9
1 Me an̰ji waygə gwale gə ɗang ba da: «I sədə. Dwayna, nə̂ wayang i gwale səw ɗang bi: Nare nə̂ yab nə̂ ilə̂ dwar̰angə̂ caga ka di, cendi ha yara Mãr̰ĩ lama duwa gə dwãr̰ĩ gə dwana di gə dərə̂gə do me cendi ha mara sən̰.»
Jesu səw kəlangar bam
(Matiyə̂ 17.1-13; Luk 9.28-36)
2 Wala kubi tarəwə̂ da, Jesu wol Piyer me Jak me Jã me məra, ha gandagə bam tulin̰-yə̂ hin̰e, managə kur̰a də hoy dədə̂ bam hə̂n̰ gə nare. Managə cendi i məndagə kur̰a dədə̂ mwom da, Jesu səw kəlangar bam wun jiga managə dərə̂gələ̂.
3 Barge duwa da cor ꞌyogədə ꞌywagəda gə al lan̰a nan̰e me wusə kə̂ng. Wusənani gə ta di, gun mən kaw neyem alaw sən̰a dədə̂ ka bə̂də̂.
4 Me jisgə yande da, woni gərsə̂ gwale duwa nə̂ subu di yə̂r woni cəmə̂ Mãr̰ĩ bəw nə̂ pii nə̂ Eli day gə Moyis kaw ilə̂ waya gwale-yə̂ gə Jesu me.
5 Mwom da, Piyer wayəw Jesu ba da: «Aba gələ̂nin mani, də̂ damang ka di da, ladə nan̰e. Yande da, kalnin nə̂ ɗangər̰angnin kundi subu mana gə ka-lə̂ di, mən ina dəma, me mən ina Moyis duwa, me mən ɗang bi da ina Eli duwa me.»
6 Me gwale gə Piyer wayəw ta di da, an̰ji way i gwale gə bərmə̂ duwa bə̂də̂, dara an̰ji day gə kwandaw di, lan̰a cor algə le.
7 Ər̰ə cendi yə̂r siyaya mugə daa kədab, me doy gwale nəm siyaya di dalawə̂ way ba da: «An̰ju gə ta di, i gorəndən, dusən urəw nan̰e. Dwayna gwale bəwə̂!»
8 Mana gə ta-lə̂ dog, woni gərsə̂ gwale gənə̂ Jesu duwa di, yə̂rbə tulbə̂gə, me cendi yə̂r gun mən gə ɗang ilə̂ bə̂də̂, me i Jesu di mən ilə̂ gandagə.
9 Managə cendi ilə̂ chə̂ə̂ nəm dodə̂ kur̰a-lə̂ di da, Jesu waygə woni gərsə̂ gwale duwa cendi ba cəmnə̂w gun mani nə̂ cendi ba yaragə gə dərə̂gə ka di gwale day daa bə̂də̂ paa paa, bəraa kal an̰ju gə Gun gorəndəw di ba dəmnə̂ nəm daa nare nə̂ mare dwar̰agələ̂ ba.
10 Cendi gam gwale gə an̰ji waygə di dusərə̂gələ̂, me urbə i sədə̂gə dara gwale gə «swa gə daa managə nare nə̂ mare dwar̰agələ̂» di da, way ba i man mo?
11 Ɗang da, cendi ur Jesu ba da: «Woni gələ̂ bii gə ꞌwoo way ba Eli ba haralə̂ ba do me Dole gə Mãr̰ĩ biyə̂w di hara sən̰ di da, i dara na ɓag di mo?»
12 Mwom da, Jesu waygə lə̂ ba da: «I sədə, Eli di haralə̂ ba, dara ɗangər̰a gə mani pad gə bərmə̂ day. Yande da, i man man me gə jangə Magtubu dənə̂ Mãr̰ĩ-yə̂ way ba Gun gorəndəw di baa ha gələ̂ dərin̰ nan̰e, me ba gə ha gən̰ə̂w bam me mo?
13 Ɓag da, nə̂ wayang: Eli di da, an̰ji gəra ɗəm, me nare aləw mani pad nə̂ dərə̂gə ur. I ta di me gwale gə gə jangəw managə Magtubu dənə̂ Mãr̰ĩ-yə̂ pii dara daraw di, yala alal nəm.»
