13
Wae ale manuna꞉ onkoluma꞉ pi
(Maka 4꞉1-9, Luku 8꞉4-8)
1 Koto natena꞉ kone Yesuma꞉ mo da mina꞉pa꞉lao mo hande ikali leke mone tea꞉na꞉ pua wanda꞉hali pa꞉ta꞉ pi walo pitiekeme.
2 Wanda꞉hali wopu ipiki pa꞉ta꞉ a꞉pa mombelemeke handaata꞉ Yesuma꞉ mo wanda꞉hali ikali tea꞉na꞉ haena꞉ ipikita꞉ palai kawaso pa꞉ta꞉ pua pitiekeme.
3 Kutupa ipikana꞉ma꞉ iki pa꞉ta꞉ onkoluma꞉ laa pimanu wopu waleekeme.
Dupa leekeme. Nate ma꞉nda꞉na꞉ hali ma꞉nda꞉ma꞉ wae alemanu tande loluekema꞉ peekeme.
4 Kutupa ipikana꞉ma꞉ tande lea꞉tiki pulu haena꞉ mandane wae manuta꞉ pota꞉na꞉ lopa꞉ lopa꞉ pieke ekita꞉ ba titima꞉ a꞉pa talopu nemekeme.
5 Kutaata꞉ mandane wae manuta꞉ toopimanu manda taleeke kenke sikina꞉ lopeekeme. Mo kenketa꞉ aneke na wiekeeki yaalo mo wae sunuta꞉ koto kone opeekepate ika꞉ piki onina꞉ toluma꞉ wopu na puayeke ekina꞉
6 nate talo hata꞉ta꞉ pou ta hapiekeme.
7 Kutaata꞉ mandane wae manuta꞉ tekeke hake ale polu pa꞉ta꞉manu lopeekeme. Kutupa tekeke hake alemanu opa꞉liaaso hata꞉ hande wae alemanu opolo pieke ekita꞉ tombuaeyekeme.
8 Kutu piekepate mandane wae ale manuta꞉ epeeke kenkena꞉ lopeeke handaa napeke epeke tupa꞉ wiekeeki manuta꞉ dupae. Mandaneeki 100 tupa꞉ mandaneeki 60 tupa꞉ mandaneeki 30 tupa꞉ wiekeme.
9 Kutupa Yesuma꞉ koto ipika꞉ onkoluma꞉ pi paeyaaso alota꞉ Katake lomba꞉la꞉ halima꞉ wotu opina꞉e leekeme.
Onkoluma꞉ pi manuma꞉ leeke ekina꞉ teke
(Maka 4꞉10-12, Luku 8꞉9-10)
10 Koto hoki naneta꞉ mo disaipolo haliwekima꞉ Yesu pa꞉ta꞉ a꞉pa lota꞉ pitolo alota꞉ Nakana꞉ma꞉ do wanda꞉hali pa꞉ta꞉ pi alo hata꞉ta꞉ ekipeke onkoluma꞉ pima꞉ la halepe.
11 Yesuma꞉ ika꞉ pi hombo peaaso alota꞉ Mo hepenina꞉ Kilu Tombuao Hala꞉ ekina꞉ a꞉mbao ula꞉ hone manuta꞉ ikita꞉ opua hone wilimipate mo wanda꞉halita꞉ hone na wina꞉yeke onkoluma꞉ pi alome.
12 Pa ekipeke. Ala꞉ta꞉manu amba꞉ wia hala꞉ somema꞉ta꞉ ipika꞉eki lombei pina꞉ loluekema꞉ haka꞉ta꞉ pao halia꞉ka꞉na꞉ milieke. Pate ala꞉ta꞉manu wopu na wiki natehali someta꞉ ipika꞉ wia hala꞉ alesiki kone ma꞉nda꞉ma꞉ yoka꞉ mea pelieke.
13 I̱ma꞉ do onkoluma꞉ pimanu laa iki pa꞉ta꞉ pi alo ekina꞉ teketa꞉ do ekina꞉yeke alome. Ika꞉ lekema꞉ta꞉ handa꞉peke ya꞉la꞉pate na handelememe. Ikana꞉ma꞉ opuluekema꞉ katake wia pelimipate pa na opu make hone na wilimiki handaa alo alome.
