3
Nate paelia꞉ toma꞉na꞉ pea꞉peke yolo pa꞉la꞉ ekimanu
1 Mo nate paelia꞉ toma꞉na꞉ta꞉ ka꞉nda꞉ma꞉ homaasa꞉ haumanu wopu ipiliekema꞉ hone wopu wia hapeke.
2 Koto paelia꞉ dina꞉ta꞉ wanda꞉halima꞉ do haumanu pu halimikie. Ikita꞉ I̱ I̱ alo hata꞉ make pasa꞉tei hau wopu pita꞉la꞉eki make hakoko liki pimanu lo make handaena꞉ honemanu u make yala꞉ peaaso hata꞉ make kikama꞉ handeke some ala꞉ hoke pimanu make lo halimikie. Kutaa make ateke inkikina꞉ kakena꞉ na homo make keiyae loluekema꞉ hone na u make yeni hau pita꞉la꞉ haumanu hone na wiki wanda꞉hali make halimikie.
3 Ikana꞉ma꞉ a꞉ta꞉ma꞉ homa tamba꞉ na mu make pa paeyaaluekema꞉ hone na u make hoki nane laasa꞉ wanda꞉hali hata꞉ make hone mata꞉pa pua hata꞉ wanda꞉hali hoeyaasa꞉ hau pu make kika ma꞉na꞉na꞉ hau leke pita꞉la꞉ hau make pu halimikie. Mo wanda꞉halima꞉ epeke haumanu honditi pu halimikie.
4 Kutaa make ikana꞉ma꞉ yankeke kone lina꞉ ma꞉na꞉ yapa꞉ mu a꞉nda꞉ lombo make homa꞉la꞉ ale teke na hake haumanu pu make ika꞉ honema꞉ ikita꞉ tieke haloma꞉me hone witolo hata꞉ Koda꞉ pukima꞉ na homeketa꞉ pa ika꞉ loke ta꞉na꞉ peaasa꞉ alemanu pa꞉ta꞉ pukima꞉ homo halememe.
5 Ikana꞉ma꞉ mo Koda꞉ pa꞉ta꞉ yeni pita꞉la꞉ hauta꞉ pa pea꞉tiki pea꞉tiki pu halemepate mo yenina꞉ wele pita꞉la꞉ ekita꞉ hoki walaa kiaaso halememe. Kutu piki wanda꞉hali ame̱le̱ apa꞉tao na hapeke.
6 Kutu piki mandane haliwekima꞉ta꞉ mandane hone wopu na wiki wanda꞉weki homu pealuekema꞉ ika꞉ da pa꞉ta꞉ yopu siki honda꞉ pamba pu halememe. Kutu piki wanda꞉weki ika꞉ hoke hau manuma꞉ta꞉ ika꞉ honemanu ka꞉nda꞉ peaota꞉ ika꞉ lokena꞉ hoke hone pa꞉la꞉eki manuma꞉ iki yola꞉ mea aneya moneya pu hala꞉me.
7 Do koto wanda꞉wekima꞉ta꞉ mo pimanu opua hone uluekema꞉ taapemekepate pa mo ota꞉ pina꞉ teketa꞉ miniki hapa꞉peke na ya꞉la꞉me.
8 Mo hande Dia꞉nisi pita꞉ Dia꞉mbitisi yaapoma꞉ Mosesi pa꞉ta꞉ a꞉nda꞉ lipikime. Koto some yaapoma꞉ pipiki tupa꞉ kone mo hande haliwekima꞉ta꞉ mo hande ota꞉ pi pa꞉ta꞉ make a꞉nda꞉ lu halememe. Ikana꞉ma꞉ ika꞉ hone tikitiki na yaaso hata꞉ kone Koda꞉ pa꞉ta꞉ hone tulaapeke ekina꞉ta꞉ iki ana꞉ na paleke handaata꞉ Koda꞉ma꞉ iki kiao hala꞉me.
9 Koto haliweki ika꞉ hauta꞉ wopu na daeyalieke. Mo amba꞉ haemeke wanda꞉halima꞉ mo hande Dia꞉nisi Dia꞉mbitisi yaapona꞉ pamba꞉ na piki hau pipikieki handolo pimiki tupa꞉ ame make wanda꞉halima꞉ koto haliwekina꞉ pamba꞉ na piki haumanu handilimikie.
