21
Polota꞉ Diutuseleme da nane peekeeki
1 Nikana꞉ma꞉ koto wanda꞉hali pa꞉ta꞉ a꞉taloe la iki mina꞉pa꞉lao poma꞉me. Palai kawasona꞉ pitata꞉ tikitikina꞉ tunkula pua Kosi da pa꞉ta꞉ poma꞉me. Kutupa da ma꞉nda꞉ kelepeeketa꞉ Lodesi da pa꞉ta꞉ opolo puata꞉ pa mo Padata da pa꞉ta꞉ poma꞉me.
2 Koto da pa꞉ta꞉ hata꞉ Pinisia nane polu pia꞉ palai kawaso ma꞉nda꞉ handa꞉ wiaata꞉ koto kawasona꞉ pita poma꞉me.
3 Koto pulu hata꞉ta꞉ Saipotasi hoki handoma꞉pate koto hoki nepoko nane pua mo Sitia nane poma꞉me. Taiya da pa꞉ta꞉ opolo puata꞉ kenkena꞉ hola꞉pa poma꞉me. Koto Taiya da pa꞉ta꞉ mo kawasona꞉ mea wia pemeke alemanu londolo wimime.
4 Koto pa꞉ta꞉ pua mandane disaipolo wanda꞉hali handa꞉ wiaata꞉ pula homeke iki ame̱le̱ pelia haoma꞉me. Holi Sipitidima꞉ ika꞉ hone u tiaaso haena꞉ ikana꞉ma꞉ Polo pa꞉ta꞉ alota꞉ Diutuseleme da nane na pua꞉peke aleo laa lememe.
5 Koto lemepate nikita꞉ koto da pa꞉ta꞉ iki ame̱le̱ haoma꞉ di paeyeketa꞉ iki mina꞉pa꞉lao poma꞉me. Koto haliweki paeyaoma꞉ ika꞉ weki wanda꞉ paeyao ame̱le̱ make daoni nane niki hatuku tapaalo epememe. Kutupa niki paeyaoma꞉ koto dawala ikali tea꞉na꞉ tumiki yotuao pita꞉ yeni puma꞉me.
6 Niki paeyaoma꞉ta꞉ a꞉taloe la alu alu peaata꞉ nikita꞉ mo palai kawasona꞉ pitulu pomono ikita꞉ da la꞉ka꞉la pememe.
7 Nikita꞉ Taiya da mina꞉pa꞉lao kawasona꞉ pita mo Tolemese da pa꞉ta꞉ opolo poma꞉me. Koto pa꞉ta꞉ haeme Ketiso wanda꞉hali kiki mina꞉ alu alu pea hoto homeke iki ame̱le̱ poluma꞉me.
8 Da ka꞉la꞉paota꞉ mina꞉pa꞉lao mo Sesatia da nane opolo puata꞉ kutupa hande pi walo haya꞉ hali Pilipina꞉ da pa꞉ta꞉ honda꞉ pamboma꞉me. Mo Diutuseleme da nane amba꞉ hande ma̱leke limi 7 dikoni haliweki kone homeketa꞉ ipikie.
9 Kutupa ipika꞉ wandiki tonkoputa꞉ Koda꞉na꞉ pi la꞉ u haemeke potopede wandikitonu haemekeme.
10 Nate mandaneeki koto pa꞉ta꞉ hamono potopede hali homeke Akipasi Diudia nane hao epea꞉me.
11 Kutupa niki pa꞉ta꞉ a꞉pata꞉ Polona꞉ ba꞉ta꞉ido hako meaata꞉ anke kiki ipika꞉ kone tonkao alota꞉ Holi Sipitidima꞉ do ala꞉me lea꞉me. Mo Diutuseleme da nane Diu haliwekima꞉ do ba꞉ta꞉ido hako teke hali mea tonkao mo Diendaili haliweki pa꞉ta꞉ ipiki mea hatuku pelimikie ala꞉me lea꞉me.
12 Kotoeki opuaata꞉ koto pa꞉ta꞉ haeme wanda꞉hali ame̱le̱ nikana꞉ma꞉ Polo pa꞉ta꞉ Diutuseleme da nane na polena꞉e laa honke loma꞉me.
13 Kutupa Poloma꞉ alota꞉ Ikita꞉ do e̱ e̱ aleme ekima꞉ ya puki hoeyaaluekema꞉ alemepe lea꞉me. I̱ma꞉ta꞉ Tekehali Yesuna꞉ bikina꞉ mo Diutuseleme da nane dipula pituluekema꞉ homeke na loa꞉me. Ota꞉ homuluekema꞉ kone tikitiki yao halome lea꞉me.
