18
Apana nina rebarebantoia anaanawa
1 Tane Iawe God Moses diene wanase,
2 “E Israel apanawa mampo gagaloite waase,
‘Ne ipa Iawe e Godila.
3 E mai Isibt apanawa dima dewasaia ruawa dewasana, dia. Mapo e bola sa bedewe wainilano ne banlaleno nolen. Do e mai Kanaan apanawa dima dewasaia ruawa dewasana, dia. Ne bola sa bedewe banlalepo odana baiwaitilana. E mai mo dewau ewane rua dewasana.
4 Ne ipa Iawe e Godila, ne anaanana ruaitonune ita dima ne wadina ruawa dewamonuna.
5 Tane e ne anaanana ita aiana enaledina ruaitonune dewasanuna mampe e inaida bedeweitana. Ne ipa Iawe God wadina.
6 Ita e mai eba baida sosola do ninaitana, diaida. Ipawa ne ipa Iawe God aiana etane ruaitana.
19 Ita do e mida nainailala manamanainala uaboa wadamodia walamawe mai do ituitana, dia.
20 E mai soa da tanawoa manainapa do ninaitana ne emanawo eba miramiraitaa sawa.
21 E obanla mai otamone god lagawaa ebowa Molek pulontoia watawa osowe puloitane sumona, dia. Naita e epe dewasana God mampe mala ituna. Ne ipa Iawe e Godila.
22 Ita mai apana da mona sowa mona nata ninantopu i nata ninantoia rua, diaida. Sa ipa dewa kadiwaida ne emanawo.
23 Ita mai apana da mona pue iwoa do ninantopu, dia. Ita do mai i da pue mona do ninantopu, di diaida. Sa ipa dewa kadiwaida.
24 E mai dewa inainambu ema ruau dewamone miramiraitana, dia. Apana bola Kanaan bedewe wanwanlala dewa inainamba ema dewamoia mampe ne emanawo kadintone miramiraidanton. Sa baiwa ne mo tanamopo nomopue antopuo aupo e odane waina.’ ”