Jesu ꞌyor dundi də acn̰e bam dwe səwə̂
(Matiyə̂ 17.14-20; Luk 9.37-43)
14 Managə Jesu day gə nə̂ woni gərsə̂ gwale duwa nə̂ subu di cwaragə yala managə woni gərsə̂ gwale duwa nə̂ yab nə̂ wor dodə̂ di sədə̂gələ̂ ib da, cendi yə̂r nare nə̂ gər̰e nan̰ ilə̂ gandagə liwgə daa, me woni gələ̂ bii gə ꞌwoo gənə̂ Moyis duwa kaw ilə̂ gaga gwale-yə̂ gandagə.
15 Managə nare di ba gə yə̂r Jesu hara yala mwom da, sədə̂gə ꞌyolgə, cendi wa kalang saw Jesu dərə̂w daa dara alaw gə labiya.
16 Jesu di urgə ba da: «Anə̂ gagə gwale gə woni gərsə̂ gwale ni da, i gwale na mo?»
17 Mwom da, gun mən nare dwar̰agələ̂ cow lə̂ diyə̂ ba da: «Aba gələ̂nin mani, nə̂ walam gorəndən gə dundi də acn̰e əməw waya gə gwale bam yala nəm lə̂.
18 Mana gə woy-yə̂ woy-yə̂ kaw, dundi də ta di swanaw daa, əndə̂w i dodə̂, bəw sugədəle me yidəbə̂ sandaw me səw kaw mar bam woy pə̂gin̰ kagaga me. Dee nə̂ amsə woni gərsə̂ gwale dəma dara ba ꞌywarnaw dundi də acn̰e də ta di bam kaw, cendi neyem ꞌywaraw gandədə bə̂də̂.»
19 Mwom da, Jesu waygə ba da: «ꞌYeni nare nə̂ caga woni kala dusərə̂ng dənə̂ bə̂də̂ nə̂ ga! Nə̂ ha dama ganang ala wala əndi na do me anə̂ ha kala dusərə̂ng dənə̂ sən̰ mo? Dusi dan də kala bə̂də̂ di, nə̂ ha ꞌwodə dən bam bəraa mindi na mo? Walnan dwe di hane nəm!»
20 Cendi walaw dwe di hara nəm, me managə dundi də acn̰e di ba də bo dərə̂də ca yə̂r Jesu da, tandi u dwe di gə dwana əndə̂w dodə̂, dwe di habdə dodə̂ sən̰a dədə̂, me bəw kaw sugədə me ca.
21 Mwom da, Jesu ur dwe di abə̂w ba da: «Mani nə̂ ta di aləw i mindi na mo?» Dwe di abə̂w cow lə̂ diyə̂ ba da: «Mani di aləw i ɓəg managə an̰ji wor nəm gə dənani duwa ba.
22 Dundi də ta di ɓugədəw managə duwa-lə̂ me nimi-yə̂ me ilə̂ dara ꞌyaw nəm ta di. Me dee mə̂ neyamna gaba alaw maniye da, yə̂r n̰agəni nin me waninə̂!»
23 Jesu wayəw ba da: «Dana me mə̂ way ba ‹dee nə̂ neyamna› ba mo? Gun gə kalna dusəw dənə̂ da, nə̂ neyem alaw mani pad le.»
24 Mana gə ta-lə̂ dog da, dwe di abə̂w so soy mar̰jaw daa nan̰ way ba da: «Nə̂ kal dusən dəmə̂! Me wannə̂, dusi ni də kala di i ɓani sən̰.»
25 Managə Jesu ilə̂ waya gwale-yə̂ gə dwe di abə̂w da, nare ilə̂ haralə̂ dajara nan̰ nan̰. Managə Jesu yə̂rgə yande da, an̰ji ər̰in̰ dundi də acn̰e waydə ba da: «Dundi də idə əmə̂w dwe waya gə gwale bam me dwaya gə gwale bam me, i əndi me nə̂ wayi: Dəm bam dwe di səwə̂, me cwaray dəwə̂ ɗang bi bə̂də̂ ɗəm!»