14 Mo hande potopede hali Aisayama꞉ wape pieke wapena꞉ la꞉ ula꞉ pita꞉ ame do wanda꞉halima꞉ yaalememe. Koto yaaleme ekita꞉ dupa
Do wanda꞉halima꞉ opitolo opitolo halo pelemepate ika꞉ hone pa꞉ta꞉ na wilimikie.
Kutaa make handolo handolo halo pelemepate ika꞉ honema꞉ta꞉ na handilimikie.
15 Pa ekipeke. Ika꞉ hone manuta꞉ timba꞉ lo make ika꞉ katakemanu poko make ika꞉ lekemanu handupu pelememe.
Koda꞉ma꞉ alota꞉ Kutu piki haumanu na pia꞉ka꞉na꞉ yoluta꞉ ika꞉ lekema꞉ epeke hando make ika꞉ katakema꞉ epeke opu make ika꞉ honema꞉ epeke hone wia hata꞉ ikana꞉ma꞉ I̱ pa꞉ta꞉ la꞉ka꞉la epolo pimika꞉na꞉ yoluta꞉ kota꞉ I̱ma꞉ iki wamo pulu pua꞉me la꞉la꞉me leekeme.
16 Amba꞉ta꞉ Aisayama꞉ kutu piki pi leekepate ameta꞉ I̱ma꞉ iki pa꞉ta꞉ dupa alome. Ikana꞉ma꞉ ta꞉na꞉ma꞉ homo hapa꞉peke. Pa ekipeke. Ika꞉ lekema꞉ta꞉ ala꞉ta꞉ ala꞉ta꞉ handa꞉pa꞉peke yo make ika꞉ katakema꞉ pi epeke opu pia꞉peke ya꞉la꞉me.
17 I̱ma꞉ iki pa꞉ta꞉ ota꞉ pi alome. Amba꞉ haemeke potopede haliweki wopuma꞉ make mandane tikitiki piki haliweki wopuma꞉ make ikana꞉ma꞉ ame do handeleme haumanu handuluekema꞉ hone wopu pieke taapo haemekepate na handemekeme. Koto haliwekima꞉ta꞉ do opueleme pimanu make opuluekema꞉ hone wopu pieke taapo haemekepate na opimikime.
Wae nokopa꞉la꞉ onkoluma꞉ pina꞉ teke la haleekeeki
(Maka 4꞉13-20, Luku 8꞉11-15)
18 Yesuma꞉ iki pa꞉ta꞉ alota꞉ Mo wae ale nokopa꞉la꞉ onkoluma꞉ pi alo ekina꞉ teketa꞉ hone wopu uemena꞉ma꞉ ikana꞉ma꞉ wopu opua꞉pa꞉peke.
19 Mo hande Koda꞉na꞉ Kilu Tombuao Hala꞉ ekina꞉ pi wala꞉la꞉ ekina꞉ pi opitelemepate hone wopu wia na mea mendieleme wanda꞉hali ikita꞉ mo hande pota꞉na꞉ lopeeke wae manuma꞉ handelememe. Ika꞉ puki pa꞉ta꞉ nokopeeke pi manuta꞉ Sadanima꞉ a̱i̱ a꞉pa yoka꞉ mea pula꞉me.
20 Kutupa mo waleme pi opuolo hata꞉ ta꞉na꞉ma꞉ homaa a̱i̱ mea miniki haleme wanda꞉hali ikita꞉ mo hande toopi manda wieke kenkesiki pa꞉ta꞉ lopeeke wae manuma꞉ handelememe.
21 Mo opiteleme pita꞉ ika꞉ puki tukiki nane wopu na wina꞉ alemeke handaa hosiki hao hao peaata꞉ koto kone paelieke. Pa ekipeke. Mo Pi Seliapo wala꞉la꞉ ekina꞉ kiaasa꞉ halima꞉ta꞉ iki pa꞉ta꞉ tanda o ka꞉nda꞉manu hala꞉leketa꞉ kota꞉ koto kone lopo halememe.
