4
Eipoloha꞉ma꞉ma꞉ Koda꞉ pa꞉ta꞉ hone tulao hayekeeki
1 Eipoloha꞉ma꞉ta꞉ Diu wanda꞉halina꞉ titina꞉ halie. Koto pa꞉la꞉ ekina꞉ nikana꞉ma꞉ eki pi lomana꞉pe.
2 Koda꞉ma꞉ta꞉ Eipoloha꞉ma꞉ma꞉ piekeeki manuma꞉ Koda꞉ pa꞉ta꞉ tikitiki yao haena꞉ lea꞉ka꞉na꞉ yoluta꞉ kota꞉ Eipoloha꞉ma꞉ma꞉ ipika꞉ hakoko lia꞉peke yolo pia꞉me. Kutu pulu pia꞉pate ipikana꞉ma꞉ Koda꞉ pa꞉ta꞉ hata꞉ hakoko lia꞉peke na ya꞉la꞉me.
3 Baibolo bukana꞉ wape pa꞉la꞉ ekita꞉ dupa Eipoloha꞉ma꞉ma꞉ Koda꞉ pa꞉ta꞉ hone tulao hayekeme. Koto ekina꞉ Koda꞉ma꞉ta꞉ Eipoloha꞉ma꞉ ipika꞉ hone tulao hayeke ekina꞉ ipikita꞉ tikitiki yao haena꞉ leekeme wape pa꞉la꞉me.
4 Hali homeke a꞉nda꞉ma꞉ e pokaeya꞉ka꞉na꞉ta꞉ ipika꞉ yenki mulu pa꞉la꞉pate koto milia꞉ yenkita꞉ pa hameke na hala꞉la꞉ ekie. Dia꞉me pa ipika꞉ e pokaeyeke ekina꞉ halolo pita꞉la꞉me.
5 Koto pa꞉la꞉pate hali homeke a꞉nda꞉ma꞉ ipika꞉ pieke ekimanu hone na wiki pa Koda꞉ pa꞉ta꞉ hone tulao haya꞉ka꞉na꞉ta꞉ kota꞉ Koda꞉ma꞉ koto halima꞉ ipiki pa꞉ta꞉ hone tulaala꞉eki handaata꞉ pa hoke hau pa꞉la꞉ hali kone ameta꞉ eki a꞉nda꞉ na piki hali hala꞉me laa lelieke. Kutu pita꞉la꞉ ekima꞉ Koda꞉ma꞉ koto halita꞉ I̱ pa꞉ta꞉ tikitiki yao haena꞉ lolueke la꞉la꞉me.
6 Kutu pita꞉la꞉eki make Deipidima꞉ la꞉la꞉me. Hali homeke a꞉nda꞉ ipika꞉ pieke ekimanu hone na witolo hata꞉ Koda꞉ma꞉ pa mo someta꞉ tikitiki yao haena꞉ lea꞉ka꞉na꞉ta꞉ kota꞉ koto halima꞉ ta꞉na꞉ma꞉ homa paleke hala꞉ ekina꞉ Deipidima꞉ leeke ekita꞉ dupa wape pa꞉la꞉me.
7 Hali ma꞉nda꞉ta꞉ Koda꞉na꞉ pi ula꞉ ekimanu yamba꞉la꞉la꞉ ekimanu Koda꞉ma꞉ pa paeyaowaala꞉ ekina꞉ta꞉ koto halima꞉ta꞉ ta꞉na꞉ma꞉ homa hao hapeke ya꞉la꞉me.
8 Hali ma꞉nda꞉ta꞉ ipika꞉ hoke hau pa꞉la꞉ ekimanu Koda꞉ma꞉ na yata꞉pea꞉ka꞉na꞉ta꞉ kota꞉ koto halima꞉ ta꞉na꞉ma꞉ homa hapeke ya꞉la꞉me laa wape pa꞉la꞉me.
9 Do hande Deipidima꞉ la꞉la꞉ ta꞉na꞉ma꞉ homa hapeke ekita꞉ pa mo sekemesaisi hau pea haleme haliweki pa꞉ta꞉ homeke la꞉la꞉pe. Dia꞉me. Mo sekemesaisi hau na piki haleme haliweki pa꞉ta꞉ make la꞉la꞉me. Hande Baibolo bukana꞉ wape pa꞉la꞉eki loa꞉ tupa꞉ Eipoloha꞉ma꞉ Koda꞉ pa꞉ta꞉ hone tulao hayekeme. Koda꞉ma꞉ta꞉ Eipoloha꞉ma꞉ ipika꞉ hone tulao hayeke ekina꞉ ipikita꞉ tikitiki yao haena꞉ leekeme wape pa꞉la꞉me.
