3
Si Jesus Labaw pa riin ni Moses
1 Nga kepeteran'u riin ni Christ nek tinawag rema ned Diwata, pegena'ena' niyu si Jesus nek sinugu' arun mbaal ne Dlabaw Geseg nek Pari' ne ginilala ta ri sek tinu'uwan ta.
2 Melituuren giin tu sed Diwata, sung miktendu' ri seniin, maa' ni Moses neng melituuren rema sek pekpenibeliin ri seg balay ned Diwata.
3 Su getaw neng migbaal neg balay labaw pa kampuuning merawaten nek pesiddengeg sinangkali' ri seg balain. Maa' run rema nek pebiyan, si Jesus mekerawat neng metaas kampuun nek pesiddengeg sinangkali' ri ni Moses.
4 (Ay su kada neg balay binaal ne getaw ma'ad sud Diwata sung migbaal se dlaun ne ngag betang.)
5 Si Moses melituuren sek pekpenibeliin ri seg balay ned Diwata bu' mikpemetuud giin metendeng se ngag betang nek telu'en ned Diwata seng mateng ne gendaw.
6 Ma'ad si Christ melituuren gisip Bata' nek sineligan ri seg balay ned Diwata. Bu' gita sug balay ketu, bu' mekpebilin ita se keddasig bu' pekpesigarbu ri se ngag betang nek pidderama ta.
Su Kepenguleliyan para se nga Getawan ned Diwata
7 Aas maa' nek tinalu' ne Gispiritu Santu,
“Bu' merengeg niyu suk talu' ned Diwata nandaw,
8 ‘Ndi' niyu petegasayi gena'ena' niyu,
maa' nu nga gepu'an niyu neng migribildi ilan tu sed Diwata,
saanay ditu ilan se gendaw ketu se kemingawan, inindanan nilan sud Diwata.’
9 ‘Ditu sinulayanu nilan’, laung ned Diwata,
isan mi'ita' na nilan sug binaal'u seled se gepaat pulu' taun.
10 Aas linengetanu run gaid su nga getaw sek panahun ketu, bu' miktalu'u:
‘Kanunay ilan mekpelayu' ri senaan,
bu' nda' ilan pektuman ri se ngak pemandu'u.
11 Aas se dlanget'u, minumpa'u:
Ndi' ilan gaid mekeseled ri se dlugar ne ritu mbegayan'u ilan nek penguleliyan.’ ”
12 Nga kepeteran'u, pekpetigaam amu ne nda'irunik sala ri seniyu ned duuni gena'ena'en neng melaaten gupiya bu' memilas, rayun tumeliyud buwat ri sek tetubu' ned Diwata.
13 Tumu' kina'enlan meddinesigay amu se kada gendaw. Bu' kina'enlan mekpeddayun amu saanay duun paik panahun ne giningelanan neng ‘Nandaw’ arun nda'irunik sala seniyu neng milimbungan nek sala' ne mbaal niyu bu' mekpetegas ri se gena'ena' niyu.
14 Tendeng ay dlaunan ta ngak seked ni Christ bu' mekpeddayun ita ned duuning meligen nek peksalig buwat ri se getaran tampan se ketapusan.
15 Giin nini suk tinalu' ri se Kesulatan:
“Bu' merengeg niyu suk talu' ned Diwata nandaw,
ndi' niyu petegasay su nga gena'ena' niyu maa' ne nga gepu'an niyu
seng miksupak ilan ri sed Diwata.”
16 Ta' ma nga getaw sung mikerengeg sek talu' ned Diwata, ma'ad miksupak ri seniin? Su dlaun nek pidlegesegan ni Moses sek pedlegawas seg Ehipto
17 Bu' ta' maik pidlengetan ned Diwata seled se gepaat pulu' taun? Su nga getaw neng mikpekesala' bu' mimatay ritu se kemingawan.
18 Bu' ta' maik tinelu'an ned Diwata sek pekpenumpa'en ne ndi' ilan gaid mekeseled ri se dlugar ne ritu mbegayan ilan nek penguleliyan? Gilan su nga getaw neng miksupak ri seniin.
19 Aas, mi'ita' ta ne genda' ilan mekeseled tu se kepenguleliyan ketu, tendeng ay nda' ilan pektu'u ri sed Diwata.