22 Kutupa mo hande tekeke hake pu polu pa꞉ta꞉ lopeeke wae alemanu tupa꞉ta꞉ mandane wanda꞉halima꞉ pi epeke tupa꞉ opua miniki halemepate do kenkena꞉ haumanu pa꞉ta꞉ hone tieke eleke eleke wopu witelemeeki pita꞉ mani tieke wopu amu pulueke hone witelemeeki yaapoma꞉ Koda꞉na꞉ pi tombuatiki pina꞉ lea꞉ka꞉na꞉ta꞉ epeke kilikimanu na a꞉ilimikie.
23 Kutu pu halemepate mo waleme pi opuolo epeke mea miniki haleme wanda꞉hali ikita꞉ mo epeke kenkena꞉ lopeeke wae manuma꞉ handelememe. Ika꞉ kiliki a꞉elo peleme tupa꞉ta꞉ dupa. Mandane wanda꞉hali ika꞉ kilikita꞉ 100manu tupa꞉ mandane ekita꞉ 60manu tupa꞉ mandane ekita꞉ 30manu a꞉eyeke tupa꞉ halimikie leekeme.
Hoke waemanu tande leekeeki
24 Koto la paeyeketa꞉ Yesuma꞉ iki pa꞉ta꞉ onkoluma꞉ pi ma꞉nda꞉ta꞉ dupa leekeme. Mo hepenina꞉ Kilu Tombuao Hala꞉ ekita꞉ dupiki hone wia꞉pa꞉peke. Hali homekema꞉ ipika꞉ e pa꞉ta꞉ epeke waemanu tande laa peekeme.
25 Kutupa peeke hoki naneta꞉ timba ma꞉nda꞉na꞉ mo wanda꞉hali u pelia pemeke naneta꞉ ipika꞉ a꞉nda꞉ tunkuliki hali homeke a꞉pa mo hande epeke wae taapuna꞉ hoke wae tande la꞉ pamba peekeme.
26 Mo hande epeke wae alemanu opa napeke honke pankeeke pita꞉ma꞉ta꞉ kota꞉ mo hande hoke ambu apa꞉tao opekeeki manuta꞉ peneme yeekeme.
27 Koto ekina꞉ mo hande e teke halina꞉ e pokaeyeke haliwekima꞉ ipiki pa꞉ta꞉ a꞉pa alota꞉ Tekehalio. Naka꞉ ena꞉ epeke kiliki homeke tande lepate do hoke ambu manuta꞉ ekipa a꞉pa hao pa꞉la꞉pe lemekeme.
28 Ipikana꞉ma꞉ ika꞉ pi hombo peaaso alota꞉ Ya a꞉nda꞉ tunkuliki hali ma꞉nda꞉ma꞉ do hoke wae tande alo pia꞉me leekeme. Koto leeke ikana꞉ma꞉ alota꞉ Mo hoke ambu manuta꞉ nikana꞉ma꞉ talo baalo pomonope laa lota꞉ pimiki handaa ipikana꞉ma꞉
29 ika꞉ pi hombo peaaso alota꞉ Dia꞉me. Mo hoke ambu talemeka꞉na꞉ta꞉ mo epeke kilikimanu tonka꞉na꞉ talo baama꞉na꞉ma꞉
30 mo napeke naa pilia꞉ nate epena꞉ yu wia hata꞉ hokeeki epekeeki pa apa꞉tao opena꞉e. Koto nate opolo epea꞉ka꞉na꞉ta꞉ I̱ma꞉ mo napeke momba꞉la꞉la꞉ haliweki pa꞉ta꞉ mo hoke ambu amba꞉la talo tonka tonka pea tia pua panane yanka꞉pa꞉peke lolueke. Kutaata꞉ mo epeke napekemanu talaata꞉ ya amu pitolo da pa꞉ta꞉ wia꞉pa꞉peke lolueke lea꞉me leekeme.