26 Mwom da, dundi so soy daa nan̰, nongər̰ə dwe di əndə̂w dodə̂ gə dwana, do me tandi dəm bam dwe di səwə̂, kal dwe di wun gun gə mare. Nare nan̰ way dwe di ba mare.
27 Me Jesu yə dwe di daa gə əsə̂w dara ba swana daa, me an̰ji so ɗəbə daa.
28 Mwom da, Jesu so ha kərə̂. Me managə woni gərsə̂ gwale duwa ilə̂ gandəw kərə̂ məndagə da, cendi urəw: «I dana me nenin da, nə̂ neyamanin ꞌywara dundi də ta di bam bə̂də̂ mo?»
29 Jesu cogə lə̂ diyə̂ ba da: «I gə amsa gə Mãr̰ĩ məra me ba mə̂ ha ꞌywara gə dundi də ya ta de di bam gun səwə̂.»
Jesu way bi ba gə ha ꞌyaw me baa ha dəmə̂ daa munə-lə̂
(Matiyə̂ 17.22-23; Luk 9.43-45)
30 Ər̰ə, Jesu day gə nə̂ woni gərsə̂ gwale duwa sogə daa kal mana gə ka di bam, me cendi ha jə̂ə̂ gə wama gə Galile dəwə̂. Me Jesu da, ur dee gun mən kaw ba ꞌwacn̰ana bə̂də̂,
31 dara an̰ji ilə̂ gələ̂gə i woni gərsə̂ gwale duwa mani. An̰ji waygə ba da: «Əndi gə Gun gorəndəw di da, gə ha ꞌyan nare nə̂ gəsgə̂də əsəragələ̂. Cendi ha ꞌyan bam. Me managə cendi dara ꞌyan bam da, wala gə subu-lə̂ da, nə̂ ha dəmə̂ daa nare nə̂ mare dwar̰agələ̂.»
32 Woni gərsə̂ gwale duwa di ꞌocn̰ gwale gə ta di gəndəw bə̂də̂, me cendi lan̰ urə̂w bam.
I wi me i geche mo?
(Matiyə̂ 18.1-5; Luk 9.46-48)
33 Jesu day gə nə̂ woni gərsə̂ gwale duwa yalagə ciri də Kapernom-mə̂ ɗəm. Me managə cendi i kərə̂ da, Jesu urgə ba da: «Dee anə̂ gagə gwale bərmə̂-lə̂ da, i gwale na mo?»
34 Me cendi asəw gwale lə̂ diyə̂ bə̂də̂. Ɓag da, managə bərmə̂-lə̂ di, cendi dee gaga dara ꞌwacn̰a i wi me dwar̰agələ̂ da ba i geche mo.
35 Ər̰ə Jesu kal səw dam dodə̂ ꞌwaga woni gərsə̂ gwale duwa nə̂ mwaj dii sər di səwə̂ ib me waygə ba da: «Gun gə urnə̂ ba gədənə̂ geche da, kal a cwana səw gun gə i kwandaw nə̂ pad ka di taragələ̂, me aba kəjə̂gə me ca.»
36 Ər̰ə Jesu di wala dwe gə ꞌyə̂ng chəw dwar̰agələ̂, ər̰ə an̰ji yəw səwə̂ me waygə woni gərsə̂ gwale duwa ba da:
37 «Gun gə yinə̂ gun gə wun ya dwe gə ka di de gə dwani dara daran əndi da, an̰ji yən i əndi. Me gun gə yinə̂n gə dwani yande da, an̰ji yən i əndi məra bə̂də̂, me yə i aba giyə̂n di.»
Aba ələ̂ndə bə̂də̂ da, i gun ənda
(Luk 9.49-50)
38 Jã wayəw Jesu ba da: «Aba gələ̂nin mani, dee nə̂ yaranin gun mən ꞌywara dundi də acn̰e bam nare sədə̂gələ̂ gə suməm, me nə̂ urə̂nin dee ba nə̂ əmə̂wnin i ala bam, dara an̰ji i ganandə mən bə̂də̂.»