14 Kutupa ipika꞉ hone la꞉ka꞉laapeke na yeke handa nikana꞉ma꞉ kiao alota꞉ Tekehalina꞉ hone pa꞉la꞉eki pina꞉e loma꞉me.
15 Kutupata꞉ nika꞉ ala꞉ta꞉ ala꞉ta꞉ hombo pea wia oli Diutuseleme da nane poma꞉me.
16 Kutupa mandane Sesatia Ketiso wanda꞉halima꞉ niki ame̱le̱ puata꞉ mo Saipotasi hali Menasonita꞉ titina꞉ pi mieke hali ipika꞉ da pa꞉ta꞉ hamonoyeke niki hatuku pememe.
Poloma꞉ Dia꞉mesi handolo peekeeki
17 Diutuseleme da nane poma꞉ dina꞉ta꞉ Ketiso wanda꞉halima꞉ ta꞉na꞉ma꞉ homolo hata꞉ niki handa꞉ mimime.
18 Kutupa da ka꞉la꞉paota꞉ mo handeteke haemeke tondiki haliweki paeyao pitina꞉ Polo ame̱le̱ nikita꞉ Dia꞉mesi handolo poma꞉me.
19 Kutupa Poloma꞉ keiyae pi laa ipikana꞉ma꞉ amba꞉ pi wala꞉ tia pomieke pita꞉ Koda꞉ma꞉ mo Diendaili wanda꞉hali pa꞉ta꞉ pieke ekimanu homeke homeke lo la hala꞉tiki pia꞉me.
20 Kutupa mo haliwekima꞉ kotoeki opuaata꞉ Koda꞉na꞉ pi laememe. Kutupa ipiki pa꞉ta꞉ alota꞉ Kameo. Hande Diu haliweki paeyaoma꞉ pi mimiki ekita꞉ handeleme. Paeyaoma꞉ hande Lo Pimanu opuluekema꞉ hone wotu witelemepate
21 mandane haliwekima꞉ iki pa꞉ta꞉ lemekeeki dupa. Hande hali Poloma꞉ mo Diendaili wanda꞉hali ame̱le̱ haleme Diu haliweki pa꞉ta꞉ta꞉ Mosesima꞉ waleekeeki mina꞉pa꞉lao ika꞉ wekisunu sekemesaisi hau na piki Diu haliwekima꞉ pita꞉la꞉eki na pea꞉pa꞉peke laa walo hala꞉mee alememe lememe.
22 Koto ekina꞉ eki pumana꞉pe. Mo haliwekima꞉ neke epeleeki ota꞉ opilimikie lememe.
23 Koto ekina꞉ nikana꞉ma꞉ neke pa꞉ta꞉ lolo poloma꞉eki pea꞉peke lememe.
24 Tonkopu haliwekima꞉ nindi pea do halememe. Do haliweki ame̱le̱ hata꞉ta꞉ naka꞉ loke epeao kutupa ika꞉ you itiki makole mina꞉yeke ika꞉ yenki halawapeke lememe. Koto ekina꞉ paeyaoma꞉ naka꞉ hande Lo Pimanu opiteleeki handolo hata꞉ neke pa꞉ta꞉ leme pimanu na opilimikie lememe.
25 Kutu pa꞉la꞉pate hande pi mimiki Diendaili wanda꞉hali pa꞉ta꞉ wape tapaaso dupiki pi loma꞉me. Ikana꞉ma꞉ toopi tima꞉ wepia ula꞉ alemanu pa꞉ta꞉ lia hala꞉eki na neke we make na neke da꞉ka꞉pa꞉ mina homaasa꞉eki make na neke kutupa loke hoeyaasa꞉eki make na pina꞉e loma꞉me lememe.
26 Kutupa Poloma꞉ mo hande haliweki hatuku puata꞉ da ka꞉la꞉paota꞉ iki ame̱le̱ ipika꞉ loke epeao mo tembolo da tukiki pa꞉ta꞉ honda꞉ pambaata꞉ pua hande loke epeaasa꞉ ekina꞉ natemanu la ulu ekima꞉ make mo haliweki paeyaona꞉ yenki halawaaluekema꞉ pemekeme.
Tembolo da pa꞉ta꞉ Polo da꞉ka꞉pa꞉ minimikieki
27 Hande nate watake hata꞉ paeluekema꞉ haena꞉ mo Eisia nane hao epemeke Diu haliwekima꞉ Polo mo hande tembolo da tukiki pa꞉ta꞉ hayekeeki handaata꞉ wanda꞉hali paeyao sutiao Polo da꞉ka꞉pa꞉ mina hata꞉ alota꞉
28 Isulai haliwekio. A꞉pa niki pa꞉ta꞉la꞉pe lemekeme. Nika꞉ wanda꞉hali pa꞉ta꞉ make mo hande Lo Pimanu pa꞉ta꞉ make do da pa꞉ta꞉ make wanda꞉hali paeyaoma꞉ hoke hone wina꞉yeke la꞉tia pomina꞉la꞉ hali doe lemekeme. Kutupa make do tembolo da tukiki pa꞉ta꞉ Kitiki haliweki hatuku a꞉paata꞉ do pi ula꞉ da amba꞉ hoeyaeya꞉ka꞉ta꞉me laa lemekeme.
