14
Akavango n’obuhane
1 Olubaga lwoshi lwalogôshera, lwabanda orhuhababo, lwalakûla obwôla budufu boshi.
2 Bene Israheli boshi bakazicîdudumira Mûsa n’Aroni, n’endêko yoshi yababwîra, erhi: «Ka rhurhankafirire omu cihugo c’e Mîsiri nîsi erhi munôla irungu erhimwo.»
3 Carhuma Nyamubâho arhuhêka muli ecôla cihugo, omu engôrho yagendirhumalirira? Bak’irhwe n’abâna bîrhu bakolaga bagendiba mpira zâbo. Ka kurhali kwinjà kuli rhwe rhucîshubirire e Mîsiri erhi kwo?
4 Banacibwîrana bône nannene, mpu: «Rhucishoge owîrhu murhambo, rhucîshubirire e Mîsiri»
5 Mûsa n’Aroni banacikumba bûbi embere za bene Israheli boshi.
6 Yozwè, mwene Nuni na Kalebu, mwene Yefunè, bantu babirhi omu bagendigiyenja ecihugo, basharhula emyambalo yâbo.
7 Banacibwîra endêko ya bene Israheli yoshi, mpu: «Ecihugo rhwageziremwo coshi nti rhucilorereze, ciri cihugo cinjà bwenê.
8 Nka Nyamuzinda arhurhonyize yêne anarhuhêka muli ecôla cihugo, anarhuheco, ciri cihugo cadubukamwo amarhà n’obûci.
9 Ci kwônene murhahîra mukagomera Nyamubâho, murhanayôbohaga abantu abantu bali muli ecôla cihugo, bulya rhwabahungumula, owakazâgibalanga acîyegwîre kuli bo, na Nyamubâho ali haguma nîrhu, murhabayobôhe.»
Oburhè bwa Nyamubâho n’obulagizi bwa Mûsa
10 Olubaga lwoshi lwahiga mpu lukola lwababanda amabuye, ci agôla mango irenge lya Nyamubâho lyanacîyêrekana oku Ihêma ly’embugânano embere za Bene Israheli boshi.
11 Nyamubâho anacibwîra Mûsa, erhi: «Kuhika mangaci erhi lwanabula okunyêmêra n’obwôla ludwîrhe lwabona ebisômerîne ndwîrhe najira ekarhî kâbo.
12 Nkolaga naluhunikakwo ecihûsi, mmbamalîre, wêne mbè we njira ishanja linene kulusha na lizibu kulusha eri.»
13 Mûsa anacibwîra Nyamubâho, erhi: «Abantu b’e Mîsiri bayishi oku okuboko kwâwe kudârhi warheremagyamwo abâla bantu kurhenga emwâbo, n’okwôla bakumanyisize abantu b’ecôla cihugo.
14 Boshi bayishi oku w’oyu Nyamubâho, ôbà ekarhî k’olu lubaga; oku onakazicîyêrekana emwâbo busù oku busù, w’oyu Nyamubâho; bayishi oku ecitù câwe cibà enyanya zâbo, bayishi oku onakazigenda embere zâbo mûshi omu nkingi y’omuliro.
15 Erhi wankayîrha olu lubaga luhungumuka nka muntu muguma, amashanja gayumvagya ebyadesirwe kuli we gakolaga gayishiderha erhi:
16 Nyamuzinda arhali agwêrhe obuhashe b’okuhêka olubaga muli cirya cihugo alagânanaga mpu abahà co; banaderha mpu co cirhumire abayirhira muno irungu.»
17 Obuhashe bwa Nyakasane buyêrekanage bunôla oku bunabà bunene, nka kulya wanamanyisagya erhi oderha, erhi:
18 «Nyamubâho akêreza omu kukunira, abà na mugale omu bwinjà, anababalire amabî n’ecâha; ci arhankalola omuntu oli n’ecâha nka muntu mwêru kwêru, anahanire obubî bw’ababusi oku bâna bâbo, ciru n’oku bâna b’iburha lya kasharhu n’iburha lya kani.
19 “Yâgirwa, obabalire olûla lubaga kuli obûla bubî lujizire erhi bwonjo bwâwe bunji burhuma, obabalire nk’oku onayôrha obabalira olûla lubaga kurhenga e Mîsiri kuhika hanôla”».
Okubabalirwa n’obuhane
20 Nyamubâho anacishuza, erhi: «Nababaliraga nk’okwôla onasengire;
21 “Ci, mbà nzîne! N’irenge lya Nyamubâho lyabumba igulu lyoshi!”
