8
Nunua Kɔkakatɛ Di Alesaa Ya Man-yɔ Manta Ni Afiɔ Ole.
1 Nunua yi, komiɛ nlɛ nkakatɛ di alesaa ya man-yɔ manta ni afiɔ ole. Nwaako buye bulɛ, bamuu lee bikpe lɛsaatofo. Kafɔɔ biye bilɛ, lɛsaatofo le mmle okle nta otii ntakatɛsa suoto katoo, kafɔɔ lɛbɔmbɔ nta otii nkyɛ sitũ
2 Nse otii owo lenyu alɛ aye lɛsaa, nwaako aaye fɛ mmle okle dikaatɛ alɛ aatofo nii.
3 Kafɔɔ otii wɔ nimbɔmbɔ ni Yaa, Yaa n-ye nwɔ.
4 Nioso di alesaa ya man-yɔ mata ni afiɔ ole, ole suoto yi, buye bulɛ afiɔ diele lɛsalɛsaa kaayi ka mmle kamɛ. Buye kafɔɔ bulɛ Yaa onwii ko ninkpe.
5 Mintɛ batii kpinwu lefũ beenu alɛ afiɔ ku basaate kpinwu nkpe di osi ku kasɔ, awo yi, buye bulɛ Yaa onwii lete ninkpe.
6 Nnwɔɔ ninle Teete wɔ niɛbla ni asaa amuu nɛ. Nnwɔɔ kamɛ bukpe nkpa. Saate onwii kafɔɔ ninkpe dile ni Yesu Kristo. Nnwɔɔ suoto di Yaa lefe ɛɛbla asaa amuu. Nnwɔɔ kamɛ kafɔɔ bukpe nkpa nɛ.
7 Nwaako kafɔɔ diele batii bamuu ninye ɔlaa wɔ mmle. Batii bawo afiɔ ɔtɔ ntɔɔtɛ diɛkaa ma diɛbase bia miɛ alɛ nse beele alesaa ya mmle okle, makple mantoonyu alɛ afiɔ alesaa ale. Disibu lɛma nlo ma lɛpɔɔ, mannyu alɛ batɔɔkpɔnɔnfɔsa suoto ku alesaa nwu.
8 Diele alesaa awo ole nimata alɛ awo ku Yaa ntɛɛ nlalaa. Nse buosĩ alesaa awo ole, dielalasa lesalesaa di suoto loo. Nkpo kafɔɔ nse buoole alesaa awo, dilabata wo sitũ ɔkyɛ nɛ.
9 Bilolaa binyu bilɛ, kayaa ka bitɔɔwɛ ni dilabakple osuku ditĩisaa dita batii ba di ofũ onu lɛma nnaa ni osie alɛ baabla okpile.
10 Bu fanyu nse otii wɔ di ofũ onu nɔɔ nnaa ni osie lɛnya otii wɔ ninkpe ni lɛsaatofo le nintɔɔkyɛ ni sitũ kole alesaa di kafiofa, dilabata alɛ nnwɔɔ kafɔɔ abuɛ alɛ oole alesaa ya bɛɛyɔ bɛɛta ni afiɔ ole?
11 Nle mmle oso, obilee wɔ di Kristo lekpi ɛɛta nii, di ofũ onu nɔɔ nnaa ni osie mawɔɔ, ta ninumbe lɛfɔ oso.
12 Nse diɛwa nkpo, ni fɔɔbla okpile fanyila di bafũbanutɛ wo lɛfɔ suoto. Ni fɔɔta alɛ mba di ofũ onu lɛma nnaa ni osie kofũ kakɔ di situ lɛma kamɛ. Nse diɛbla nkpo kafɔɔ ni fɔɔbla okpile fanyila di Kristo suoto.
13 Nkpo oso nse alesaa ya male nii mata obiloo mbla okpile yi, ni madiɛ ole. Mmle okle di obiloo dilabasimbuo ni di okpile kamɛ.