12
Atasaa Ya Niekye Ni Ninwuna Klekle Nfũ.
1 Babiloo, di Yaa Ninwuna kamɛ atasaa suoto yi, noomiɛ nlɛ lɛsalɛsaa kuninwii diwofa ye.
2 Biye bilɛ di obe wɔ minanye ni Yaa, biayu di sisuku ate ate suoto bialaatɔɔtɔ afiɔ ya ninnaa ni nkpa.
3 Nioso komiɛ nlɛ bitofo bilɛ, otii wɔ di Yaa Ninwuna kɔkpaa nii, dilabafuo “Lɛkpaani ɔlaa obuɛ di Yesu suoto.” Nkpo kafɔɔ di otii kuonwii dilabafuo odiki obuɛ alɛ, “Yesu ninle Saate,” diediki Yaa Ninwuna nikɔkpaa nwɔ.
4 Yaa Ninwuna kamɛ atasaa ate ate ninkpe, kafɔɔ Ninwuna ninwii nwu ninta nya.
5 Sisuku ate ate mumbla sɛkpɛ, kafɔɔ Saate nwu onwii mumbla sɛkpɛ munta.
6 Sɛkpɛ ɔbla ate ate ninkpe, kafɔɔ Yaa onwii nwu ninkpee batii bamuu osie mambla simuu.
7 Lɛtasaa lele di otii biala nkpe, Yaa Ninwuna niata otii nwu alɛ diale lɛkyakaako ninta batii bamuu.
8 Otii owo nnwɔɔ, Yaa Ninwuna lɛtɔɔ lɛtasaa le nimatɔɔ antofo ni lɛkakatɛ di ninumbe kamɛ diefe ni di Ninwuna suoto. Otii owo kafɔɔ, Ninwuna nwu lɛtɔɔ lɛtasaa le nimatɔɔ antofo ni lɛkakatɛ ku lɛsaatofo diefe ni di Ninwuna nwu suoto.
9 Otii owo ɛɛtɔɔ ofũ onu diefe ni di Ninwuna nwu suoto. Otii owo kafɔɔ ɛɛtɔɔ osie wɔ man-yɔ man-yɔɔsa ni ofiɛ, diefe ni di Ninwuna nwu suoto.
10 Ninwuna nwu kafɔɔ ninta otii bamba osie ambla sɛkpɛ se niɛbla ni ɔkpɛ. Otii bamba kafɔɔ ɛɛtɔɔ osie alɛ aabuɛ Yaa ɔlaa wɔ bɛɛyɔ beekpee nwɔ ni ninnɛɛ. Ɔbamba kafɔɔ bɛɛtɔɔ osie alɛ aatofo atasaa ya niekye ni Yaa Ninwuna nfũ ku n-ya ninankye ni Yaa Ninwuna nfũ. Ɔbamba kafɔɔ bɛɛtɔɔ osie alɛ aakakatɛ di sele ate ate kamɛ. Ɔbamba kafɔɔ bɛɛtɔɔ osie alɛ aadiki sele ate ate kasɔ.
11 Yaa Ninwuna ninwii nwu nimbla asaa ya mmle amuu, ansɛ atasaa nwu ate ate anta otii biala fɛ mmle dilɛ nwɔ nii.
Kristo Suoto Sina Sinwii Ku Mblakɔ Ate Ate.
12 Kristo nte fɛ otii suoto sina ninkpe ni aba ate ate. Mintɛ suoto sina sinwii sile, bɛɛbla aba ate ate bɛɛkaasa sĩ di suoto.
13 Nkpo okle batookpeesa bamuu loo Yaa ntu di suoto sina sinwii nwu kamɛ diefe ni di Yaa Ninwuna ninwii nwu suoto nɛ. Mintɛ Yuda otii fale woo, kale bamba otii fale woo, ɔlanle fale woo, ee fasiko suoto. Ninwuna ninwii nwu kafɔɔ ntu bɛɛta bamuu loo buonyi nɛ.
14 Diekye suoto sina nwu nkpo, diele lɛsaa ninwii ko dile. Kafɔɔ aba ate ate kpinwu beesiisa bɛɛbla sĩ sinwii.
15 Nse kɔkpaa lebuɛ alɛ, “Obe wɔ ninanle ni kɔnɛɛ oso, ninkyakaa di suoto sina nwu suoto yi,” ninkpo dilootuo alɛ nwaako kuole suoto sina nwu kakyɛ kawo.