22 “Abantu boshi babwîne irenge lyâni n’ebisômerîne najiraga e Mîsiri na omw’irungu, abantu bamantangula kali ikumi, barhanyumva izù lyâni”,
23 “abôla boshi barhabone kwo cirya cihugo nalaganyagya n’endahiro ababusi bâbo. Ntâye ciru n’omuguma muli balya bangayaguzagya wacilolakwo”.
24 “Ci mwambali wâni Kalebu yeki, waligwêrhe gundi gundi mûka, anayôsire acîshwêkire kuli nie, namuhisa muli ecôla cihugo alijîre, n’iburha lyâge lyaciyimamwo”.
25 “Omunya-Maleki, n’omunya-Kanâni bayûbasire omu kabanda: irhondo, moyo muhindamuke, mujè omw’irungu, omu njira y’ebwa nyanja ndukula”».
26 Nyamubâho ashambâza Mûsa n’Aroni, ababwîra, erhi:
27 «Kuhika mangaci erhi nanayôrha nalembera olûla lubaga luli ntyâla, olwakaziyôrha lwacîduduma kuli nie. Nayumvîrhe eyôla midudumo ya bene Israheli kuli nie.
28 Ogendibabwîra oku mbà nzîne! Nyamubâho okudesire: namujirira nk’okwôla mwanaderheraga omu marhwiri gâni.
29 Ebirunda binyu munôla irungu byahungumukira. Mweshi mwe mwajiriragwa omubalè erhi muganjwa kurhenga oku wa myâka makumi abirhi kuhêka enyanya, mwe mwanacîdudumiraga kuli nie.
30 Murhahike muli cirya cihugo nalagânanaga nti najimuhiramwo, okuleka Kalebu mwene Yefunè na Yozwè, mwene Nuni.
31 N’abâna binyu barhôrho balya mwaderhaga mpu bakola bajibà nsimha za kuyîrhwa! Niehe nabahêka muli ecôla cihugo, bamanya ecôla cihugo mwagayaguzagya.
32 Ebirunda binyu mw’oyo, munôla irungu byahungumukira;
33 n’abâna hinyu bayabukana amasò gâbo munôla irungu, myâka makumi anni, bo bahêka ntyo obuhane bw’okubula obuyêmêre kwinyu, kuhika ebirunda binyu bihwêre munôla irungu.
34 Kulya mwagezagya nsiku makumi anni mwaja mwalolêreza ecihugo, ntyo kwo ensiku zàli, kwo n’emyâka yâbà: mwabarhula amabî ginyu myâka makumi anni. Mwanayumviza ahôla okucîberûla kuli nie bunguke buci kulêrha.
35 Niono nie Nyamubâho, nkudesire! Alaga oku najirira eyi ndêko mbî yacîhindulaga kuli nie: boshi bahwêra munôla irungu, mwo bafîra.»
36 Balya bantu Mûsa arhumaga mpu bajè balolêreza ecihugo na erhi bagaluka bàrhuma olubaga loshi lucidudumira Nyamubâho,
37 abôla bantu bàjaga baderha kubî kuli ecôla cihugo, abôla bantu bàbandwa n’olufù ho na halya, e mbêre za Nyamubâho.
38 Yozwè, mwene Nuni na Kalebu mwene Yefunè bône bafumire olufù muli balya bajagiyenja ecihugo.
Okuhimirwa aha Horma
39 Mûsa anacihêkera bene Israheli boshi ebyôla binwa; olubaga lwoshi lwanaciluha bwenêne.
40 Erhi babà bamazukiriza sêzi sêzi, bakanya, basôkera ebw’irhwêrhwè ly’entondo, banaciderha, mpu: «Rhwonôla! rhukolaga rhwasôkera eyôla munda Nyamubâho anaderhaga ebwa kubà rhwajizire ecâha.»
41 Mûsa ababwîra, erhi: «Carhuma mugendivuna irhegeko lya Nyamubâho? Okwôla kurhamubêre.
42 Murhasôkeraga eyôla bulya Nyamubâho arhali ekarhî kinyu! Mumanye mwene mwarhuma mugendihimwa n’abashombanyi binyu.
43 Bulya omunya-Maleki na omunya-Kanâni bali embere zinyu, mwahungumukira eyôla n’engôrho ebwa kubà mwacîberwîre kuli Nyamubâho; Nyamubâho arhâbè haguma ninyu.»
44 Baharha mpu bônene n’emisî yâbo basôkera oku ntondo; ci omucîmba gw’amalaganyo ga Nyamubâho na Mûsa, gurhafukunyagya omu karhî k’ecihando.
45 Oku bundi, balya banya-Maleki n’Abanya-Kanâni bayûbakaga omwôla ntondo babunguluka, babahima, babarhema bihimbi bihimbi kuhika aha Horma.