌp tuꞌm daꞌ gook dɨt guñ Gɨꞌkoraꞌ kum baꞌ puiꞌ jam doodaꞌ, cham tuꞌ nam moo sɨlhkam xich mat kaꞌ.
4 Xib dɨr jañ moo pu ba jam aagiꞌñ, na baꞌ noꞌt puiꞌ ba ji chu jam dooda, ba machiaꞌ pim nañ cham tuꞌ pɨx jap jam tɨtda.
Gu Jesuus na tu aaꞌndaꞌ na jax jaꞌk tu buadaꞌ gux Dhuuduꞌ kam jix Uañ Iiꞌmdaꞌ noꞌ bhaan ba tajaañix gu jaroiꞌ
’Puiꞌ kuñ baꞌ cham paiꞌ puiꞌ jam aagiꞌñ dhiꞌ puiꞌ jaꞌk moo janoꞌ na ñich jax yaꞌ ai, nañ guꞌx maat nañ muiꞌ yaꞌ ka xi juruuñdhai jam bui.
5 Xib ji nañ baꞌ puiꞌp ba jam tɨtda nañ paiꞌ moo bar jimdam dho ji jix dhaam buiñor guiꞌ nat bhañ joot. Guꞌ ji na guꞌ ni jɨꞌx ku pim xim guguuxiꞌñ na pim jix bhaiꞌ xiñ chɨkkaꞌ nañ paiꞌ baꞌ moo jaꞌk sɨlh tu aagɨt jup kaiꞌch nañ bhɨɨyaꞌ,
6 na guꞌ dai na pim jix buam bam aaꞌ nañ tɨi xi jam aagiꞌñ nañ bar boi chaꞌm kam.
7 Guꞌ aañ miꞌx bhaiꞌ jam tɨtda ji. Na guꞌ noꞌñ yaꞌ pu oirɨ, cham jɨꞌxdhaꞌ bha jimiaꞌ guiꞌ nañ aaꞌ na gammɨjɨ jam buip tuiꞌkaꞌ na jam nuukdaidhaꞌ gio na jam guguuxdhatgɨdaꞌ. Guꞌ cham noꞌ ñich mu jii, nañ guꞌ bhammɨ ɇɇji bhɨjɨ xi jam joochxidhaꞌ.
8 Noꞌt guiꞌ yaꞌ ba ai dho gi baꞌ guꞌ bhaiꞌ ji ja mattudaꞌ ji gu jaꞌppɨx jaꞌtkam nam cham jiñ bui tɨ jɨɨgiꞌñ nam sɨlhkam jix uꞌuaꞌtulhdhix, nam guꞌ cham miꞌ puiꞌ jiim na jax jaꞌk jix kɨɨꞌ kaꞌm nɨiꞌñ guñ Gɨꞌkoraꞌ nañ jax ba tu ja aꞌgiꞌñ, gio na bhaiꞌ ji ja mattudaꞌ na guñ Gɨꞌkoraꞌ ja tulhiiñchudaꞌ noꞌ mɨt jax dhuuk cham tuꞌ kaꞌm tɨɨ.
9 Guiꞌ bhai ji ja mattudaꞌ nar uaꞌtulhdharaꞌ noꞌm cham aaꞌ nam tɨ jɨɨꞌñdhaꞌ aañ jiñ bui.
10 Nañ guꞌ aañ jaꞌxbuiꞌp jir gɇꞌkam kat yaꞌ oirɨt tɨi tu ja aꞌgiꞌñ na jax jaꞌk jix kɨɨꞌ kaꞌm nɨiꞌñ gu Dios nam tuiꞌñgɨdaꞌ. Dhiꞌ bhaan ba matgilhiaꞌ nañ puiꞌp jir tuꞌm na guñ Gɨꞌkoraꞌ, nañ guꞌ pu jimiaꞌx dhaam buiñor, na pu cham jaroiꞌ paiꞌ kañ chɨgiaꞌ.
11 Bɨɨx bhaiꞌp ji ja mattudaꞌ na guñ Gɨꞌkoraꞌ jax chuꞌm tanoolh ja aaꞌñdhai nam kuiñcha biaꞌ ja tulhiiñchudaꞌ bɨɨx nam jɨꞌk cham tuꞌ kaꞌm tɨgiaꞌ, nat guꞌ xib dɨr puiꞌ jaꞌk ba tɨi na bɨɨx daagɨi tulhiiñchudaꞌ ɨp guiꞌ na yaꞌ tu daam kɨɨk dhi oiꞌñgaꞌn na ja iatgiꞌñ.