10 Koto hauta꞉ Eipoloha꞉ma꞉ pa꞉ta꞉ hando dina꞉ piekepe. Eipoloha꞉ma꞉ sekemesaisi hau pea haena꞉ piekepe o na piki haena꞉ piekepe. Na piki haena꞉ kone piekeme.
11 Mo sekemesaisi piki hauta꞉ wetepe nane piekeme. Kutupata꞉ ipika꞉ sekemesaisi hau pieke ekita꞉ ti witolo tombo dupa piekeme. Ipikita꞉ sekemesaisi hau na piki hata꞉ kone Koda꞉ pa꞉ta꞉ hone tulao hayeke ekina꞉ Koda꞉ma꞉ ipiki pa꞉ta꞉ tikitiki yao haena꞉ leeke ekita꞉ ti witolo tombo wiekeme. Kutu pa꞉la꞉ ekina꞉ haliweki paeyaoma꞉ sekemesaisi hau na piki hata꞉ kone Koda꞉ pa꞉ta꞉ hone tulao haleme ekina꞉ Koda꞉ma꞉ ipiki pa꞉ta꞉ tikitiki yao haena꞉ la꞉la꞉ haliwekina꞉ apa꞉ta꞉ Eipoloha꞉ma꞉ ika꞉ apa꞉ hala꞉me.
12 Kutu pa꞉la꞉pate Eipoloha꞉ma꞉ ipikita꞉ mo sekemesaisi hau pea haleme haliwekina꞉ apa꞉ make hala꞉me. Iki sekemesaisi hau pea haleme ekina꞉ dia꞉ya꞉la꞉pate hande nika꞉ apa꞉ Eipoloha꞉ma꞉ma꞉ta꞉ sekemesaisi hau na piki hata꞉ kone hone tulaeyeke tupa꞉ ikana꞉ma꞉ make hone tulaaseme ekina꞉ loa꞉me.
Koda꞉na꞉ pi la꞉ ula꞉ ekita꞉ mo hone tulaasa꞉eki pa꞉ta꞉ yama꞉ mea꞉peke ya꞉la꞉eki
13 Koda꞉ma꞉ta꞉ Eipoloha꞉ma꞉ pa꞉ta꞉ alota꞉ Do kenke paeyaota꞉ neke pa꞉ta꞉ make naka꞉ hoki nane halo peleme wanda꞉hali pa꞉ta꞉ make kulueke laa la꞉ witolo leekeme. Koda꞉ma꞉ do pi la꞉ wieke ekita꞉ Eipoloha꞉ma꞉ma꞉ hande Lo Pimanu opua pu hayeke ekina꞉ na leekeme. Eipoloha꞉ma꞉ta꞉ hone tulao hata꞉ Koda꞉ pa꞉ta꞉ tikitiki yao hayeke ekina꞉ leekeme.
14 Hande Lo Pimanu opua pu haleme wanda꞉halima꞉ homeke Koda꞉na꞉ la꞉ ula꞉eki mimika꞉na꞉ta꞉ kota꞉ Koda꞉ pa꞉ta꞉ hone tulaasa꞉ wanda꞉halita꞉ pa hameke kone hone tulaasememe. Kutupa Koda꞉na꞉ pi la꞉ ula꞉eki make yaapeke na ya꞉la꞉me.
15 Hande Lo Pimanu opua oto pa꞉ta꞉ haleme wanda꞉hali pa꞉ta꞉ wetepena꞉ta꞉ Koda꞉ma꞉ mineke pankolo hata꞉ iki ame̱le̱ pi yokaalu pilieke. Kutu pulu pa꞉la꞉pate hali ma꞉nda꞉ma꞉ wanda꞉hali pa꞉ta꞉ pi wita꞉la꞉eki ma꞉nda꞉ na la halea꞉ka꞉na꞉ta꞉ kota꞉ wetepena꞉ iki pa꞉ta꞉ pi ula꞉eki yambelelememe pi lapeke na ya꞉la꞉me.