Paeyaaso mana꞉ pi
10 Pate nakana꞉ma꞉ I̱ yaapo neke mandake pomi pita꞉ma꞉ta꞉ mo hande wanda꞉hali pa꞉ta꞉ waloa꞉ pi manuta꞉ nakana꞉ma꞉ amba꞉ opua hone wilime. Kutaa ya hau pita꞉ ya pua꞉eki yaapota꞉ nakana꞉ma꞉ hone wilime. Kutaa I̱ma꞉ ya hone tulaaloeki make wanda꞉halima꞉ pi mina꞉ soka꞉la꞉ma꞉ homa na kiake pa handeteke haloeki make ya a꞉ta꞉ma꞉ homa pukima꞉ homoloeki make ka꞉nda꞉manu epena꞉ kone I̱ma꞉ honkopu hao da̱o̱la haloeki make nakana꞉ma꞉ handeleme.
11 Mandane haliwekima꞉ I̱ lu yombu moneao halemeke make tanda wopuna꞉ moneao haloeki make handeme. Mo hande A꞉ndioko da pa꞉ta꞉ make Aikoniomo da pa꞉ta꞉ make kutaa Lisita da pa꞉ta꞉ make do da tepo haliwekima꞉ I̱ ota꞉ hoeya꞉ hau lu yombu haena꞉ kone pa taka꞉lao haowa꞉ ekita꞉ naka꞉ hone wilime. Kutu pimipate kone mo Tekehalima꞉ do koto hau paeyaona꞉ tukiki pa꞉ta꞉ kone I̱ wopu pa꞉ta꞉la꞉ moneao haya꞉me.
12 Aowe. Koto tupa꞉ kone mandane wanda꞉hali epima꞉ Ketiso Yesu pa꞉ta꞉ ta꞉ma꞉ni pea hata꞉ Koda꞉na꞉ pi tolu haemeka꞉na꞉ta꞉ kota꞉ iki pa꞉ta꞉ta꞉ mandane haliwekima꞉ mo hoeya꞉ hapu lu yombua꞉la꞉ haumanu pilimikie.
13 Hoke hau pu hala꞉ haliweki make yayapiki hau pita꞉la꞉ haliweki make ika꞉ ika꞉ kone makea alu alu pitolo hata꞉ ika꞉ hoke hau manuta꞉ ota꞉ mea daeyalimikie.
14 Kutu pu halimipate neketa꞉ hande waleeke opi ota꞉ pimanu wopu miniki hale ekita꞉ na mina꞉pa꞉lapeke. Hande neke walea꞉ tapaketa꞉ naka꞉ hone wilime.
15 Kutaa make mo hande Yakopiki Baibolona꞉ wape pea ula꞉ pi manuta꞉ neke wekisiki hata꞉ kone kini pea opua꞉tiki a꞉pa ame make paa opuolo haleme. Nakana꞉ma꞉ mo Ketiso Yesu pa꞉ta꞉ hone tulaaseeki pa꞉ta꞉ yama꞉ mea꞉peke da꞉taasa꞉eki muelena꞉ u tiaasa꞉ honeta꞉ do Baibolona꞉ wape pea ula꞉ pi manuma꞉ ka꞉la꞉me.
16 Mo Baibolona꞉ wape pea ula꞉ pi paeyao wape pina꞉ta꞉ haliwekina꞉ hone pa꞉ta꞉ Koda꞉ma꞉ wala꞉ tiaaso haena꞉ wape pimikime. Koto wape pa꞉la꞉ pima꞉ta꞉ wanda꞉hali pa꞉ta꞉ ota꞉ pimanu waluekema꞉ make hoke hau peaama꞉na꞉ sa꞉sa꞉ puluekema꞉ make hoi piki haumanu tondepealuekema꞉ make kutupa epeke hapeke ekina꞉ mana꞉manu loluekema꞉ wape pea ula꞉me.
17 Kutu peaapeke ya꞉la꞉ ekima꞉ta꞉ mo Koda꞉na꞉ e pokaasa꞉ somema꞉ epeke hau paeyao ana꞉na꞉ peaena꞉ tikitiki yao haena꞉ lelieke.