3
Tooli toolina꞉ mana꞉ pi
1 Koto tupa꞉ kone weteke tonu ikita꞉ ika꞉ haliki tonu pa꞉ta꞉ homu pea hao hapa꞉peke. Mandane haliki tonuma꞉ Koda꞉na꞉ pi na miki haemeka꞉na꞉ta꞉ kota꞉ ika꞉ epeke hau pilimi ekima꞉ta꞉ mo haliweki pi mina꞉ yola꞉ milimikie.
2 Ikana꞉ma꞉ mo ika꞉ pi na miki haliki tonu pa꞉ta꞉ pi homeke kone na lo haemeka꞉na꞉ta꞉ kota꞉ ika꞉ homu pea epeke yakopiki hau seliapo pilimieki handata꞉ mo haliwekima꞉ kutu pilimikie.
3 Loke yole epeke hake wanda꞉ haluekema꞉ manda lokena꞉ au anipu lapa꞉peke. Do hau manuna꞉ alome. Ika꞉ itiki ponka꞉ pilu o belekemanu wotu moko kutupa mo aka꞉ epeke epeke yamo halemeeki manuna꞉ alome.
4 Koto pa꞉la꞉pate ika꞉ loke tukiki pa꞉ta꞉ hala꞉ ota꞉ wanda꞉ do koto wanda꞉ta꞉ ota꞉ yole epeke haena꞉ lapa꞉peke. Koto yole pea haasa꞉ ekita꞉ hoto paeyao epeke tupa꞉ hao hapa꞉peke ya꞉la꞉me. Mo kimele piki hau make homu piki hau make koto hau yole yaapota꞉ Koda꞉ma꞉ handata꞉ ota꞉ epeke hau tieke hone u hala꞉me.
5 Mo amba꞉ Koda꞉ pa꞉ta꞉ hone ti lao haemeke yako piki wanda꞉ wekita꞉ koto tupa꞉ ikana꞉ma꞉ iki yole pina꞉ lemekeme. Kutupa ikana꞉ma꞉ mo ika꞉ haliki tonu oto pa꞉ta꞉ haemekeme.
6 Setata꞉ kutu piki wanda꞉ hata꞉ ipika꞉ haliki Eipoloha꞉ma꞉na꞉ pi opua hata꞉ta꞉ ipiki pa꞉ta꞉ ya teke halio la꞉tiki piekeme. Koto ekina꞉ ikana꞉ma꞉ aleta꞉ ma꞉nda꞉ pa꞉ta꞉ paala꞉ma꞉ na homeke epeke hau pu haemeka꞉na꞉ta꞉ ikita꞉ ipika꞉ waneke tonu halememe.
7 Haliki tonu iki make haliki hata꞉ta꞉ ika꞉ wanda꞉ta꞉ iki tupa꞉ honkopu na halememe hone wia꞉pa꞉peke. Koto ekina꞉ta꞉ ikana꞉ma꞉ iki pa꞉ta꞉ epeke tupa꞉ hone witolo hata꞉ handeteke hapa꞉peke. Kota꞉ kotota꞉ mo wanda꞉weki iki make iki ame̱le̱ mandakena꞉ Koda꞉na꞉ pa hameke kita꞉la꞉ da꞉ta꞉la꞉ ekita꞉ milimikie. Ala꞉ta꞉ ma꞉nda꞉ma꞉ ika꞉ yeni pu haleme ekimanu sa꞉sa꞉ na pina꞉ koto hau pu hapa꞉peke.
Pukima꞉ homa꞉ alualu pea hamana꞉e
8 Ya paeyaaso pita꞉ dupa alome. Iki paeyaoma꞉ hau paeyao pa꞉ta꞉ homeke hone wia a꞉ta꞉ma꞉ homa꞉ alualu pu hapa꞉peke. Iki homeke homeke paeyaoma꞉ nikita꞉ yankeke homeke hone witolo hata꞉ta꞉ pukima꞉ homa꞉ alualu pea make epeke hau pu alualu pea make homu pu alualu pea hapa꞉peke.
9 Hoke hau iki pa꞉ta꞉ pimika꞉na꞉ta꞉ hoke hauma꞉ na hombo peapa꞉peke o keke pi lemeka꞉na꞉ta꞉ keke pima꞉ na hombo peapa꞉peke. Ikana꞉ma꞉ koto hau na pikita꞉ iki tamba꞉ mulu peleme ekima꞉ hombo peapa꞉peke. Kota꞉ kotota꞉ Koda꞉ma꞉ iki wi lea꞉ dina꞉ta꞉ iki tamba꞉ mulueke la la꞉ wiekeme.
10 Kota꞉ Baiboloma꞉ la꞉la꞉ ekita꞉
Epima꞉ ta꞉na꞉ma꞉ homa꞉la꞉eki make epeke tupa꞉ hao hala꞉eki make handuluekema꞉ hone pia꞉ka꞉na꞉ta꞉ kota꞉ ipikana꞉ma꞉ ipika꞉ lo hala꞉ hoke hoke pi make yayapiki pi make mina꞉pa꞉laena꞉e.
11 Kutupa ipikana꞉ma꞉ hoke hau hoki wala epeke hau pina꞉e. Kutupa make a꞉nda꞉ peliaasa꞉ hau handa puluekema꞉ tolu weiyu haena꞉e.
