A fosi brifi di
Yohanes
skrifi
Wan wortu na fesi
Te wi e leisi a brifi disi, wi e kisi a firi tak' Yohanes na wan owru man kba. Kande a ben de a laste apostel fu Masra Yesus di ben de na libi ete. So a ben si furu sani èn a ben abi furu ondrofeni. Fu di a ben de wan sma di ben si Masra Yesus, meki tra sma ben e lespeki den sani san a ben skrifi. So a ben kan skrifi den yonguwan di e kon na baka, fu kraka den ini a bribi. Ini a brifi disi wi e si tu tak' Yohanes e warskow den sma gi a kruktu leri di ben de a pisten dati. A e du dati fu yepi den bribisma tan na ini a trutru bribi.
San de ini a buku disi:
A bigin fu a brifi (1:1-4)
Waka ini a leti (1:5 – 2:17)
A warskow den fu kruktu leriman (2:18 – 4:6)
Lobi nanga bribi (4:7 – 5:21)
1
A Wortu di e gi libi
1 Na fu a Wortu di e libi wi e ferteri unu. A Wortu ben de na a bigin. Wi ben yere En èn wi ben si En nanga wi eigi ai. Wi ben man luku En èn wi ben fasi En nanga wi anu.
2 A Libi kon sori Ensrefi. Wi ben si En èn wi e kotoigi fu En. Wi e ferteri unu fu a libi fu têgo di ben de nanga a P'pa èn di sori Ensrefi na wi.
3 San wi si èn san wi yere, na dati wi e ferteri unu fu un kan libi leki wan nanga wi. Èn wi e libi leki wan nanga a P'pa èn nanga En Manpikin Yesus Kristus.
4 Wi e skrifi un den sani disi fu wi kan breiti trutru.
Gado de leki wan faya
5 Disi na a boskopu san wi yere fu En èn san wi e ferteri unu: Gado de leki wan faya èn no wan dungru no de ini En.
6 Efu wi e taki tak' wi e libi leki wan nanga En, ma wi e waka ini a dungru, dan na lei wi e lei èn wi no e du san na tru.
7 Ma efu wi e waka ini a leti leki fa En de ini a leti, dan wi e libi leki wan nanga makandra, èn a brudu fu Yesus, En Manpikin, e krin wi fu ala sondu.
8 Efu wi e taki tak' wi no abi sondu, dan wi e kori wisrefi èn a tru leri no de ini wi.
9 Ma efu wi taigi Gado den sondu san wi du, dan wi kan fertrow Gado tak' A e du sani nanga leti. A o gi wi pardon fu wi sondu, èn A o krin wi fu ala den ogri di wi ben du.
10 Efu wi e taki tak' wi no sondu, dan wi e kari Gado wan leiman èn a wortu fu En no de ini wi.