12 ’Bɨɨx aixim jañ tɨi xi chu jam aꞌgidham jiñ jaaduñ, guꞌ ji na pim chi guꞌ moo cham jɨꞌxdhaꞌ bɨɨx jix maatɨt kaayaꞌ, sia ku ñich tɨi pɨx jup ji bhɨich.
13 Gatuuk ji chi baꞌ noꞌt yaꞌ ba ai gux Dhuuduꞌ kam jix Uañ Iiꞌmdaꞌ na baꞌx bhaiꞌ ba jam aagiꞌñdhaꞌ dhiꞌ nañ jɨꞌk jax tɨi xi chu jam aꞌgidham kat xib. Na guꞌ guiꞌ gammɨjɨ jam buip tuiꞌñgɨda na jam aaꞌñdhidhaꞌ na pim jax jaꞌk miꞌ puiꞌ jiimdaꞌ na jax jaꞌk jix kɨɨꞌ kaꞌm nɨiꞌñ gu Dios. Daipuꞌ puiꞌ jam jurtudidhaꞌ na jax pɨx tɨɨdaidhaꞌ guñ Gɨꞌkoraꞌ, cham tuꞌ na dɨɨlh jax ɨlhiiꞌñ, gio baꞌ na ba jam aagiꞌñdhaꞌ bɨɨx na jɨꞌk jax tum duñiaꞌ gatuuk.
14 Ku guꞌ joidham jix bhaiꞌm taat kaꞌ ji aañ jiñ bui, na guꞌ bɨɨx jix chu mat kaꞌ nañ jɨꞌk tuꞌx maat aañ, miꞌ dhɨr baꞌ mu jaꞌk jup jam aagiꞌñdhaꞌ aapiꞌm.
15 Jaꞌp na jax aañ nañ guꞌ bɨɨx jix chu maat na jɨꞌk tuꞌx maat guñ Gɨꞌkoraꞌ, puiꞌ kuñ baꞌp jam tɨtda na gux Dhuuduꞌ kam jix Uañ Iiꞌmdaꞌ bɨɨx jix chu mat kaꞌ nañ jɨꞌk tuꞌx maat aañ, gio na puiꞌ bɨxchuꞌp jix chu aichuꞌndaꞌ. Miꞌ dhɨr mu jaꞌk jup jam aaꞌñdhidhaꞌ aapiꞌm na guꞌ jam buip tuiꞌñgɨdaꞌ.
Gu Jesuus nap ja tɨtdadaꞌ gu noonbiꞌñ nam sap jɨꞌk tanoolh jix buam xim ɨlhdhai gio bhaiꞌx bhaiꞌp jim ɨlhdhaꞌ
16 ’Aañ cham xiim yaꞌ dɨr pɨx piidhaꞌ gɨxiaꞌ, cham japim paiꞌ ob kañ chɨgiaꞌ. Jɨꞌkchi tanoolh kɨꞌn nañ baꞌ moo gio yaꞌp ba aayaꞌ jam bui na pim baꞌ pɨk moo giop bañ chɨgiaꞌ. Miꞌ dhɨr jañ dho gi baꞌ moo bhaiꞌ pu ba bhɨɨyaꞌ ji jix dhaam jaꞌk buiñor guñ Gɨꞌkoraꞌ nañ gio jaꞌp jup jimiaꞌ, dho gi baꞌ cham ob kañ chɨgiaꞌ pim ji.
17 Baꞌ jaiꞌ dhɨt guiꞌ nam kaichuꞌ mi jaꞌp tɨim tɨ tɨkkaꞌ am, jup kaiꞌch am:
―¿Jax chi baꞌ kaiꞌñkam jup kaiꞌch gu dhiꞌ puiꞌ na jɨꞌk jax jich chɨtda, na puiꞌ cham xiim pɨx piidhaꞌ gɨxiaꞌ, gio nap kaiꞌch nach jɨꞌk tanoolh kɨꞌn gio yaꞌp ba tɨgiaꞌ, na baꞌ puiꞌ miꞌ dhɨr moo ba jimiaꞌx dhaam buiñor guch Gɨꞌkoraꞌ?