39 Me Jesu wayəw ba da: «Əmnə̂w ala bam bə̂də̂. Dara gun gə alna mani nə̂ dan̰a gə sumən da, an̰ji i gun gə ha waya gwale ni gə acn̰e kalang bə̂də̂.
40 Gun gə əlnə̂ndə bə̂də̂ da, an̰ji i gun ənda.
41 I sədə. Dwayna, nə̂ wayang i gwale səw ɗang bi: Gun gə ꞌyanang nimi nə̂ chaa dara anə̂ ba i nare nə̂nə̂ Kris duwa da, inam i mani-yə̂ ɓani yande hin̰e məra kaw, an̰ji ha ꞌywa gwayni duwa le.»
Gən̰ə̂ gə bərmə̂ gaba ala acn̰a bam
(Matiyə̂ 18.6-9; Luk 17.1-2)
42 «Gun gə lamna i dwe mən gaba kala dusəw dənə̂ kwandaw dwar̰agələ̂ alnaw acn̰a-lə̂ da, gun gə ta di, gə manaw kur̰a də jore də nuu nan̰ kunə̂wə̂ me gə unə̂w alnaw managə nimi nə̂ kuray gə geche-yə̂ kaw, wome bə̂də̂ sən̰.
43 Inə̂ i əsə̂m gə mən me lamnam alnam acn̰a-lə̂ an̰ju da, saw aləw bam! Hara gə mana gə bələ̂ gaba dama gə dərə̂w bər̰in̰-yə̂ gə əsə̂m mən da, ladə nan̰ ɗoy kala gə əsam lə̂ ca me mə̂ ha nəm duwa də ꞌywa dəra budə̂ bam bə̂də̂ bər̰in̰-yə̂ di. [
44 Mana gə ta-lə̂ da, dan̰ də idə mara bə̂də̂ bər̰in̰ də idə wama nare kumbə day ilə̂, me duwa də ꞌywa dəra budə̂ bam bə̂də̂ bər̰in̰ ilə̂ me ca.]
45 Inə̂ i dəgəlam də mən me lamnam alnam acn̰a-lə̂ tandi da, sawdə asədə bam! Hara gə mana gə bələ̂ gaba dama gə dərə̂w bər̰in̰ yə̂ə̂ gə dəgəlam mən da, ladə nan̰ ɗoy kala gə gədam lə̂ ca me gə ha asam nəm duwa də ꞌywa dəra budə̂ bam bə̂də̂ bər̰in̰-yə̂ di. [
46 Mana gə ta-lə̂ da, dan̰ də idə mara bə̂də̂ bər̰in̰ də idə wama nare kumbə day ilə̂, me duwa də ꞌywa dəra budə̂ bam bə̂də̂ bər̰in̰ ilə̂ me ca.]
47 Inə̂ i dudəm mən me lamnam alnam acn̰a-lə̂ tandi da, bidə aldə bam! Hara gə ciri dənə̂ Mãr̰ĩyə̂ə̂ gə dudəm mən da, ladə nan̰ ɗoy kala gə dərə̂m lə̂ ca me gə ha asam nəm duwa də ꞌywa dəra budə̂ bam bə̂də̂ bər̰in̰ yə̂ə̂ di.
48 Mana gə ta-lə̂ da, dan̰ də idə mara bə̂də̂ bər̰in̰ də idə wama nare kumbə day ilə̂, me duwa də ꞌywa dəra budə̂ bam bə̂də̂ bər̰in̰ ilə̂ me ca.
49 «Duwa ul biri marəw duwa bam gədəw gə lade. Wala kaw, gə bow wama-lə̂ dara ba ꞌywalna nəm. Yande da, Mãr̰ĩ asəw gun gə woy woy kaw wamani dara ba ɗangər̰ənaw gədənə̂w gun gə lade me ca.
50 Wala da, i mani nə̂ lade nan̰e. Me managə wala di həranga duwa meyendarna bam da, mə̂ ha ala i man dara cwaw gə həranga duwa gə ta di bi mo? Kal anə̂ wun i ya wala gə ꞌyole de managə nare dwar̰agələ̂, me yinə̂ sədə̂ng gə dwani me ca.»