8
Dios contrato yasu saã Jesús rɨɨ̃
1 Ababi tuchɨ quia rei Jesús siqui mose sacerdoterã. Sacerdote turã tuchɨ quia rei ae nande je. Hue eñɨ ngoi Dios Ibatenda rɨbɨsho quiti nande je huee.
2 Hue eriqui mbae raã naa Dio s chuchua ibaténdaa huee. Dios ae chɨsaã tuchɨ chõ hue tuchua re. Mbia mo nyɨsaã eã ño ñene. Nyebe Dios chuchua tuchɨ chõ hue re.
3 Sacerdote rerecua ja chõ sacrificio raã naa sacuã nde. Nyebe Cristo abe sacrificio saã nguiã umano mose.
4 Ae sacrificio Cristo saã nae, ũquɨ̃ nguia eturã tuchɨ sacerdote chɨsaã sɨ re. Cristo siqui mose íbii, eɨ̃ nda sacerdote eãte rei ae. Moisés chɨmbesa cheẽ nduɨ achõ ño sacerdotes ibi jenda riqui nguiã sacrificio raã naa ã.
5 Ae sacerdotes ibi jenda saã saã nguia mbae nae, ibei jenda rese aba mundua sacuã ño ñene. Sã Dios ñee Moisés je Dios chuchua ao nonde no. —Ndeɨco mose ibi ibátee que sechuchua ibei jenda ateacuquia ndeje, ũquɨ̃ na sɨ chõ sechuchuarã ibi jenda esaã, ɨ que Dios ñee Moisés je ra.
6 Ae contrato Dios saã mbia je nyii nae, mbaranquiatuãte que ũquɨ̃ nda. Ae contrato Dios saã nande je namo Jesús rɨɨ̃ nae, eturã tuchɨ chõ ũquɨ̃ cote re. —Ã tasaã jẽje. Ã abe tasaã jẽje no, ɨ tuchɨ Dios quia contrato namonda rɨɨ̃ nande je co.
7 Contrato ñiinda mbia mingo beɨ mose Dios rese, ɨ̃ nda contrato yasu raã eãte rei nande je.
8 Dios ia eãte que eriqui mbia aque mosenda rese ra. Sã embesa ji riqui no:
à ño ngue Dios ñee nguiã: Contrato yasu ra asaã je Israel jenda je.
Judá jenda je abe no.
9 Contrato asaã nguia ũquɨ̃ nameɨ je nyii nae, ũquɨ̃ contrato rã eã nda eyasu asaã cote.
Mbia arao quia Egipto sɨ nae, ũquɨ̃ mosenda rã eã nda contrato asaã je mbia namondo je.
Mbia cose ndare chõ ngue contrato saã ɨru seje resẽ.
Contrato raande que secheẽ mumba mumba chõ nda.
Nyebe ũquɨ̃ asecha chõ nguiã, ɨ que Dios ra.
10 Ae contrato ra asaã je Israel jenda je, ã ndei e ã:
Secheẽ nda amɨɨ tuchɨ eãquĩ ndese.
Secheẽ nda amondo tuchɨ echɨangui re.
Se ra ererecua turã tuchɨ ee.
Serimba tuchɨ ra ũquɨ̃.
11 Seɨcua ja tuchɨ rae. Mbia cuasu ja.
Eñetẽ abe ja chee.
Seɨcua ja mose, ũquɨ̃ mose emo uataque mbaaquiatu quiatu aroneate serɨɨ̃ cote.
Seɨcua ja tuchɨ quiatu ra aque mose.
12 Ũquɨ̃ ɨcuã nda ambutiã ja esɨ.
Atesareɨ beɨ ra eɨcuã sɨ,
ɨ que Dios cheẽ huɨ̃ embesa ji rese ra.
13 —Contrato yasu tasaã, ɨ que Dios cote ra. Contrato ñiinda ɨmate quiatu ngue ee re. Mbae ɨma nda ua ja cote.