18 Pu cham maatɨt kɇɇ ich na jax baꞌr jum duukam na puiꞌ cham xiim yaꞌ dɨr pɨx piidhaꞌ gɨxiaꞌ.
19 Guꞌ ji na guꞌx maat gu Jesuus nam tɨix chɨkkamut jup kaiꞌch nam baꞌ dɨɨlh tɨim tɨ tɨkka, nam guꞌ cham jum guguuxiꞌñ nam moo bhaiꞌ ji chɨkkaꞌ. Baꞌp ja tɨtda ɨp gio gu Jesuus:
―¿Cham aa pim maatɨt jiñ kɇɇ nañ jax kaiꞌñkam puiꞌ jam tɨtda nañ cham xiim yaꞌ dɨr pɨx piidhaꞌ gɨxiaꞌ, gio baꞌ nañ jup kaiꞌch na pim jɨꞌk tanoolh kɨꞌn gio yaꞌp bañ chigiaꞌ? Na pim baꞌ panaas tɨi am xiñ chɨkkam kam kaiꞌch.
20 Tuꞌ sɨlhkam jañ dho yaꞌ jam aagiꞌñdhaꞌñ jaaduñ na pim aapiꞌm giilhim tɨix buam jum ɨlhdhai bhaiꞌ ji susuañiaꞌ nam paiꞌ dhuuk jam nɨiꞌñchudat mi jaꞌp pɨx tuꞌñ dhoodaꞌ jix bhaiꞌm ɨlhdai gu jaꞌtkam nam cham jiñ bui tɨ jɨɨgiꞌñ nam bañ muaꞌpuꞌ. Ku baꞌ guꞌ jaꞌxpɨx giox bhaiꞌ bhaiꞌp jim ɨlhdhaꞌ pim ji.
21 Jaꞌp na jax baꞌ jia maaꞌn gu ubii noꞌt bam ai na paiꞌ dhuuk tɨgiaꞌ gu alhii, na guꞌ giilhim jix chu koꞌklhiaꞌ na bhaiꞌ ji maaxilhiaꞌ. Miꞌ dhɨr guꞌ jɨꞌk tanoolh jurniꞌñ kɨꞌn joidham jix bhaiꞌ bhaiꞌ jim ɨlhdhaꞌ ji na puiꞌ xim aaꞌndaꞌ na joidham maaꞌn ba xi chu mar, panaas ku moo pu cham paiꞌ tu koꞌklhiaꞌ.
22 Puꞌñi ɨp baꞌ aapiꞌm, puiꞌ dhox buam ka xi chu tatdaꞌ xib na pim bax maat nam jax jiñ dhoodaꞌ. Noꞌ pimɨt giop bañ chɨɨ guꞌ joidham ji na pim jix bhaiꞌ bhaiꞌ jim ɨlhdhaꞌ nañ jax ba jam tɨtda. Cham jɨꞌxdhaꞌ jaroiꞌ ka jam sooꞌmchuldhaꞌ sia chi tɨi xi jam bhaamkiꞌñ na pim joidham jix jɨjɨkgɨm jup tuꞌiiꞌ.
23 ’Janoꞌ pim dho gi cham tuꞌ bhaan jax jim aagɨt tuꞌp ka xiñ chɨkkam kaꞌ ji noꞌ ñich gio yaꞌp ba ai duadɨk, na guꞌ dai na pim puꞌñi joidham jix bhaiꞌ bam taat kaꞌ. Baꞌ miꞌ dhɨr noꞌ pim tuꞌ ba taan guñ Gɨꞌkoraꞌ aañ jiñ buix biiñak kat, jam makiaꞌ dho maaꞌn jimdam jiñ aꞌmkam.
24 Puiꞌ na jax noꞌ pimɨt chakui tuꞌ mu taa, bar am dho na pim muiꞌ xi chañiaꞌ gu tuꞌ na jam aꞌm jum aaꞌ. Tuꞌ gi na pim guꞌ aañ jiñ bui bax biiñak, na pim baꞌx ioꞌm gɇꞌkam kɨꞌn jix bhaiꞌ bam ɨlhdhaꞌ noꞌt ba jam maa guñ Gɨꞌkoraꞌ.
