10
1 —Sã Dios judíos rirõ mbae ɨcuã sɨ, ae rei quia co. —Paba, judíos emingo Jesucristo rese, ae tuchɨ rei quia co.
2 Judíos siqui sete raque Dios cheẽ nduɨ. Ñeenda quia eɨcuayãte nguiã Dios ɨcha.
3 —Dios ra nandechɨã mbitirõ Jesucristo rɨɨ̃, ɨ eã ñochɨ̃. Ae ae uchɨã mbitirõse chõchɨ̃. Jesucristo ɨcua sereã nea mbeɨ chõchɨ̃. Nyebe Dios riqui nguiã echɨã mbitirõ eã mbeɨ.
4 Jesucristo tu nonde que judíos siquise tuchɨ Moisés chɨmbesa rese ra. Jesús que tu íbii cote ra. —Moisés chɨmbesa ruɨ jẽɨngo mose, taembitirõ turã, ɨ ãte que Jesús ra. —Seɨcua mose quiatu ra jaembitirõ, ɨ que ra.
Sã mbia siqui ja serese, ɨ Dios
5 —Emo mbae ɨcuã mo saã eã mbeɨ emo mose, ũquɨ̃ nda Dios mingo beɨ, ɨ rei que Moisés ra.
6-7 Ã nandeɨco Jesús ɨcuate ã. Nyebe ae riqui nguiã nandemingo beɨ ɨ ɨte ã. Nyebe nandeɨco nguiã ñee ãte. —Aba quia ra oso Jesús reru ibate sɨ nande je, ɨ ãte. —Aba quia ra oso mbia raaque rea, Jesús mbuquera sacuã, ɨ ãte nande mo.
8 Ã ureɨco Jesucristo renei nenei mbia je ã. —Jẽ Jesucristo ɨcua mose, jẽɨngo beɨ rae, ure equia mbia je ã. Jesucristo ɨcuasa ra ñee: —A Jesucristo cheẽ ndiqui aba jiite a. Echeẽ aba chɨɨcua bite aba chɨangui re, ɨ ra Jesucristo ɨcuasa ñee.
9 —Jesucristo rei sererecua, ere chõ ñee. —Dios que Jesucristo raaque mbuquera ra, ere chõ nguia ndechɨangui re. Nde ɨ mose, Dios ra nemingo beɨ.
10 Emo Jesucristo ɨcua mose uchɨangui re, Dios ra echɨã mbitirõ. —Jesucristo aɨcua quia co, ɨ mose, Dios ra esirõ mbae ɨcuã sɨ.
11 —Jesucristo aisi jirichɨ̃ nguia no, ɨ eã nda Jesús ɨcuasa mo ñee, ɨ que embesa ji Dios cheẽ nda.
12 Dios quia mbia ja rerecua tuchɨ re. Judíos achõ ndeeecua eã. Judíos eã achõ nderecua eã no. Eɨ̃ ja chõ mbia Dios je re. —Mbae mo embu seje, ɨ mose emo Dios je, mondo turã tuchɨ ra ee.
13 Sã embesa ji riqui ɨ no:
“Paba, seɨcuã embitirõ”, ɨ mose emo, Dios ra ũquɨ̃ mingo beɨ tuchɨ,
ɨ que embesa ji ra.
14 Mbia mo Jesús ɨcuayã mose, ñee aroneãte ee. Mbia jiranuã mose Jesús rese, Jesús ɨcua aroneãte. Emo Jesús cheẽ nenei nenei eã mose mbia je, mbia jirandu aroneãte Jesús rese.
15 Dios mbia mo mondo eã mose echeẽ nenei nenei sacuã, echeẽ nenei nenei aroneãte. Sã embesa ji riqui ñee no. Eɨ̃ sɨ chõ ñene:
Aba bite emo tu mose Dios cheẽ nenei nenei ure je.
Ureya tuchɨte erese,
ɨ que embesa ji cose ra.
16 Mbia mɨɨ mɨɨ ño siquichɨ̃ Dios cheẽ turã ndese ũquɨ̃. Sã Isaías ñee no:
Dios, mbia que urecheẽ ñandu sereãte ra,
ɨ que Isaías embesa ra.
17 Mbia ra Jesucristo ɨcuayã mbeɨte, jiranuã mose erese. Mbia ra jiranuãte Jesucristo rese, emo echeẽ nenei neneiã mose ee.
18 ¿Judíos Dios cheẽ turã ñanuãte re? Ñandu ja rei que ra. Dios cheẽ ngue judíos chandu ja rei resẽ. Mangue chooño eã ngue echoɨ Dios cheẽ nenei nenei ndesẽ.
19 ¿Judíos jiranuãte Jesús cheẽ turã ndese re? Jirandu tuchɨte rei que ra. Sã Moisés Dios cheẽ mbesa no:
Dios rei se. Judíos eã ndese taɨco turã.
Mbia aquiatuã taisi serimbarã. Judíos nda queteã tuchɨ serese chã,
ɨ que Moisés Dios cheẽ mbesa ra.
20 Isaías abe que Dios cheẽ mbesa ra. Ã ngue embesa ra:
Ae serequia eãte quia, ũquɨ̃ ño ngue serea ra.
Ae ndua eãte quia serese, ũquɨ̃ je chõ achecua nguiã, ɨ que Dios ra,
ɨ que Isaías siquicheãte Dios cheẽ mbesa ra.
21 Isaías que ñee judíos je no nda:
Dios riqui ñee jẽje co. “Jẽɨngo serese”, ae beɨte raque se quia judíos je co.
Secheẽ mumba beɨ chõchɨ̃.
“Jẽɨngo serese”, ae beɨte raque quia secheẽ mumbasa je co,
ɨ que Dios ra, ɨ que Isaías Dios cheẽ mbesa ra.