8
Yesu Wɔ Ninle Wo Ni Oletatɛ Nɔɔfo Fɔle.
1 Nunua yi, lɛsaa finle le ninsi ni di ɔlaa wɔ mmle kamɛ, nwaako, buomiɛ bulɛ budiki butuo ni ninle alɛ, bukpe Oletatɛ Nɔɔfo wɔ mmle okle asi ni di Yaa wɔ diibu ntika ni di suoto lɛkakpomii, oletanɛɛkyɛ di osi.
2 Ɔɔbla ɔkpɛ fɛ oletatɛ di Yaa Akpanta Klekle ya ninle ni Akpanta amuamu di Yaa omu lɛyɔ nnɛɛ nɔɔ ɛɛbla nii. Diele batii niɛbla.
3 Manse Oletatɛ Nɔɔfo biala alɛ, aayɔ asaa ɔta ya manta ni ku babɔkɛɛ oleɔta anta Yaa. Nkpo okle kafɔɔ dikpe ni oletatɛ loo wɔ mmle lɛwɛ lɛsaa lewo ɛɛta ole ɛɛta Yaa nɛ.
4 Nse fɛ kasɔ ka mmle akpe yi, nse áale oletatɛ kuonwii. Diekye olebatatɛ ba ninta ni ole di Yuda batii kufiofa kanya nkpe kofokofoko.
5 Ɔkpɛ wɔ bɔɔbla ni fɛ olebatatɛ di Akpanta Klekle kamɛ yi, dile lɛsaa le ninkpe ni di osi bɔɔbla ni kunyii ni kũ, fɛ mmle okle mannyu lɛsaa mambla ni lete dile.
Bibu binyu mmle okle diate ni di Mose obe. Obe wɔ alɛ ɔɔpɛ ni Akpanta anta ni Yaa, Yaa latɔkɔ nwɔ alɛ, “Lolaa fanyu nwaa falɛ fɛɛbla lɛsaa biala diete fɛ nle okle latuo fɔ ni di kobokote osi!”
6 Kafɔɔ oletatɛ ɔkpɛ wɔ bɛɛyɔ beekpee ni di Yesu nnɛɛ kamɛ lefũ kaya kulenke nwɔ baayɔ baakpee ni di olebatatɛ kofole nnɛɛ kamɛ. Nkpo okle kafɔɔ di kanya ninii fɔle le di Yesu lekyeko Yaa nfũ ɛɛwako ni batii nɔɔ lefũ kɔya dilenke kanya ninii kofole nwu nɛ. Diekye kanya ninii fɔle nwu nkpo ntika di ɔlaa wɔ beebuɛ bɛɛtɛ ni ninlenke ni suoto.
7 Nse lɛsalɛsaa diɛlalaa di kanya ninii kofole nwu nkpo suoto, se diesinfĩ alɛ baakple mambla kanya ninii fɔle kukanwii.
8 Kafɔɔ Yaa lanya ɔtanlolaa ɔbla di batii nɔɔ suoto ni aabuɛ alɛ,
“Saate nwu labuɛ alɛ,
Binyu lo!
Obe kɔwa mase ni kanya ninii fɔle ɔbla ku
Israel kale batii
ku Yuda kale batii.
9 Dilabate fɛ kanya ninii le
lanii ni ku bawa lɛma
di obe wɔ laklee ma ni kaanɛɛtũ
ladieko ni di Egipte kasɔ suoto.
Diekye batabla di kanya ninii le lanii ni ku mma suoto.
Nkpo oso di amii, lakple ma di nkpaamaa nɛ.
Nkpo di Saate kobuɛ nɛ.
10 Saate nwu nkpo lakple aabuɛ alɛ,
Nnya kanya ka manii ni ku Israel kale nwu nkpo di obe wɔ nikɔwa ni kamɛ.
Kamayɔ kufiofa nii nkpee ma diisi kamɛ.
Kamakpana nwu kafɔɔ ntika ma di otu kamɛ.
Ka male ma Yaa,
mma kafɔɔ babakple mi batii.
11 Otii kuonwii kafɔɔ dilabasintuo owo nɔɔ lɛsaa
ee obilɛma alɛ atofo Saate nwu.
Diekye bamuu lɛma babatofo mi,
diɛyɔ ni di obisɔ biibii diɛlaase ni di ɔnɔɔfo yɛntɛle suoto.
12 Diekye kamanya ma nyaami n-yɔ sikpile lɛma se simuu bɛɛbla nii nkyɛ ma.
Diidii kafɔɔ namasinnyuma ɔsaabla lɛma lalaale nwu nkpo.”
13 Di obe wɔ nfɛ di Yaa kɔkakatɛ ni kaanya ninii fɔle nwu suoto, ni diotuo alɛ kɔkasale nwu nkpo ntookofo. Lɛsaa le kafɔɔ nintoobe diekofo nii, di obe kakui kamɛ, nimmafe nin-yu kunloo.