18
Elaia ita Baal perowetawa gagalou
1-2 Ena nata bedewe Samaria tawowa bedewe unu mai wapona ita maraapore debamaia segalen. Tane maraapore enawa natadea bedewe Iawe God Elaia diene wanase, “E aite warere Eiab ewaa, ne unu tawo ema oso wapaaubepa baiwantedina.” Ita me warere Eiab mampe alene donsan.
17 Ita me alene wiseno Eiab ewene diene wanase, “E ipa sa Israelwa osouwo poka ituiana apanawa, ba?”
18 Elaia leusane wanase, “Ne mai Israelwa osouwo poka itupona tane e ita e mamaa damba do dewa ema dewaiten. E Iawe God anaanawa mai ruawaitapona ita eida Baal godiwa wadaposimoile.”
19 Tauma e Israel apanawa uduudu diamowo wimpu wadi Kamel iwa oso doineapu. Ita e ione Baal perowetawa uduudu 450 ita Asera perowetawa 400 do winlena. Mo mida warere iwoa Iesebel nana wanamodia.
20 Sa baiwa Eiab Israelwa uduudu ita peroweta diamona wadi Kamel iwa osowe antopue auwepu.
21 Ita Elaia apana uduudu danauwo enene diamone wanase, “E walama dainea insaisala natamoilana enee insaisala dea ituna. Naita Iawe ipa God, aiawa ruawaitane waweitana, tane naita Baal ipa God me waweitana.” Ita apana mai aiau da wapona, dia.
22 Mape Elaia mo mampo wanase, “Iawe God perowetawa neba os wainedina tane Baal perowetawa ipa 450.
23 E kau mona nata otene mainimbo winlena. Mo kau dea wadapue mamposapu ita bosapue nopuiasapu. Tane mo pue pulotompa watawa osowe ia teamopue ita osowe moia teapu, tane ia mai supu. Ita ne kau da mampe deawaa dewasapa.
24 Tane e Baal perowetawa, godila mampe rauparitana ita ne Iawe God mampe rauparintapa. Ita god dainea raupari sipoasapie ia wapiaubepio moia ia do ituialepia me ulaipa Godida!” Ita apana uduudu oanton.
25 Tane Elaia Baal perowetawa mampo gagalolene wanase, “E apana uaraitena baiwa bauta puloitana. Ita e kau dea sonabene imaitane otamone wata osowe teana tane ia mai suna ita godila mampe rauparitana.”
26 Sa baiwa mo kau dea wadane imasane pulo ituia watawa osowe ituiena. Ita mo Baal mampe tadinaida rauparintoio alene enautalen. Mo mukantoie waiase, “O Baal, no rauparimba sipoasaa!” Ita mo pue pulontompa watawa dewasaiena tampeinta biantoie. Tane mai raupari sipoa da, diaida.
27 Ita enautaleidio Elaia mo wasimone wanase, “Mukaitane rauparitana! Me ulaipa godida! Me dauwa insaisawa uaraleide ba nambe alen ba awa da alen. Ba naita me ituleidia wanamesano enepiwisepi!”
28 Mo mukantoie rauparintoie ita mo dewau rua isima mampe etepu toie ita e mampe etepu eneio osina debama esa rua noseidie.
29 Mo ideita ka osowe osowe waio rawilen ita pue susuwa walamaida wisen, tane mai aia da, mai mida da sipoalepona, diaida.
30 Tauma Elaia apana diamone wanase, “E mainawo winlena.” Ita mo uduudu me mampe wimone enanepaneiena. Ita me Iawe God watawa apana da kadisana osowe dewasan.
31 Me seu uduudu 12 otamon ita seu sa ipa Israel damba deadea eueuwau. Ebo ema Israel Iawe God mo nosiu Iakob wanen.
32 Me seu sa mampe pulontompa watawa osowe dewasan Iawe God wadaposiwa baiwa. Ita me wata tampeinta don tone panen. Don sa bedewe esa memepuo 14 lita wadepia rua.
33 Ita me ia tonapu wata osowe teamone ita kau nopuialene otene ia osowe teamon.
Ita me wanase, “E dugi debamau 4 bedewe esa memamono nopentopuo pulo ita ia osowe memamona.”
34 Mo epe dewantoieno ita me wanase, “E osowe deawaa dewasana.” Ita mo dewasane diasaieno wanase, “E tauma osowe natadeawa memena.” Sa baiwa mo esa natadeawa memeiena me wana rua.
35 Ita esa wata osowe iene alene don nopesan.
36 Tane rawileidio pue pulontopua walamawa wiseno Elaia wata mampe alene enene rauparilene wanase, “Iawe God, Abraam, Aisak ita Iakob Godiu, ande e sabamoitaa e ipa God Israel bedewe ita ne ipa e nolaa dewalala, ita dewa ema uduudu e waana rua ne dewamona.
37 O Iawe God ne rauparina e sipoasaa, ne rauparina e sipoasawo apana ema atenepu e ipa Iawe God, tane e ipa mo nuau leusaiana manawontopu.”
38 Me epe rauparileno Iawe God uboo ia iilala wanaubeno iene kau, ia, seu ita dogo wata tampe tane do esa don bedewe ituiamono makolene dialen.
39 Tane apana dewa ema ewane, mo nambu dogo osowe udanadoe ke wane waienase, “Iawe God, me ipa God! Iawe God, me ipa God!”
40 Ita Elaia aiawa badowa mampe diamone wanase, “E Baal perowetawa wadaitumona mai da eno alepi!” Sa baiwa mo uduudu wadaitumoiena ita Elaia banlamone Kison dobawa apua oso antone bomonatuwaiena.
Elaia unu baiwa rauparilen
41 Ita Elaia Eiab mampe wanase, “E aie nana ita esa naa, ne unu debama iedio moinawa etedina.”
42 Eiab alene nana ita esa nan ita Elaia wadi Kamel iwa osowe odene alene nitomalene namba imimpa osowe udendoe rauparilen.
43 Ita me nolawa dewalala mampe wanase, “E aie owa deneuwe ewawo.”
Ita nola dewalala alene ewene leulene wisene Elaia diene wanase, “Ne antene mai dima da ewapona.”
Elaia nolawa dewalala dieno walama 7 osoweosowe alene ewen.
44 Ita walama 7 bedewe nola dewalala wanase, “Ne giou keraudida apana witapa rua owa bedewe odedio ewana.”
Sa baiwa Elaia wanase, “E aite Eiab diaa, e unu bodeepia sawa turakaa pue teiteinalala osowe odee wane duawo aitaa.”
45 Tane tauwadea uba tampe giou dubalen. Ita lanunu weuwane unu debama nosen. Eiab turakawa pue mampe teiteinalala osowe waine bola Iesiriel bedewe alen.
46 Tane Iawe God Elaia muka debamaia waneno garawa nukulene igawa bedewe ensipusalen. Ita me weuwane alene Eiab ainboe Iesirielwa wisen.