3
Ntu Kpeesatɛ Yohane Layie Ɔlaa Biene Nwu Lɛkya.
1-2 Di lefosi alɛɛ anɔɔ ya kamɛ di ɔka nɔɔfo Kaesare Tiberio latoole ni sɛka, Yaa ɔlaa buɛtɛ Yohane wɔ ninle ni Sakaria obi lafũ ɔlaa aakyeko Yaa nfũ di obe wɔ aasiɛ ni di ɔfaafuu kamɛ. Ni di Pontio Pilato lale Abaa ɔnɔɔfo di Yudea kasɔ suoto nɛ. Herode kafɔɔ latoole sɛka di Galilea kasɔ suoto. Di obe nwu kamɛ tutuutu, Herode obilɛma Filipo kafɔɔ latoole sɛka di kasɔ ka bɔɔlɛɛ ni Iturea ku Trakoniti ntɛɛ nwu suoto. Ni di ɔka Lisania kafɔɔ latoole sɛka di Abilene kasɔ suoto nɛ. Di obe wɔ mmle kamɛ kafɔɔ, ni di Hana ku Kaiafa lale Yaa olebatatɛ banɔɔfo nɛ.
3 Ninfɛ di Yohane lakyɛ aakyi Yordan okle sɛmaa ku ntɛɛ nwu mmuu aatoobuɛ Yaa ɔlaa alɛ, “Bikyi siikpile lee kamɛ biefũ Yaa ntu okpeesa, di Yaa ayɔ sikpile lee akyɛ ye.”
4 Fɛ mmle bɛɛkpana bɛɛtɛ ni di Yaa Ɔlaa Buɛtɛtɛ Yesaia kukũ kamɛ alɛ,
“Otii onwii kɔfaa di ɔfaafuu kamɛ ambuɛ alɛ,
‘Bilolaa osuku bitɛ Saate nwu ɔwabee.
Biɛkyɛkyɛsa abaya abafe ni bitɛ nwɔ.
5 Bietĩi abaya amuu niekyofo ni.
Biebiɛ kafɔɔ abokote ku kobokotee amuu bitɛ kaasɔ.
Bieyilasa sisuku se niɛkɔnkɔ ni.
Biɛkylɔkylɔsa abaya kafɔɔ niekukyukukyu ni.
6 Kayi batii bamuu manya Yaa Didiki!’ ”
7 Batii kpinwu ladie baawa alɛ Yohane akpeesa ma Yaa ntu. Ni aatɔkɔ ma alɛ, “Aye kɔsaanwu kɔna! Owe niɛka ye alɛ biatoso di Yaa lɛkanko le nikɔwa ni kamɛ?
8 Bibla asaa ya nimatuo alɛ bitookyi ni siikpile lee kamɛ. Biediɛ obuɛ ɔtɔkɔ suoto lee bilɛ Abraham banantii bile. Diekye kɔtɔkɔ ye nlɛ, Yaa mafuo afuɔ ya mmle ɔyɔ ɔbla banantii anta Abraham.
9 Nunua bia yi, batɔɔyɔ kafɛ beese di awoso sidu suoto kofokofoko. Kowoso lele ninantika abi biene yi, bababudi kũ, man-yɔ kũ mankpee di ɔtɔ kamɛ.”
10 Ninfɛ baatii nwu lakaalɛ nwɔ alɛ, “Ni be nfɛ buabla nunua?”
11 Ninfɛ aadiki kanya, aatɔkɔ ma alɛ, “Otii lele nikpe osi awu anyɔ, ayɔ anwii ata otii wɔ ninnaa ni kuanwii. Otii wɔ kafɔɔ nikpe ni alesaa, asɛko owo nɔɔ wɔ di alesaa nnaa ni.”
12 Akpooto bafuntɛ bawo kafɔɔ lawa alɛ, bakpeesa ma Yaa ntu. Ni baakaalɛ nwɔ alɛ, “Saatuotɛ, be dikpe ni buɔbla?”
13 Ninfɛ di Yohane latɔkɔ ma alɛ, “Bitanfũ akpooto bialenkeesa n-ya bɛɛta ye alɛ biafũ nii.”
14 Bakpɛtɛ bawo kafɔɔ lakaalɛ nwɔ alɛ, “Ni awo mɔ? Be dikpe ni buɔbla?”
Ninfɛ aatɔkɔ ma alɛ, “Bitan-yɔ suoto osie biafũ koto di otii kuonwii nnɛɛ, ee bitambudi otii kuonwii kanya di osuku kpile suoto. Bita ato lee ya biofũ ni sɛɛkpɛ mmɛ abuoye anu.”
15 Batii osuku onyu lakyako katoo ɔtaka, ni baatoobu alɛ, loo Yohane ninle Kristo wɔ boonyu ni osuku alɛ abawa ni nɛ.
16 Nioso Yohane latɔkɔ ma alɛ, “Ami, ntu kɔyɔ nkpeesa ye. Kafɔɔ otii wɔ nikɔwa ni sɛɛmaa nii nlenkee mi. Otii wɔ ninansiɛko alɛ bia kadiki nwɔ ni ntokota. Nnwɔɔ, abayɔ Ninwuna Klekle ku ɔtɔ ankpeesa ye.
