11
Dionima꞉ dipula pita꞉ pi tapaeyekeeki
(Luku 7꞉18-35)
1 Yesuma꞉ ipika꞉ 12 disaipolo haliweki pa꞉ta꞉ koto mana꞉ pimanu la hala paeyeke hoki naneta꞉ koto kenke mina꞉pa꞉lao pa mo teke pa꞉ta꞉manu haemeke daonimanu pa꞉ta꞉ pua mo Koda꞉na꞉ mana꞉ pimanu walo moka꞉la꞉ tiao make mo Pi Seliapo walo hayekeme.
2 Kutu pitolo haena꞉ mo hande bapitaisi peao hayeke some Dionima꞉ mo dipula pita꞉ mo Ketisoma꞉ kutupiki haumanu pita꞉la꞉me leekeeki opuata꞉ ipika꞉ disaipolo haliwekimanu Yesu pa꞉ta꞉ tapaeyekeme.
3 Mo haliwekima꞉ Yesu pa꞉ta꞉ a꞉pa alota꞉ Do nika꞉ lota꞉ pita꞉la꞉eki ota꞉ la kuelena꞉e. Dionima꞉ hali ma꞉nda꞉ ipilieke lea꞉ halita꞉ nekepe o ma꞉nda꞉ epena꞉ yu wia hamonope leekeme.
4 Yesuma꞉ iki pa꞉ta꞉ hombo peaaso alota꞉ Ikita꞉ paa la꞉ka꞉la pua do ika꞉ lekema꞉ handeleme ekimanu make katakema꞉ opiteleme ekimanu make Dioni pa꞉ta꞉ dupa pua la hala꞉pa꞉peke.
5 Hande leke holu piki wanda꞉hali ameta꞉ ki lelememe. Dola꞉pake wanda꞉hali make tiao pominelememe. Kindi yeni haeme wanda꞉hali make ameta꞉ epea halememe. Katake pokeme wanda꞉halina꞉ katake make lumbula꞉me. Homea꞉ wanda꞉hali make paa da꞉taa tiao haena꞉ la꞉la꞉me. Kutupa mo Pi Seliapota꞉ natehali wanda꞉hali pa꞉ta꞉ wala꞉la꞉me.
6 Koto ekina꞉ do I̱ma꞉ pitolo haumanu handaa ka꞉nda꞉ma꞉ na homa꞉la꞉ halima꞉ta꞉ ta꞉na꞉ma꞉ homo hala꞉me laa pua lapa꞉peke leekeme.
7 Kutupa mo Dionina꞉ hoki nane telimiki haliweki la꞉ka꞉la paa pulu haena꞉ta꞉ Yesuma꞉ mo wanda꞉hali pa꞉ta꞉ Dionina꞉ pi dupa lawaeyekeme. Ikana꞉ma꞉ mo hapu hala꞉ alena꞉ puluta꞉ aleke handulumeke hone wimipe. Poma꞉ hambe make mea aneya moneya pu tonkua꞉la꞉eki handulumeke hone wimipe. Dia꞉me.
8 Koto alena꞉ puluta꞉ aleke handulumeke hone wimipe. Ika꞉ honema꞉ta꞉ epeke aka꞉ seliapo yameke hali halia꞉eki handulumeke hone wimipe. Dia꞉me. Aka꞉ seliapo yameke haliwekita꞉ mo kini haliwekina꞉ pitu hala꞉ alenina꞉ homeke handa꞉peke ya꞉la꞉pate
9 I̱ opuono a̱i̱ la kipa꞉e. Koto pemeke dina꞉ta꞉ aleke handulumeke hone wimipe. Koda꞉na꞉ pi la꞉ mea halaasa꞉ potopede hali yekepe. Aowe. Ipikita꞉ potopede hali ya꞉la꞉pate pa potopede halina꞉ hauta꞉ ota꞉ lombei piki some hala꞉me.
10 Koto some Dionita꞉ mo hande Baibolona꞉ wape pa꞉la꞉ pina꞉ Koda꞉ma꞉ alota꞉
Ya pi lawalo pula꞉ hali amba꞉la mo naka꞉ pota꞉ tiki tiki yawaena꞉e tapaalueke
leeke pita꞉ kota꞉ ipikina꞉ leekeme.
