27
1 Banji bahirima omu câha erhi kusîma obunguke kurhuma, owalonza obugale arhafà bwonjo.
2 Banafunde omurhi ekarhî k’amabuye gagwârhîne, ekarhî k’okugula n’okuguza ecâha ciyijà.
3 Omuntu orhasêzizi okurhînya Nyamuzinda, enyumpa yâge erhi yanajire oku idaho.
Enderho
4 Nka bashebula ensheke zinasigale oku kayungiro, kwo n’okwo binwa bya muntu bimanyîsa ishembo lyâge.
5 Omubumbi muliro arhangulamwo obuzibu bw’enyungu zâge, omuntu naye binwa byâge bamurhangulamwo.
6 Ishwa limanyirwa oku mburho yarhengamwo, kwo n’okwo ebinwa by’omuntu bimanyîsa eciri emurhima gwâge.
7 Orhakungaga omuntu embere oyumve eci adesire, aho ho wamugwârhira.
Obushinganyanya
8 Erhi wakakulikira obushinganyanya, wanabuhikakwo, obuyambale obwo nka mwambalo gwa lusiku lukulu.
9 Ecihungu cirhagwa aharhali câbo, obushinganyanya bulonza obukulikire.
10 Entale kulingûza eringûza omunyama gwâyo, ecâha naco cisîma abalyâlyanya.
11 Ebinwa by’omuntu nkana ensiku zoshi kurhimanya, ci ecingolongolo kwo cihinduka nka mwêzi.
12 Nk’oli mwe n’ebingolongolo, onagere amango, ci nk’oli mwe n’abantu nkana, ogende buzira bwôba.
13 Ebinwa by’abahwinja bibî bya kushologosa, okusheka kwâbo erhi kucishingira byâha.
14 Ebinwa by’osîma okucîgasha, binarhume emviri ziri oku irhwe ly’omuntu zagurumanwa. Okulongôla kwâge kunafuke abantu amarhwîri.
15 Okulongôla kw’abacîbonyi mukò kubulaga, n’ebijâci byâbo bibî bya kushaza.
Amahwe
16 Omuntu obêra amahwe arhalangâlirwa, na ntà mwîra nkana abona.
17 Osîme onalangâlire omwîra wâwe, ci olusiku wâbera amahwe gâge, erhi na hoshi aho obwîra bwamâfà;
18 bulya kwo wayîsire obwîra nka kula bayîrha omubisha.
19 Kul’omuntu akanalîka akanyunyi afumbîrhe, kacîbalalira, kwo nâwe walîsire omwîra, orhâcimubone.
20 Orhamukulikiraga, mîra akol’ali kulî, acîgendîre kula akashafu kayâka omurhego.
21 Banarhube ecihulu, bababalire n’ecijâci, ci omuntu wabasize ihwe, nanga.
Obulyâlya
22 Omuntu okomakomya erhi bulyâlya adwîrhe asinga, na ntâye wamurhanga.
23 Amango ali embere zâwe, ye lûbika, ebinwa byâwe binamurhwe yêshi, buzinda akunioke, akuderhere oku orhadesire, aderhe mpu wajâcire lebè.
24 Nshomba binji, ci oyo muntu ntamubonakwo, na Nyamuzinda arhamusîma.
25 Obanda ibuye emalunga, ah’irhwe acibandalyo, olibandira obulenzi yêne ocîrenganya.
26 Ohumba omwîna, agurhogeramwo, orhega omurhego gunamugwârhe.
27 Ecibî cirha nnaco, arhamanya ciru olunda cahubuka.
28 Akanege n’ebijâci bibà bya mucîbonyi, ci kwône olwihôlo lumulingûzize nka ntale.
29 Omu murhego bagwa abantu bacîshingira okuhanyagala kw’abantu binjà, abôla amagala gabalya embere bafè.
Obumvu
30 Obumvu n’obukunizi nabyo bindi bikabulirwa, bimera omu ishwa ly’enkola-maligo.