16 Nkpo kafɔɔ nse kotoko lebuɛ alɛ, “Obe wɔ ninanle ni ninu oso, ninkyakaa di suoto sina nwu suoto yi,” ninkpo dilootuo alɛ nwaako kuole suoto sina nwu kakyɛ kawo.
17 Ni nse suoto sina nwu simuu nle ninu ninwii, lɛ dibabla fiɛ abafuo lɛsaa lewo onu? Nse kotoko kafɔɔ di suoto sina nwu nle, lɛ dibabla fiɛ abafuo lɛsaa lewo ofũfũ onu?
18 Nse biɛtɛ anu bienyu, bibanya bilɛ Yaa lɛyɔ suoto sina aba ate ate ɛɛkyasa baawo, ɛɛbla suoto sina nwu simuu fɛ mmle omiɛ alɛ site nii.
19 Nse simuu lɛsaa ninwii dile, ni se suoto sina nnaa.
20 Fɛ mmle biɔnya nii, aba ate ate ninkpe sĩ, kafɔɔ, suoto sina sinwii sile.
21 Ta ninkpo oso, ninu dilabafuo kɔnɛɛ ɔtɔkɔ alɛ, “Noomiɛ fɔ di lɛsalɛsaa nii kamɛ.” Nkpo okle kafɔɔ diisi dilabafuo kɔkpaa ɔtɔkɔ alɛ, “Noomiɛ fɔ di lɛsalɛsaa nii kamɛ nɛ.”
22 Lɛbamba kafɔɔ ninle alɛ, suoto sina aba ya niɛwakasɔ alenke nii, nse anaa wo di suoto, bulabafuo lɛsalɛsaa ɔbla.
23 Aba ya kafɔɔ buonyu bulɛ aafĩ nii, nnya ninle aba ya munlolaa munklee ni nwaa nɛ. Aba ya kafɔɔ buɔnya bulɛ ɔlɔɔlɛ ni onyu munkleklesa aba nwu osie kanya bulɛ aalɛ onyu,
24 mundiɛ aba ya nikɔlɛ ni onyu. Yaa omu niesiisa suoto sina nwu nkpo ɛɛta alɛ, buaayɔ dibu munta aba ya ninɔɔlɛ ni onyu.
25 Ɛɛbla ni nkpo alɛ kasɛ kukanwii dilaasiɛ di suoto sina nwu nkpo suoto, alɛ lɛba biala kalolaa owo nɔɔ anklee ku dibu.
26 Nse suoto sina kakyɛ kawo konu dibuo, suoto sina nwu aba bule kafɔɔ nnu dibuo. Nse bɛɛtansa suoto sina nwu kakyɛ kawo, suoto sina nwu aba bule kafɔɔ nnya suoto lɛyɔɔ.
27 Nkpo oso, bamuu lee niesi biɛbla Kristo suoto sina nwu nkpo, ni bile suoto sina nwu aba ate ate nɛ.
28 Di bafũbanutɛ kasiisakɔ yi, Yaa lɛyɔ wo eese di aba ya niesiɛko wo nii. Lɛkasale, batɔkyɛntɛ, lɛyɔɔfa, Yaa ɔlaa babuɛtɛtɛ, ditiɛfa, basaatuotɛ. Ni kamaa, mba nimbla ni sɛkpɛ se niɛbla ni ɔkpɛ, fiɛ di mba bɛɛta ni osie alɛ baayɔɔsa ni sifiɛ ntikanko, fiɛ baakyakaakotɛ, batunletɛ ku mba nimbuɛ ni sele ate ate.
29 Diele batii bamuu ninle batɔkyɛntɛ, ee Yaa ɔlaa babuɛtɛtɛ, ee basaatuotɛ. Diele otii biala kafɔɔ bɛɛta osie alɛ ayɔ abla sɛkpɛ se niɛbla ni ɔkpɛ.
30 Diele otii biala kafɔɔ bɛɛta osie alɛ ayɔ ayɔɔsa sifiɛ, ee akakatɛ di sele ate ate kamɛ, ee adiki sele ate ate se mambuɛ ni kasɔ.
31 Nkpo oso bita situ lee sitika di atasaa ya niefĩ alenke ni suoto.
Asaa ya niefĩ alenke ni amuu ninle n-ya kɔwa ye ni ɔbatuo nɛ.