Brit Eras
Matius
ikeskye
Tun a khatu nekre klyosu kitab ne kralake
Kitab neke ne Matius ikesy Brit Eraske ti ne. Matius neke Yesuske wasi matoha Ike it ne. Kitab ne kisike ne Brit Eraske, ma klyosu o Yesus neke Mesias I, neke Iry a Hulasokwe isusu ma ika Raja ode iaorif irkye ne, ma ktyoha tnyetak Hulasokwe ihatetak ti heitlulswo. Ode iry manety nyanoare rkesy ti Kitab Lanke de, neke Tnyetak a Mtuke, ma kbyohe, Mesias neke Iry a Hulasokwe ihatetak ma ana inal I ma ioryeta nuske ktem ne. Ode biar ma Yesus neke radur I o Yahudi, ma lan I o Yahudi dakun, keskyede Brit Eras ne lema ti iry Yahudi-nare bo, de ti iry mamin ti nuske ktem ne mumu. Kitab ne kisike khyehyeike kihes Yesuske, neke kyala kyosy radur ti Ike, maktei o Yohanes byabtis a I, maktei o kihes Yesuske wasi karya ribun ikarya ti propinsi Galileake. Ode ti Galilea ne Yesuske yajar iry ribunke, ode nyoha kbainare toha iry ribunke ma eras sir. Ode kitab ne kihes dakun ohe, Yesuske byaa yoli nus kabei ta kabei bo, neke yala yosy propinsi Galileake, ma ti yait nus lan Yerusalemke o a propinsi Yudeake. Ti Yerusalem desike ne Yesuske myaty, maktei o myorif huruk. Ode tatos ti kitab a Matius ikesy ne ohe, Yesus neke Tuanggurw lan a I, kali yal haretke toha Hulasokwe, ma tyanuk tnyetak Musake kbuanare, ode yajar ktelanare ribun ti iry ribunke. Ktela ribun iajar nekre kihe i ti bagianke enasim. Neke kolnye:
Pasal 5-7ke: Yesuske imin ti kususwanke ma yajar iry ribunke. Ode ktela iajar nekre ktela mamin ti irkye ralake kralake, ode ti irkye wasi ktela ialanare, ode ti kolkyabei ma Hulasokwe ika Raja ode ihareta ti irkye ralake kralake ne.
Pasal 10ke: Yesuske syurat wasi matoha I dehean a kresi enaru desikre ti wait karyaare.
Pasal 13ke: Yesuske ihliak tunke ti kolkyabei ma Hulasokwe ika Raja ode ihareta ti irkye ralake kralake ne.
Pasal 18ke: Yesuske yajar ma, iry a matoha I nekre musti mo raharw wait mormyorifare kola ktela iajar nekre.
Pasal 24-25ke: Yesuske yajar wasi matoha Iare, ti kolkyabei ti ana nuske ktem ne kilodur ne, ode ti ktela Irkye Ananke ana ima huruk ne.
Kitab ne kisike kolnye
1. Klolan a Yesuske ebnwo matruma ma ti kyait Yesuske radur ti I ne (1:1–2:23)
2. Yohanes Mababtiske wasi karyake (3:1-12).
3. Yohanes byabtis Yesuske, maktei o ngkeskwakwe hyury a Yesuske (3:13–4:11).
4. Yesuske yajar o Galilea (4:1–18:35).
5. Yesuske lyakut yosy Galilea ma ti yait o Yerusalem (19:1–20:34).
6. Yesuske yajar ti Yerusalem ti minggu manosy lyakwe ma ti kyait ana imaty ma ramlin a I ne (21:1–27:66).
7. Yesuske myorif huruk ode syusu tenanke (28:1-20).
1
Yesuske Ebnwo Matruma
(Luk. 3:23-38)
1 Yesus Kristus neke ebnwo matruma Daud, ode Daud ebnwo matruma Abraham. Neke ksalake kolnye,
2 Abraham anan a Ishak,
Ishak anan a Yakub, ode
Yakub anan a Yehuda yor wainare.
3 Yehuda anan a Peres yor Zerah. (Peres yor Zerah neke enat Tamar.)
Peres anan a Hezron,
ma Hezron anan a Ram.
4 Ram neke anan Aminadab,
ode Aminadab anan Nahason,
ma Nahason anan a Salmon.
5 Salmon sawa Rahab ma anat a Boas,
ma Boas sawa Rut ma anat a Obed,
Obed anan a Isai.