11 I̱ma꞉ ota꞉ pi alome. Mo hande bapitaisi peao haya꞉ hali Dionita꞉ mo amba꞉ haemeke hali paeyao ota꞉ lombei piki some hala꞉me. Pate mo hepenina꞉ Kilu Tombuao Hala꞉ ekina꞉ ota꞉ biki na ula꞉ some a꞉nda꞉ma꞉ta꞉ Dioni lombei pa꞉la꞉me.
12 Dionima꞉ mo hande pimanu walea꞉ natena꞉ kini pu mea a꞉pa ame do natena꞉ kone mo hepenina꞉ Kilu Tombuao Hala꞉ ekima꞉ lombei lombei pua꞉tiki ipu hala꞉me. Kutupa mo honkopu hao haleme haliwekima꞉ koto hepenina꞉ Kilu Tombuao Hala꞉eki miniki halememe.
13 Amba꞉ haemeke potopede haliweki paeyaoma꞉ make mo hande Mosesina꞉ la꞉ wieke Lo pi manuma꞉ make Koda꞉na꞉ pi wala꞉tiki a꞉paata꞉ Dionina꞉ nate opolo a꞉pa haena꞉ta꞉ lo naeyekeme.
14 Kutupa ikana꞉ma꞉ mo hande haliwekima꞉ la꞉ wimiki pimanu opuluekema꞉ hone pimika꞉na꞉ta꞉ kota꞉ mo hande haliwekima꞉ ipilieke laa la꞉ wimi Elaidiata꞉ Dionina꞉ lemeke yekeme.
15 Ika꞉ katakema꞉ opua꞉peke yemeka꞉na꞉ta꞉ kota꞉ opua꞉pa꞉peke.
16 Amedo do haleme wanda꞉halita꞉ alekema꞉ handelememe lonope. Ikita꞉ mo makedi hama putupa alu pea pilimi wekiwandiki leke halememe. Ane kalale pitimi tapakema꞉ mone kalale pitimi tapake wi la꞉ moneao alota꞉
17 Ikana꞉ma꞉ sama꞉ puemena꞉yeke tapeke luma꞉pate ikana꞉ma꞉ sama꞉ na piki kiaememe.
Kutu pimikita꞉ a꞉ta꞉ piki emelimanu loma꞉pate e̱ na leke kiaememe alememe.
18 Dioni a꞉pa ikali ne na neeke ekita꞉ hande wanda꞉halima꞉ alota꞉ Ipiki pa꞉ta꞉ta꞉ hoke temoko pila꞉me lemekeme.
19 Pate Wanda꞉halina꞉ Eiyeke a꞉pa ikali ne yaapo no hayeke ekita꞉ koto wanda꞉halima꞉ kone handolo alota꞉ Do hali handa꞉pe. Ipikita꞉ ikali ne wopu no hake some ya꞉ka꞉ta꞉me. Kutupa ipikita꞉ mo hande dakisi mu make hoke hau pu haleme haliweki ame̱le̱ apa꞉taala꞉me lemekeme. Kota꞉ mo hone wiki hauma꞉ta꞉ ipika꞉ pu hala꞉eki manuma꞉ ipika꞉ honeta꞉ ota꞉ epeke hone o hoke hone laa pa peneme yaasa꞉me.
Wanda꞉halima꞉ puki na la꞉ka꞉la꞉lemekeeki
(Luku 10꞉13-15)
20 Mo hande Yesuma꞉ ipika꞉ na handeke haumanu pu hayeke daoni pa꞉ta꞉manu haemeke wanda꞉halima꞉ta꞉ mo haumanu handaa kone ika꞉ hoke haumanu mina꞉pa꞉lao na la꞉ka꞉la꞉lemeke yeke handaa
21 ipikana꞉ma꞉ koto da teke pa꞉ta꞉manu haemeke wanda꞉hali hando alo alota꞉ A꞉ta꞉e. Kotaasini daoni neke pa꞉ta꞉ ka꞉nda꞉ tieke ma꞉nda꞉ ipuluekema꞉ pila꞉me. Betesaidao. Neke pa꞉ta꞉ make kutu piki hau kone ipuluekema꞉ pila꞉me. I̱ma꞉ mo ipiliki pa꞉ta꞉ pua꞉ na handeke haumanu a꞉nda꞉ mo hande daoni yaapo Taiya Saidoni pa꞉ta꞉ pua꞉ka꞉na꞉ yoluta꞉ kota꞉ koto da yaapo pa꞉ta꞉ haleme wanda꞉hali ika꞉ puki la꞉ka꞉la꞉meka꞉ta꞉me laa Koda꞉ma꞉ handena꞉ta꞉ busa꞉ pitikimanu wepia yamaata꞉ lanka꞉ apolo kitulu pimime.