17 Akle kɔfɛɛ nɔɔ di nnɛɛ kamɛ, abafɛɛlɛ ni kamɔɔ andiki ni kufuo kaamɛ, an-yɔ kamɔɔ abi ankpete di owu kamɛ. Kafɔɔ kufuo nkũ, abafiɛ kũ di ɔtɔ wɔ ninaanii ni diidii kamɛ.”
18 Yohane latɔkɔ batii nwu Yaa ɔlaa biene nwu di sisuku ate ate suoto, ni aaka ma alɛ, bakyisa nkpa, di nkpa lɛma disiɛbi kamɛ.
19 Kafɔɔ Yohane lasĩ ɔlaa aata Herode wɔ niale ni abaa ɔnɔɔfo, diekye aafũ obilɛma ɔsɔfɔ wɔ baatɔɔlɛɛ ni Herodia aayɔ, ku sikpile bamba se kpinwu aabla ni oso.
20 Nioso okpile wɔ ninlenke ni di Herode lakple aabla ni, ninle alɛ, aamufũ Yohane aatɛ leeyo.
Yohane Lakpeesa Yesu Yaa Ntu.
21 Obe wɔ di Yohane ntooloo ni batii Yaa ntu okpeesa, aakpeesa Yesu kafɔɔ. Obe wɔ di Yesu latɔɔpɛ ɔlaa aatɔɔta ni Yaa, kolo lasɛkɛtɛ.
22 Ninfɛ di Yaa Ninwuna Klekle lasoo nwɔ di suoto fɛ mmle di lɛlaapɔɔ nsoo ni nɛ. Ninfɛ baanu sɛlɔ lakye osi siabuɛ alɛ, “Afɔ ninle obi nii wɔ suoto ninantuna ni nɛ. Foobuo mi anu nwaa.”
Yesu Banantii Ninle Mba Mmle Nɛ.
23 Yesu lafũ fɛ alɛɛ afosi atiɛ di obe wɔ aakye ni ɔkpɛ nɔɔ kasɔ. Batii lanyu alɛ Yosef obi ale.
Yosef ote niale Eli.
24 Eli ote niale Mattat,
Mattat ote niale Lewi, Lewi ote niale Melki,
Melki ote niale Yanai, Yanai ote niale ni Yosef.
25 Yosef ote niale Matatia, Matatia ote niale Amos,
Amos ote niale Nahaum, Nahaum ote niale ni Esli,
Esli ote niale Nagai.
26 Nagai ote niale Mahat,
Mahat ote niale ni Matatia, Matatia ote niale Semein,
Semein ote niale Yosef, Yosef ote niale ni Yuda.
27 Yuda ote niale Yohanan, Yohanan ote niale Resa,
Resa ote niale Sorobabel, Sorobabel ote niale Sealtiel,
Sealtiel ote kafɔɔ niale Neri.
28 Neri ote niale Melki,
Melki ote niale Adi, Adi ote niale Kosam,
Kosam ote niale Elmadam, Elmadam ote niale Er.
29 Er ote niale Yosua, Yosua ote niale Elieser,
Elieser ote niale Yorim, Yorim ote niale Matat,
Matat ote niale Lewi.
30 Lewi ote niale Simeon,
Simeon ote niale Yuda, Yuda ote niale Yosef,
Yosef ote niale Yonam, Yonam ote niale Eliakim.
31 Eliakim ote niale Melea, Malea ote niale Mena,
Mena ote niale Matata, Matata ote niale Natan,
Natan ote niale Dawid.
32 Dawid ote niale Yisai,
Yisai ote niale Obed, Obed ote niale Boas,
Boas ote niale Salomo, Salomo ote niale Nahason.
33 Nahason ote niale Aminadab,
Aminadab ote niale Adimin,
Adimin ote niale Arni, Arni ote niale Hesron,
Hesron ote niale Peres, Peres ote niale Yuda.
34 Yuda ote niale Yakob, Yakob ote niale Isak,
Isak ote niale Abraham, Abraham ote niale Tera,
Tera ote niale Nahor,
35 Nahor ote niale Serug,
Serug ote niale Regu, Regu ote niale Peleg,
Peleg ote niale Eber, Eber ote niale Sala.
36 Sala ote niale Kainan, Kainan ote niale Arfaksad,
Arfaksad ote niale Sem, Sem ote niale Noa,
Noa ote niale Lamek.
37 Lamek ote niale Metusala,
Metusala ote niale Henok, Henok ote niale Yared,
Yared ote niale Mahalaleel,
Mahalaleel ote niale Kainan.
38 Kainan ote niale Enos, Enos ote niale Set,
Set ote niale Adam, Adam ote kafɔɔ niale Yaa nɛ.