Gu Jesuus nap kaiꞌchdhaꞌ na sap gampaiꞌ ji biꞌyaꞌ guiꞌ na yaꞌ tu daam kɨɨk dhi oiꞌñgaꞌn
25 ’Dai xib jañ puꞌñi jaꞌk ka tu jam aꞌgiꞌñ bɨxchuꞌ bhaan ji chu uaꞌrgidhat yaꞌ kam dhi oiꞌñgaꞌn, na guꞌ kam aayaꞌ nañ paiꞌ dhuuk sɨlhkam ba jam aagiꞌñdhaꞌ na jax jir tuꞌm kam guñ Gɨꞌkoraꞌ, cham tuꞌñ tuꞌ bhaan ji uaꞌrgidhat ka tu jam aꞌgiꞌñdhaꞌ na pim baꞌx maatɨt kaayaꞌ.
26 Cham tuꞌ kam aaꞌndaꞌ nañ aañ soiꞌ tɨɨꞌntuꞌndaꞌ guñ Gɨꞌkoraꞌ na baꞌ jam makiaꞌ gu tuꞌ na pim yaꞌ dɨr mu taandaꞌ, jaꞌpji noꞌ pim aañ jiñ buix biiñak pɨx, pu jotmodaꞌ jam makiaꞌ gu tuꞌ na pim tañiaꞌ.
27 Na guꞌ puiꞌp xi jam joiꞌgɨꞌn jia guñ Gɨꞌkoraꞌ, na pim guꞌ tuꞌ kaꞌm jiñ ñɨidhat miꞌ puiꞌ ba jiim nañ jax tu aꞌga, gam na pim ba tɨ jɨɨgiꞌñ nañ aañ bhammɨ dɨr jim buiñor nat bhañ joot.
28 Xib jañ dho gio am bhaiꞌ jaꞌk jup ba tɨ nɨiꞌñ buiñor na ñich paiꞌ dhɨr bha jii, nat guꞌ alhio pɨx bhañ joot yaꞌ dhi oiꞌñgaꞌn.
29 Baꞌp kaiꞌch am guiꞌ nam kaichuꞌ:
―Xib jach dho gi bɨɨx jix maatɨt kɇɇ ji nap jɨꞌk jax tu aꞌga jiñ jaduuñ, nap guꞌ cham tuꞌ bɨxchuꞌ bhaan ji chu uaꞌrgidhat ka tuch aꞌgiꞌñ.
30 Ba tɨ jɨɨgiꞌñ ich baꞌ xib nap bhammɨ dɨr jim buiñor gu Dios. Tɨɨꞌ nap guꞌ jax joidham bɨxchuꞌx chu maat. Jix bhaiꞌx maatɨt ba kɇɇ ich guꞌ bɨɨx nap jɨꞌk jax tu aꞌga. Cham jum aaꞌ nach kam tɨkkadaꞌ nap jich aagiꞌñdhaꞌ na jax jir jum duukam.
31 Baꞌp ja tɨtda gu Jesuus:
―¿Xib aa pim baꞌ panaas bɨɨx jam jujur kɨꞌn ba tɨ jɨɨgiꞌñ aañ jiñ bui nañ ba jam aagiꞌñ? Moo chi alh cham.
32 Pu ka gɨt na pim xiib yaꞌ dɨr pɨx chaꞌtak boopoyaꞌ nam paiꞌ dhuuk bhaiꞌ jiñ bhɨipuꞌ guiꞌ nam jiñ oꞌbhagiꞌñ, dɨɨlh japim dho yaꞌ xiñ bua ji. Ku baꞌ guꞌ guñ Gɨꞌkoraꞌ yaꞌp tuiꞌñgɨdaꞌ ji na guꞌñ aꞌm tɨ nɨidhim, aapiꞌm guꞌ pu paiꞌ ji na pim jaꞌk boopoyaꞌ jix oꞌñchixim, sia ku pim guꞌ xib yaꞌx baabuiꞌm kaiꞌch.
33 Dhiꞌñ pɨx bhaan jam guguuxiꞌñ jiñ jaaduñ na pim baꞌ moo aañ jiñ bui pɨx jix biiñak kat cham tuꞌ bhaan jax jum aaꞌndaꞌ. Xi ñakooꞌndaꞌ pim siat bɨɨx aixim jix buam jum duukam bhaiꞌ jam aꞌm ji chu jii. Aañ japim pɨx jiñ bui tɨtɨɨꞌñchokaꞌ, na ñich guꞌ aañ ba maꞌiich guiꞌ na yaꞌ tu daam kɨɨk dhi oiꞌñgaꞌn, miꞌ pɨx jaꞌp ji biꞌyaꞌ xib dɨr.