8
Si Jesus Giin su Dlabaw Geseg nek Pari' Ta
1 Na, giin nini suk pekpesabut se ginasuy nami: ned duun nai Dlabaw Geseg nek Pari' ta numuun neng migingkud sed dapit dlintu nek trunu seng Mekegega'em ned Diwata tu se nga dlangit.
2 Minibeli giin gisip labaw ne geseg nek Pari' ritu se Dlabi neg Bala'an ne Dlugar ne giining metuud nek tulda nek pinindeg ne Ginu'u, bu' gena' getaw.
3 Su kada ne dlabaw geseg nek pari' tinendu' sek pekpengilak sed Diwata se ngak pimbegay bu' ngad dulang ne ngak pitubu'. Aas su dlabaw geseg nek pari' ta kina'enlan duun remai gilaken.
4 Na, bu' rini pa giin seg benwa, ndi' gaid giin mbaal nek pari', ay gatad pa nud diin duun nai ngak pari' neng mingilak sek pimbegay sumala' ri se Kesugu'an ne ngag Judeo.
5 Sug binaal nilan maa' neg binaal ne ngak pari' kupya bu' dlingaw ma'aray se ngag betang tu se dlangit. Maa' run rema ini sung mihitabu' ri ni Moses. Sek pe'indegen na niin suk tulda, tinelu'an giin ned Diwata, “Kina'enlan nek sunuren mu suk pi'ita'u seni'a ritu se gembagel neg bentud.”
6 Ma'ad nemuun, binegayan si Jesus se ketendanan sek pekepari' neg halangdun pa kampuun sinangkali' senilan, maa' sek pasad ne keligenan ne ginimetangen ri se gelet ned Diwata bu' se nga getawaan melengas pa kampuun, tendeng ay sug begu nek pasad ne keligenan buwat ri se dlabi gempiya ne ngak saad ned Diwata.
7 Ay bu' su guna ne keligenan nda' paik sayepen, ndi' na siya kina'enlan su keruwa'.
8 Ma'ad mi'ita' ned Diwata suk sayep ri se nga getawaan. Miktalu' giin,
“Enlengay niyu, matengi gendaw, miktalu' su Ginu'u,
neng megbaalu neg begu ne keligenan duma se nga getaw Israel bu' duma se nga getaw Judah.
9 Gena' ining maa' se keligenan neg binaal'u duma se nga gepu'an nilan
se gendaw ne ginagak'u ilan arun megawa' buwat se dlupa' seg Ehipto,
tendeng ay nda' nilan sunuray su keligenan neg binaal'u duma ri senilan,
bu' aas nda'u ilan penemba'ay, miktalu' su Ginu'u.
10 Na, giin nini su keligenan neg baalen'u duma se nga getaw Israel
seng mateng ne nga gendaw ketu, miktalu' na pelum su Ginu'u:
Betangen'u su ngak sugu'u ri se nga gena'ena' nilan
bu' sulaten'u ini ri se ngak pusung nilan.
Gaku' mbaal nilan ned Diwata,
bu' gilan mbaal ne nga getawan'u.
11 Bu' ndi' na kina'enlan neng mektendu' ilan pa se kada sala tu sek samaan ned dangen,
awas sek pateren,
‘Ilala mu su Ginu'u’.
Tendeng ay dlaun nilan megilala ri senaan,
buwat se dlabi gembaba' tampan tu se dlabi neg halangdun.
12 Ay pasayluun'u ilan ri se ngang melaat ne ngag binaal nilan
bu' ndi'u na pegena'ena'en su ngak sala' nilan.”
13 Pebiyan sek peksambay seg begu ne keligenan, sud Diwata migbaal se guna ne keligenan neng meraan na; bu' isan landun sung meraan na bu' meluktak me'alep ra rayun.