16 Eipoloha꞉ma꞉ Koda꞉ pa꞉ta꞉ hone tulaeyeke ekina꞉ Koda꞉ma꞉ hande pi la꞉ wiekeme. Koda꞉ma꞉ta꞉ Eipoloha꞉ma꞉ ipika꞉ hoki nane halo pimiki wanda꞉hali paeyao pa꞉ta꞉ hande la꞉ wieke pita꞉ iki pa꞉ta꞉ pa hameke halena꞉yeke loa꞉me. Hande Lo Pimanu oto pa꞉ta꞉ haleme wanda꞉hali pa꞉ta꞉ homeke dia꞉ya꞉la꞉pate hande Eipoloha꞉ma꞉ma꞉ pieke tupa꞉ Koda꞉ pa꞉ta꞉ hone tulao haleme wanda꞉hali pa꞉ta꞉ make hala꞉la꞉me. Eipoloha꞉ma꞉ta꞉ niki paeyaona꞉ apa꞉ hala꞉me.
17 Hande Baibolo bukana꞉ wape pa꞉la꞉ tupa꞉ Neketa꞉ tutu ta꞉ta꞉ ta꞉ta꞉ wanda꞉hali paeyaona꞉ apa꞉ halena꞉ lolome laa leeke ekina꞉ opua Eipoloha꞉ma꞉ Koda꞉ pa꞉ta꞉ hone tulao hayekeme. Koto ekina꞉ Koda꞉ma꞉ kone koto pi la꞉ wieke ekita꞉ ota꞉ yaeyekeme. Do hauta꞉ mo amba꞉ homemeke wanda꞉hali mea da꞉taapekeeki make mo amba꞉ na haemeke alemanu ipikana꞉ma꞉ pima꞉ alo hata꞉ kone mea haena꞉ leekeeki make koto Koda꞉ma꞉ta꞉ do hau make pu hala꞉me.
18 Eipoloha꞉ma꞉ma꞉ mo hande la꞉ wieke pina꞉ yaapeke pota꞉ ma꞉nda꞉ na handeekepate kone ipikana꞉ma꞉ hone tulao hayeke ekina꞉ta꞉ mo tutu ta꞉ta꞉ ta꞉ta꞉ wanda꞉halina꞉ apa꞉ hayekeme. Hande Baibolo bukana꞉ wape pa꞉la꞉ tupa꞉ Naka꞉ hoki nane halo peleme wanda꞉hali wopu halimikie wape pa꞉la꞉me.
19 Ipikana꞉ma꞉ta꞉ ipika꞉ bapimanu 100 tupa꞉ hata꞉ta꞉ Setama꞉ weki mendia꞉peke na yeekeeki make ipika꞉ loke ankolopa꞉ pamba꞉ pamba꞉ piekeeki make hone witolo hata꞉ kone ipika꞉ hone tulaeyeke ekita꞉ na kiti yokaeyekeme.
20 Koda꞉ma꞉ la꞉ wieke pita꞉ ipikana꞉ma꞉ hone ti na yokeke hone tulatiki pu hao hayekeme. Kutu pia꞉tiki pu hayeke ekima꞉ da̱o̱la hata꞉ Koda꞉na꞉ pi laatiki pu hayekeme.
21 Eipoloha꞉ma꞉ ipikana꞉ma꞉ hone lenkene pa witolota꞉ Koda꞉ma꞉ la꞉ ula꞉ pita꞉ ota꞉ yaapeke ya꞉la꞉me hone wiekeme.
22 Kutu pieke handaa Koda꞉ma꞉ Eipoloha꞉ma꞉ma꞉ hone tulaeyekeeki hando haota꞉ ipiki yaapo tikitiki yao haena꞉ leekeme.
23 Mo hande Ipiki yaapo tikitiki yao haena꞉ leekeme pita꞉ Eipoloha꞉ma꞉ pa꞉ta꞉ homeke wape na pa꞉la꞉me.
24 Niki pa꞉ta꞉ tonka꞉na꞉ wape pa꞉la꞉me. Nikana꞉ma꞉ta꞉ hande nika꞉ Tekehali Yesu homeekepate kone mea da꞉taeyeke Koda꞉ pa꞉ta꞉ hone tulao haloma꞉ ekina꞉ nikita꞉ ipiki yaapo tikitiki yao homono la꞉la꞉me.
25 Nika꞉ hoke hauna꞉ Koda꞉ma꞉ Yesu homolo epena꞉ tapaeyekeme. Kutupa nikita꞉ ipiki yaapo tikitiki yao hamonoyeke Yesu paa mea da꞉taeyekeme.