Masidadi waena꞉ onkoluma꞉ pi
(Maka 4꞉30-32, Luku 13꞉18-19)
31 Yesuma꞉ta꞉ iki pa꞉ta꞉ onkoluma꞉ pi ma꞉nda꞉ la halolo hata꞉ alota꞉ Mo hepenina꞉ Kilu Tombuao Hala꞉ ekita꞉ dupiki hone wia꞉pa꞉peke. Hali homekema꞉ ipika꞉ e pa꞉ta꞉ mo ki̱mi̱le̱ma꞉ handeke ale masidadi kiliki nokopa peekeme.
32 Mo kilikita꞉ ota꞉ hodikale siki yeke kiliki yekepate ipika꞉ opolo hata꞉ta꞉ mandane wae manuna꞉ opa꞉la꞉ tombo lombei peao opaa ti tupa꞉ halieke. Kutu pia꞉ka꞉na꞉ta꞉ kota꞉ bamanu a꞉pa ipika꞉ paleke pa꞉ta꞉manu ika꞉ dakemanu halimikie.
Palaowa pombei yaasa꞉ yisitina꞉ onkoluma꞉ pi
(Luku 13꞉20-21)
33 Yesuma꞉ iki pa꞉ta꞉ onkoluma꞉ pi ma꞉nda꞉ paa la haleekeme dupa. Mo hepenina꞉ Kilu Tombuao Hala꞉ ekita꞉ yisitima꞉ handa꞉la꞉me. Wanda꞉ homekema꞉ mo yisitimanu mea sini tieke tumbiki palaowa tapu dakole pealieke. Kutu pilia꞉ hoki naneta꞉ koto palaowa paeyao pombei ya halieke leekeme.
Yesuma꞉ waleeke ekita꞉ onkoluma꞉ pima꞉ homeke waleekeeki
(Maka 4꞉33-34)
34 Yesuma꞉ mo hande mombelemeke wanda꞉hali pa꞉ta꞉ waleeke pi paeyaota꞉ onkoluma꞉ma꞉ homeke waleekeme. Ipikana꞉ma꞉ pi homeke siki ma꞉nda꞉ onkoluma꞉ pima꞉ na leke pa na la haleekeme. Dia꞉me. Pi paeyaota꞉ ota꞉ onkoluma꞉ pima꞉ homeke waleekeme.
35 Koto pieke ekita꞉ amba꞉ hande potopede halima꞉ la꞉ wieke pimanu yaena꞉ yeke piekeme. Koto hande potopede halima꞉ la꞉ wieke pita꞉ dupa
Wanda꞉hali pa꞉ta꞉ pi loluekema꞉ta꞉ onkoluma꞉ manuma꞉ homeke lolueke.
Do kenke wepia wieke ane kini pu mea a꞉pa ame do halome anema꞉ a꞉mbao ula꞉ pi manuta꞉ iki pa꞉ta꞉ I̱ma꞉ peneme yao la halueke leekeme.
Hande hoke waena꞉ onkoluma꞉ pina꞉ teke
36 Yesuma꞉ koto mombelemeke wanda꞉hali mina꞉pa꞉lao da tukiki pa꞉ta꞉ honda꞉ pambolo haena꞉ ipika꞉ disaipolo haliwekima꞉ ipiki pa꞉ta꞉ a꞉pa alota꞉ Mo hande ena꞉ nokopeeke wae alena꞉ onkoluma꞉ pina꞉ teke niki la kuelena꞉e laa lota꞉ pimikime.
37 Yesuma꞉ kota꞉ pi hombo peaaso alota꞉ Mo hande epeke wae alemanu tande leeke hali tupa꞉ta꞉ mo Wanda꞉halina꞉ Eiyekee.
38 Kutupa mo e tupa꞉ta꞉ do kenkee. Mo epeke waemanu tupa꞉ta꞉ mo Koda꞉na꞉ Kilu Tombuao Hala꞉ pa꞉ta꞉ haleme wanda꞉halie. Mo hande hoke ambumanu tupa꞉ta꞉ mo hoke Sadanina꞉ wanda꞉halie.
39 Kutupa mo hande hoke wae tande leeke a꞉nda꞉ tunkuliki some tupa꞉ta꞉ Sadanie. Mo napeke momba꞉lapeke nate tupa꞉ta꞉ do kenke paelo pa꞉la꞉ekie. Kutupa napeke mombeleeke haliweki tupa꞉ta꞉ mo hande enisolo haliwekie.