12 Pa ekipeke mo Tekehalima꞉ta꞉ mo epeke hau pu haleme wanda꞉hali handeteke hata꞉ ika꞉ yeni pu halemeeki hoto paeyao opu hala꞉me. Kutu pu hala꞉pate mo hoke hau pu haleme wanda꞉hali pa꞉ta꞉ta꞉ hoki wala a꞉nda꞉ lia hao hala꞉me.
Epeke hau pita꞉la꞉ ekina꞉ ka꞉nda꞉ mina꞉la꞉eki
13 Ikana꞉ma꞉ epeke hau puluekema꞉ honema꞉ wotu homemeka꞉na꞉ta꞉ epima꞉ iki hoeyaaliepe.
14 Kutu pa꞉la꞉pate epeke hau pitolo hata꞉ kone ka꞉nda꞉ mimika꞉na꞉ta꞉ kota꞉ ta꞉na꞉ma꞉ wotu homa꞉pa꞉peke ya꞉la꞉me. Wanda꞉hali pa꞉ta꞉ paala꞉ma꞉ na homeke hone baapa꞉peke.
15 Koto pa꞉la꞉pate Ketiso pa꞉ta꞉ homu pea hata꞉ hone wopu witolo hata꞉ ipikita꞉ ika꞉ Tekehali haena꞉ lapa꞉peke. Kutupa ma꞉nda꞉ma꞉ ika꞉ hone ti lao haleme ekita꞉ ekipape la lota꞉ pia꞉ka꞉na꞉ta꞉ ikana꞉ma꞉ hombo pealuekema꞉ta꞉ tikitiki yao hapa꞉peke.
16 Koto pa꞉la꞉pate ikana꞉ma꞉ hombo peaemeka꞉na꞉ta꞉ epeke hone witolo hata꞉ homu pikima꞉ lapa꞉peke. Ika꞉ hone teke tikitiki yao hala꞉ tupa꞉ kone haena꞉ lo hapa꞉peke. Koto pimika꞉na꞉ta꞉ iki mo Ketisona꞉ hoki nane telia꞉la꞉ wanda꞉hali hata꞉ epeke hau pu halemeeki handata꞉ mo mandane wanda꞉halima꞉ do hauta꞉ hokeekie lemeka꞉na꞉ta꞉ wetepena꞉ koto leme ekina꞉ yaala꞉ma꞉ homena꞉ yeke ika꞉ hone teke tikitiki yao haena꞉ lapa꞉peke.
17 Nika꞉ epeke hau puluma꞉ ekina꞉ ka꞉nda꞉ muluma꞉ ekita꞉ Koda꞉ma꞉ hone pa꞉la꞉ ekina꞉ ka꞉nda꞉ muma꞉ka꞉na꞉ta꞉ kota꞉ ana꞉ pa꞉la꞉pate nika꞉ hoke hau puluma꞉ ekina꞉ ka꞉nda꞉ muluma꞉ ekita꞉ kotota꞉ ana꞉ na pa꞉la꞉me.
Ketisoma꞉ nika꞉ hoke hau yoko luekema꞉ amba꞉ homeekeeki
18 Ketiso hone umana꞉e. Ipiki kone ikina꞉ homeekeme. Ipikana꞉ma꞉ hoke hau paeyao yoko luekema꞉ hoto homeke kone homeekeme. Niki Koda꞉ pa꞉ta꞉ hatuku poluekema꞉ mo epeke halima꞉ niki hoke wanda꞉halina꞉ anke teke mea homeekeme. Ipika꞉ loketa꞉ homena꞉ lemekepate ipika꞉ temokota꞉ (Koda꞉ma꞉) da꞉ta hao haena꞉ leekeme.
19 Kutupa temoko hata꞉ta꞉ ipikana꞉ma꞉ mo dipula pitimiki temokomanu pa꞉ta꞉ pua (Koda꞉na꞉) pi waleekeme.
20 Mo temoko manuta꞉ amba꞉ hande Noama꞉ mo kawaso eiyeke pita꞉ma꞉ haemeke wanda꞉halina꞉ temokomanue. Koto pita꞉ma꞉ta꞉ kota꞉ koto wanda꞉halima꞉ta꞉ ikana꞉ma꞉ pi mina꞉ yu wia handeteke hayeke Koda꞉na꞉ pi na opimikime. Kutu pieketa꞉ mo hande kawaso tukiki pa꞉ta꞉ta꞉ wanda꞉hali hombo a꞉nda꞉ iki paeyaota꞉ ketepo hata꞉ mo ikalima꞉ peteleekeme.
21 Koto ikalita꞉ mo hande wetepena꞉ bapitaisi hau epolo piekeeki manda mieke ikalie. Do ame pu haleme bapitaisi hauma꞉ta꞉ pa ika꞉ lokena꞉ ha̱i̱ tanda꞉ pelemeeki dia꞉ya꞉la꞉pate ika꞉ epeke hone tekema꞉ Koda꞉ pa꞉ta꞉ pi la꞉ witolo hamena꞉ mo ikalima꞉ iki petolo hala꞉me. Do bapitaisi hauta꞉ mo Yesu Ketisona꞉ paa tiaeyeke ekima꞉ iki petolo hala꞉me.
22 Koto Ketisota꞉ ame hepeni tukiki pa꞉ta꞉ pua Koda꞉na꞉ popeke nane hata꞉ mo enisolo haliweki make hepeni nane haleme you haliweki make mo wele pita꞉la꞉ ekimanu make iki paeyao ipikana꞉ma꞉ handeteke hala꞉me.