1 Okubundi Elihu ayûshûla aderha, erhi: 2 Ninyu mwe bashinganyanya, yumvi ebi binwa, mwe b’obumanye bunji, muntege okurhwiri. 3 Bulya okurhwiri kurhahimwa kurhonya enshambâlo, Nka kula ebiraka biyumva amanyunya g’ebiryo. 4 Rhulolage haguma bihi biri bya bushinganyanya, rhwêne na nene rhulole ebiri by’okuli. 5 Ayubu anadesire, erhi: «Mbà mushinganyanya, na Nyamuzinda àmbulîre okuli kwâni, 6 Omutwî w’emmanja (wâni) kuli nie ali mwîsi wa bantu, obubî bwâni kakola kafinjo karhafuma, n’obwo ntâbyo najizire» 7 Ngahi oli aka Ayubu akaciboneka? Onywa amabî nka mîshi. 8 Ogenda haguma n’abanya-byâha, Oyumvîkana n’abantu babî. 9 Karhali yêne waderhaga, erhi: «Bici kukwânana omuntu, omu kujira ebi alonzize, omu bwâmi bwa Nyamuzinda». 10 Munyumve nâni nka muntu mugumagumà, muyegûle kulî na Nyamuzinda amagalugalu; Ow’eyanya abà mushinganyanya. 11 Bulya ahemba omuntu nk’oku ebijiro byâge binali, alola ngasi muntu oku obwôrhere bwâge bunali. 12 Kwo binali Nyamuzinda arhabà nkola-maligo, Nyamubâho arhalenganya. 13 Ndi wamuhâga obuhashe burhegeka igulu? Ndi wankamubwizire mpu arhegeke igulu lyoshi? 14 Acîshubiranaga omûka gwâge, acicîbungiragakwo yênene empûsi yâge. 15 Ngasi ciremwa coshi cànkahubire, n’omuntu ashubire omu katulo. 16 Akabà oyîsh’iyumvîrhiza, ohire ehi emurhima: orhege okurhwiri oku mulenge gw’izù lyâni. 17 K’oshomba obushinganyanya anamany’irhegeka? K’anacîshomya mpu atwira Omushinganyanya Ogala-byoshi olubanja? 18 Obwîra abâmi mpu: «ntindi!» ogayaguza abaluzi. 19 Arhishi baluzi, arhanajira kabôlo ekarhî k’omugaraganda n’entagengwa, bulya boshi buli bulenga bw’enfune zâge. 20 Boshi kufà bafà omu kahwenyenye k’obudufu, entwâli ziherêrekere n’okuhirigirha, na ciri-misî amunaganule buzira kucihinya. 21 Amasù gâge garhahwa garhasingiriza enjira z’omuntu, n’okulolêreza amakano gâge. 22 Ntà mwizimya nîsi erhi lwikûngu, nyankola-maligo ankahash’icîfulikamwo. 23 Ntâye alâliza mpu ly’abonekana mushinganyanya omu masù ga Nyamuzinda. 24 Yêne ye vunyungula abanya-buhashe buzira kudôsibwa na ndi, ahîre n’abandi ahâli h’abo. 25 Abà amanyirire ebijiro bya ngasi baguma! anababulindike omu budufu n’okubalabarhanya. 26 Nka kula kwa banya-nkola-maligo, anabavunyungulire omu masù g’olubaga. 27 Bulya bàmugomîre, barhanashimbaga enjira zâge. 28 Balibuza omukenyi kuhika emirenge yâge yamuhikako, bamugayîsa ntyo erhi ayumva endûlù z’abîrhôhye. 29 Erhi ankabêra burhahinya na ntâye wamuhuliganya, erhi ankabwîkira obusù bwâge, buzira kuciyêreka ndi, erhi anababalire amashanja n’ebiremwa! 30 Anaciza omugoma omu kasirha k’amaligo, 31 Erhi oyo ankabwîra Nyamuzinda, erhi: «Nagomire, ntakacijira câha, 32 akabà nahabire, ombabalire, akabà nabuzire obushinganyanya, ntakacishubirira» 33 K’oku bwâwe, anali wa kuhana, bulya walahîre emihigo yâge? Wêne wacîshoga arhali nie, nîrhu orhuhage oku bwâwe bumanye! 34 Ci kwône abantu barhimanya, na ngasi mugula odwîrhe anyumvîrhiza, banambwîra, erhi: 35 «Ayubu arhaderha n’obumanye, bulya enshambâlo yâge erhali mwo bukengêre. 36 “Nâwe wêne oj’emulôndôlo, oyumvîrhize amashuzo gâge n’ag’abahalanjisi”. 37 “Bulya amâyûshûla oku câha câge, obugoma, asherêza okuli ekarhî kîrhu, anayûshûla ebinwa birhankasîmisa Nnâmahanga.”»