40 Pa mo hande hoke ambumanu yoka mea tonkao pua tina꞉ momba꞉la yankolo pieke tupa꞉ta꞉ kota꞉ do kenke ya paelia꞉ dina꞉ make mandake hau kone pilieke.
41 Koto dina꞉ta꞉ mo Wanda꞉halina꞉ Eiyekema꞉ ipika꞉ enisolomanu tapaalieke. Ikana꞉ma꞉ ipika꞉ Kilu Tombuao Hala꞉ ekina꞉ tukiki pa꞉ta꞉ hala꞉ hoke hau pu haleme wanda꞉hali pita꞉ mo hoke haumanu pu tiaasa꞉ wanda꞉halimanu paeyao tonka꞉na꞉ paeyao yokilimikie.
42 Kutaata꞉ mo hoke wanda꞉hali paeyaota꞉ mo enisolo manuma꞉ tonuma꞉ ti tieke to hala꞉ alena꞉ mea lopaalimikie. Koto pa꞉ta꞉ta꞉ ika꞉ kake lenkene laaso hata꞉ e̱ wi lo halimikie.
43 Koto natena꞉ta꞉ mo ika꞉ Apa꞉na꞉ Kilu Tombuao Hala꞉ tukiki pa꞉ta꞉ epeke hau peleme wanda꞉hali ikita꞉ mo natena꞉ pa̱a̱ tupa꞉ pu halimikie. Hali epima꞉ ipika꞉ katake lombea꞉ka꞉na꞉ta꞉ kota꞉ do pi ota꞉ opina꞉e.
Ti teke pita꞉la꞉ onkoluma꞉ pi
44 Mo hepenina꞉ Kilu Tombuao Hala꞉ ekita꞉ do tupa꞉e. Hali homekema꞉ ma꞉nda꞉na꞉ e mopuna꞉ pa peekepate kone amba꞉ haliwekima꞉ ti teke pimikieki handa꞉ wiekeme. Kutupata꞉ ipikana꞉ma꞉ ta꞉na꞉ tiekema꞉ homolo hata꞉ paa a꞉nka꞉la꞉ pambaata꞉ mo ti teke wieke e hamba꞉peke mani mandaneeki wopu muluekema꞉ ipika꞉ wia hayeke alemanu paeyao mandane wanda꞉halima꞉ hambena꞉ tapao mani meaata꞉ koto kone mo ti teke piekeeki handeeke e hambuluekema꞉ paa la꞉ka꞉la peekeme.
Sekete hapeke belekena꞉ onkoluma꞉ pi
45 Hepenina꞉ Kilu Tombuao Hala꞉ ekita꞉ do tupa꞉ make ya꞉la꞉me. Hali homekema꞉ mo mani tieke mia꞉peke sekete hapeke beleke seliapo weita꞉la꞉me.
46 Kutupa ipikana꞉ma꞉ nate homeke a꞉nda꞉ koto beleke teke ota꞉ ta꞉ta꞉ pupapeke seliapo pikieki handa꞉ wia꞉ka꞉na꞉ta꞉ kota꞉ koto beleke teke hambuluekema꞉ ipika꞉ wia hala꞉ ala꞉ta꞉ ala꞉ta꞉ paeyao ma꞉nda꞉ma꞉ hambena꞉ tapaa tapaa pilieke.
Tenki nuna꞉ onkoluma꞉
47 Hepenina꞉ Kilu Tombuao Hala꞉ ekita꞉ do tupa꞉ make ya꞉la꞉me. Mandane ta꞉peli mu haleme haliwekima꞉ ika꞉ tenki nu tieke mea ikali lekena꞉ lopao ta꞉ta꞉ ta꞉ta꞉ piki ta꞉pelimanu paeyao wopu mondu haleme.
48 Kutupa mo tenki nu a꞉nda꞉ tumbia꞉ka꞉na꞉ta꞉ kota꞉ ikali tea꞉ nane yola꞉ mea wia hata꞉ hokeeki epekeeki telipa u halememe. Mo epekeeki manuta꞉ ika꞉ kawasomanu pa꞉ta꞉ lopaota꞉ hokeeki manuta꞉ bao halememe.