6 Ode Isai anan a Daud, ma Daud neke ika raja.
Ode raja Daud isaa yor enen somke, ma anat a Salomo, enen som neke Uria sawa.
7 Ode Salomo anan a Rehabeam,
ma Rehabeam anan Abia,
ode Abia anan Asa,
8 Asa anan a Yosafat,
Yosafat anan a Yoram,
Yoram anan Uzia.
9 Uzia anan Yotam,
Yotam anan a Ahas,
Ahas anan Hizkia,
10 Ode Hizkia anan a Manasye,
ma Manasye anan Amon,
ma Amon anan Yosia,
11 Ode Yosia anan Yekhonya yor wainare, neke radur sir ti kyoat ramin ti nus Babelke, kali iry a Babel-are rma ma rkumak Israel-are, ma rhait sir bai nus Babelke ti raka at ti so.
12 Ode iry a Israel-are rbetik toha Babel ma rulak sir mai Israel huruk ma ramin ti bonyo,
Yekhonya anan Sealtiel,
ode Sealtiel anan Zerubabel.
13 Ma Zerubabel anan Abihud,
ode Abihud anan Elyakim,
ma Elyakim anan Azor,
14 Ode Azor anan a Zadok,
ma Zadok a anan Akhim,
ode Akhim anan Eliud,
15 ode Eliud anan Eleazar,
ma Eleazar anan Matan,
ode Matan anan Yakub.
16 Ma Yakub anan a Yusuf, neke Maria lai i,
ma Maria neke i ne idur hahak a Yesuske ne. Yesus neke Mesias I.
17 Dendye Yesuske ebnwo matrumanare, neke kyala kyosy taras Abrahamke ma ti kyait a taras Daudke, neke taraske hean a kresi enaat ma desy. Ode kyala kyosy a taras Daudke, ma ti kyait a taras raotuk Israel-are bai Babelke, neke taraske hean a kresi enaat huruk. Maktei o kyala kyosy a taras raotuk Israel-are bai Babelke, ma ti kyait taras a Kristuske, neke taraske hean a kresi enaat huruk dakun.
Radur Yesus Kristuske
(Luk. 2:1-7)
18 Waikw o hatnimakw e, tkunw a Yesus Kristuske radur ti I ne, neke kolnye: Maria neke warar mur a i, ma ana Yesuske ena-na i desy. Ode kyoat desike Yusuf ika warara yor Maria, ma Yusuf lenla yal i ma sawa i bonyo, Maria neke yor tenanke de. Keskyede Yusuf lema hye ohe, Maria inor tenanke ne, neke Hulasokwe Memeanke kkyarya ti i ma desy.
19 Keskye Yusuf neke ralake eras ode nelnyely, ode tyohak ti Hulasokwe. Dendye kyoat ihe o warara Maria ne inor tenanke bonyo, yohut ti ralake ma ana lema isaa yor i. Keskye ana lema yala ma kdudu, kali lema byuma Maria ne anike kiray ti ribunke khahake.
20 Keskyede Yusuf ryekan ti ktela desy nini yenaf. Ode kyoat ienaf bonyo, myey o, Hulasokwe wasi nyaso manosy laitke mya ma syusu tenanke ti i, ma byohe, “Yusuf a Daud tesnwo natu o, kete ralamkwe kakan, de mal Maria ma sawamw a i. Kali naman mamin a fteike krala desy, neke Hulasokwe Memeanke kkyarya ti i ma desy,
21 ma ana idur hah bonyo ananke wamwany a I, desikeo musti mo maki anike ti Yesus. Kali I desike ana yaorif iry matohak ti Iare, toha wait lim o sal nekre.”
22 Ktela desike kdi ti, ma ktyoha tun Hulasokwe itanuk ti wasi manety nyanoare, ma rakesy ti wait kitabare ne, ma kbyohe,
23 “Mlay bain ohe, ana warar murke it ma lenla yenaf yor wamwankye it elik, neke yor tenanke,
ma idur hahak naman wamwankye it,
ma raki anike ti Imanuel, neke kbuanke o, ‘Hulasokwe yor a ity.’ ”
24 Dendye kyoat Yusuf ibatar bonyo, tyoha haret nyaso manosy laitke itanuk ti i desy. Lemadendye yal Maria ma sawa i.
25 Keskyede Yusuf lema yenah yor Maria nini kyait a Maria wasi sew a idur hahke bo. Ode kyoat Maria idur hah bonyo, ananke wamwany a I, lemadendye Yusuf yaki naman desy anike ti Yesus.