31
Okufà kwa Saulu n’abagala
1 Erhi Abafilistini babà bamakoza entambala kuli bene Israheli, bene Israheli bahimwa, bakul’omulindi bakolaga bayâka Abafilistini, batumirhwa banayîrhirwa banji oku ntondo ya Gilibowa.
2 Abafilistini baharhiriza bwenêne Saulu n’abagala bâge, Abafilistini bayîrha Yônatani, bayîrha Abinadabu na Malkishuwa, boshi bene Saulu.
3 Eyo ntambala yâbà ya kubabaza bwenêne Saulu, erhi abalwî b’emyampi bamuyûlubula, bamubandira aha ndashi.
4 Oku bundi Saulu anacibwîra omwambali wakazâgibarhula emirasano yâge erhi: «Yômola engôrho yâwe oyinfunde lyo abà barhakembûlwa barhagiba bo bayishiyingwika n’okumpemukirakwo.» Ci olya mwambali arhayêmêraga erhi bwôba burhuma. Lêro Saulu yêne arhega engôrho yâge ayikumbamwo.
5 Erhi olya mwambali abona oku Saulu amâfà, naye arhega eyâge ngôrho ayikumbamwo bafà boshi kuguma ntyôla.
6 Ntyôla kwo bagukumusire boshi lusiku luguma, Saulu na bagala basharhu, omubarhuzi w’emirasano yâge n’engabo yâge yoshi.
7 Bene Israheli bali olundi lunda lw’akabanda n’abâli olunda lwa Yordani erhi babona oku bene Israheli bayâsire, erhi banamanya oku Saulu anafîre haguma n’abâna bâge, barhenga omu bishagala byâbo bacîyâkira, erhi Abafilistini bayisha babibêramwo.
8 Erhi buca, Abafilistini bayisha bakola balitungôla emifù, bashimâna Saulu na bagala basharhu batulamire oku ntondo ya Gilibowa.
9 Bamutwa irhwe, barhôla n’emirasano yâge, buzinda bw’aho bàrhuma entumwa mpu bagendimanyîsa ogwôla mwanzi mwinjà omu cihugo c’Abafilistini coshi, omu nyumpa za banyamuzinda bâbo n’omu lugo lwoshi.
10 Emirasano yâge bayibîka omu ka-Astarte n’emirhumba bayimânika oku côgo ca Betisheani.
11 Abantu b’e Yabeshi erhi bayumva ebi Abafilistini bahenyire Saulu,
12 ngasi balume banakola balwa entambala boshi bakomekera, balâla bagenda kuhika bagendimanula omubiri gwa Saulu n’ey’abagala kulya côgo ca Beti-Sheani, banashubiyisha bahindamusire bahika aha Yabeshi, ho babadulikiraga muliro.
13 Bayanka amavuha gâbo bagabisha idako ly’omurhi ahôla Yabeshi, banajà omu mishîbo y’okucîshalisa nsiku nda.