49 Kutupa mo paelo pa꞉la꞉ nate opolo epea꞉ka꞉na꞉ta꞉ koto tupa꞉ kone pilieke. Mo hande enisolo manuma꞉ opolo a꞉paata꞉ mo epeke wanda꞉hali taapu halimi hoke wanda꞉hali talopu mea momba꞉lao
50 mo ti tieke to hala꞉ ale pa꞉ta꞉ mea lopa꞉nialimikie. Koto pa꞉ta꞉ta꞉ ika꞉ kake lenkene laaso hata꞉ e̱ wi lo halimikie.
Amba꞉ epeke ale pita꞉ panake epeke ale yaapo
51 Yesuma꞉ iki lota꞉ pitolo alota꞉ Do alo pina꞉ tekemanu iki hone wilimipe laa leekeeki ikana꞉ma꞉ hombo peaaso alota꞉ Aowe lemekeme.
52 Koto lemeke opitolo Yesuma꞉ alota꞉ Hali ma꞉nda꞉ epi a꞉nda꞉ma꞉ta꞉ mo amba꞉ la꞉ wieke Lo Pimanu walo hala꞉ hali hata꞉ta꞉ pa mo hepenina꞉ Kilu Tombuao Hala꞉ ekina꞉ hau paeyao miniki hala꞉ hali make haya꞉ka꞉na꞉ta꞉ kota꞉ koto someta꞉ mo da tiekena꞉ tekehali tupa꞉ hata꞉ ipika꞉ momba꞉la nu pindu hao u hala꞉ da panda꞉ pa꞉ta꞉ pua amba꞉ epeke alemanu make panake epeke alemanu make apa꞉tao mea a꞉pa peneme yaasa꞉ somema꞉ handilieke leekeme.
Na꞉sa꞉tete da wanda꞉halima꞉ Yesu kiaemekeeki
(Maka 6꞉1-6, Luku 4꞉16-30)
53 Koto onkoluma꞉ pimanu paeyao la paeyeketa꞉ Yesuma꞉ koto pa꞉ta꞉ mina꞉pa꞉lao
54 ipika꞉ teke da nane paa peekeme. Ipikana꞉ma꞉ ika꞉ pi hotu haemeke da pa꞉ta꞉ pi waleekeeki opitolota꞉ wanda꞉hali wopuma꞉ penkili pimikime. Do somema꞉ dupiki mana꞉ pi manuta꞉ hando pa꞉ta꞉ opia꞉pe laa lota꞉ pualu alu pitolo alota꞉ Mo hande ipika꞉ pieke na handeke hau manuna꞉ teketa꞉ ekipape laata꞉
55 Ipikita꞉ mo hande da a꞉eta꞉la꞉ halina꞉ eiyeke kutupa ipika꞉ inkikita꞉ Meti dia꞉yeke yekea. Ipikita꞉ mo hande Dia꞉mesi Diosepe Saimono Diudasi do hama̱la̱꞉ hama̱la̱꞉na꞉ hameke dia꞉yeke yekea.
56 Kutupa ipika꞉ beliki tonu make niki ame̱le̱ mandakena꞉ na halemeke yekea laata꞉ Do somema꞉ do ala꞉ pi paeyaota꞉ hando pa꞉ta꞉ mea pa꞉la꞉pe laata꞉
57 ikana꞉ma꞉ ipiki kiaemekeme. Kutu pimiki ekina꞉ Yesuma꞉ iki pa꞉ta꞉ alota꞉ Potopede hali ma꞉nda꞉ta꞉ da ma꞉nda꞉ wanda꞉halina꞉ leke popelekena꞉ta꞉ biki wilia꞉pate pa ipika꞉ teke da nane o ipika꞉ wanda꞉halina꞉ leke popelekena꞉ta꞉ biki na wilieke leekeme.
58 Koto ekina꞉ ikana꞉ma꞉ ipiki pa꞉ta꞉ hone wopu na tulaemeke handaa kota꞉ ipikana꞉ma꞉ make mo na handeke haumanu iki tukiki pa꞉ta꞉ wopu na piekeme.