29 Amba꞉ta꞉ Polo mo hande Epesese da hali Totobimasi yaapo daoni nane pomipikieki hando hao ika꞉ honema꞉ta꞉ Poloma꞉ koto hali tembolo da tukiki pa꞉ta꞉ hatuku mea pulu pia꞉me hone wimikime.
30 Kutupa mo daoni wanda꞉hali paeyao tiao anke hao pua homeke pa꞉ta꞉ momba꞉la hata꞉ Polo da꞉ka꞉pa꞉ mina mo tembolo da hama꞉ nane yola꞉ mea pua kutupa kuta kone mo pota꞉manu hambemekeme.
31 Kutupa Polo ota꞉ lia homaaluekema꞉ taapolo haena꞉ hali ma꞉nda꞉ma꞉ mo hande Loma꞉ ami haliwekina꞉ tumiki hali pa꞉ta꞉ pua alota꞉ Diutuseleme da wanda꞉hali paeyaoma꞉ momba꞉la hata꞉ wi laa pa pi taka꞉lake la alu alu pitelememe pua leekeme.
32 Koto pi opuata꞉ mo tumiki halima꞉ a̱i̱ koto kone ipika꞉ ami mandane haliweki ika꞉ opisa haliweki tonka꞉na꞉ oni wanda꞉hali pa꞉ta꞉ anke hao hatuku peekeme. Kutupa wanda꞉halima꞉ mo ami tumiki hali ipika꞉ ami haliweki ame̱le̱ epemekeeki handaata꞉ Polo litolo haemeke ekita꞉ mina꞉pa꞉laemekeme.
33 Kutupa mo hande a꞉nda꞉ tumiki halima꞉ a꞉pa Polo minata꞉ seni pu yaapoma꞉ hotape leekeme. Kutupa Polota꞉ hane halipe eki hau pia꞉pe laa lota꞉ piekeme.
34 Mo mombelemeke haliweki mandane ekima꞉ pi ma꞉nda꞉ wi la꞉tiki pa mandaneeki manuma꞉ pi ta꞉ta꞉ wi la꞉tiki kutupa wi la꞉tiki pimiki ekima꞉ a꞉nda꞉ tumiki halima꞉ opua꞉peke na yeke handaata꞉ Polota꞉ mo ami haliwekina꞉ hala꞉ da pa꞉ta꞉ hatuku pupe leekeme.
35 Kutupa mo wata꞉pe lieke alena꞉ opolo peekepate pa mo mombela mineke pambemeke haliwekima꞉ pasa꞉tei pua꞉tiki pemeke handaata꞉ mo ami haliwekima꞉ Polo kikima꞉ mina꞉liao opa꞉liaemekeme.
36 Pate mo haliwekima꞉ telia꞉ mea pulu hata꞉ wi alo alota꞉ Homena꞉ lie laa la꞉tiki pimikime.
Poloma꞉ ipikana꞉ma꞉ kone ipika꞉ pi leekeeki
37 Poloma꞉ta꞉ mo ami haliwekima꞉ ika꞉ hala꞉ da tukiki pa꞉ta꞉ ipiki hatuku opolo puluekema꞉ haena꞉ mo a꞉nda꞉ tumiki hali pa꞉ta꞉ alota꞉ Neke pa꞉ta꞉ pi siki lonope leekeme.
38 Kutupa mo somema꞉ alota꞉ Kitiki pita꞉ neketa꞉ opelepe leekeme. Neketa꞉ mo hande Idiepi hali dia꞉ya꞉ka꞉ta꞉pe laata꞉ Neketa꞉ kapomani mea lopaaluekema꞉ mo 4 daoseni pi uleke yambolo haemeke haliweki sutiao mo hapu hayeke alena꞉ hatuku peeke hali dia꞉ya꞉ka꞉ta꞉pe leekeme.
39 Poloma꞉ alota꞉ I̱ta꞉ Diu halie. Mo Silisia nane Tasa꞉si teke da tiekena꞉ da hali hao epoa꞉me leekeme. Wanda꞉hali pa꞉ta꞉ pi loluekema꞉ neke pa꞉ta꞉ honke alome leekeme.
40 Kutupa mo halima꞉ A꞉pa꞉la꞉me lolena꞉e leeke handa Poloma꞉ta꞉ mo wata꞉pe manda hata꞉ ipika꞉ kikima꞉ wanda꞉hali pa꞉ta꞉ pi paape laaka꞉na꞉ ikana꞉ma꞉ pi pi na leke haena꞉ Poloma꞉ mo Hibulu pi laa iki pa꞉ta꞉ alota꞉