22 I̱ma꞉ ipiliki pa꞉ta꞉ta꞉ ota꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Taiya Saidoni yaapo pa꞉ta꞉ halo pa꞉la꞉ a꞉ta꞉ma꞉ homa꞉la꞉ ekita꞉ mo ipiliki Kotaasini Betesaida yaapo pa꞉ta꞉ kulu pa꞉la꞉eki ota꞉ haka꞉ta꞉ pao halieke.
23 A꞉pei Kapeneamio. Naka꞉ honema꞉ neketa꞉ oli hepeni nane naka꞉ kone mea a꞉meiyalueke hone wilipe. O dia꞉me. Neketa꞉ ti to hala꞉ ale pa꞉ta꞉ mea tapaalieke. I̱ma꞉ neke pa꞉ta꞉ pua꞉ na handeke haumanu a꞉nda꞉ mo hande Sodomo daoni pa꞉ta꞉ pua꞉ka꞉na꞉ yoluta꞉ kota꞉ koto data꞉ ame pa hao halo pia꞉me.
24 I̱ma꞉ neke pa꞉ta꞉ ota꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Sodomo halo pa꞉la꞉ a꞉ta꞉ma꞉ homa꞉la꞉ ekita꞉ mo neke Kapeneami pa꞉ta꞉ kulu pa꞉la꞉eki ota꞉ haka꞉ta꞉ pao halieke.
Hoto pituluekema꞉ta꞉ I̱ pa꞉ta꞉ epoe leekeeki
(Luku 10꞉21-22)
25 Koto toma꞉na꞉ Yesuma꞉ Koda꞉ pa꞉ta꞉ alota꞉ Apa꞉o. Neketa꞉ do kenke oli hepeni yaapona꞉ Tekehalio. Keiyae tieke aloe. Pa ekipeke. Nakana꞉ma꞉ mo hande handa꞉wiki wanda꞉hali pa꞉ta꞉ a꞉mbao wina꞉ le hau manuta꞉ pa mo hone wopu na wiki wanda꞉hali pa꞉ta꞉ peneme yaaleme.
26 Aowe Apa꞉o. Koto ekita꞉ naka꞉ hone piekeyeke eki yaena꞉yeke pina꞉ aleme laa leekeme.
27 Ala꞉ta꞉ ala꞉ta꞉ paeyaota꞉ ya Apa꞉ma꞉ I̱ pa꞉ta꞉ amba꞉ ka꞉la꞉me. Eiyeketa꞉ hali ma꞉nda꞉ma꞉ ota꞉ na handa꞉la꞉pate Apa꞉ma꞉ homeke handa꞉la꞉me. Koto mandake tupa꞉ kone Apa꞉ta꞉ hali ma꞉nda꞉ma꞉ ota꞉ na handa꞉la꞉pate Eiyekema꞉ homeke handa꞉la꞉me. Koto pa꞉la꞉ ekina꞉ mandane wanda꞉halima꞉ make Ateke handena꞉ Eiyekema꞉ iki ma̱leke lia peneme yaeya꞉ka꞉na꞉ta꞉ handilimikie.
28 Mo ka꞉nda꞉piki alemanu tia pominolo hata꞉ soka꞉la꞉ma꞉ homa haleme wanda꞉hali paeyao iki pa꞉ta꞉ ya kulu polo hoto pita꞉la꞉ pa꞉ta꞉ ula꞉ma꞉ muemena꞉ I̱ pa꞉ta꞉ a꞉pa꞉peke.
29 I̱ma꞉ iki pa꞉ta꞉ kitolo tita꞉ mea ika꞉ peiyokona꞉ tia hata꞉ta꞉ ya hau honda꞉ mea pia꞉pa꞉peke. Pa ekipeke. I̱ta꞉ kimelema꞉ hata꞉ ya pukima꞉ homu pea halome. Koto ekima꞉ta꞉ ikana꞉ma꞉ ika꞉ pukina꞉ lopaasa꞉ ekita꞉ ana꞉na꞉ milimikie.
30 Do I̱ma꞉ ika꞉ peiyokona꞉ tuemena꞉ mea tiaaso tima꞉ta꞉ ika꞉ peiyoko na hoeyaalieke. Kutaa mo I̱ma꞉ mea tipe alo ka꞉nda꞉ta꞉ ka꞉nda꞉ wopu na piki yapa꞉ pilieke alome leekeme.