1 Abo bantu basharhu barhacishûbiriraga bashuza Ayubu bulya àli acîbona mushinganyanya kulusha. 2 Lêro oburhè bunene bwanacigwârha Elihu, mwene Barakeli muburhwa w’e Buzi w’omu mulala gwa Rama, akalihira Ayubu bwenêne kulya kubà Ayubu àcikungaga okuyâza Nyamuzinda. 3 Kandi akunirira balya bîra bâge basharhu ebwa kubà barhacishuzagya Ayubu, ciru n’akanwa kaguma, ntyo babà nka Nyamuzinda ye bakola batumuzize. 4 Erhi balya bâbo basharhu babà bali bashambâza Ayubu, Elihu arhangibalekera oluhyà, bulya bo bâli bamukulîre. 5 Ci, erhi Elihu acîbona ntâko bacishuzize Ayubu, oburhè bwajà oku bundi. 6 Go mango Elihu mwene Barakeli, muburhwa w’e Buzi, acîhâga oluhyà, aderha, erhi: «Omurhondêro gw’ebinwa bya Elihu Ndi nwâna wa cirhabà, na ninyu mukola muli bashosi, n’obwôba bwarhumire ntacishomya, okumubwîra oku mbwîne. 7 “Namâcîkêbwa nti maburhwa rhwashimba, Nti obûnji bw’emyâka bwo bwamanyîsa obushinganyanya”. 8 “Ci namacîbonera oku iroho ly’omuntu erhi Mûka gwa Nyamubâho, byône byankajira omuntu munya-bukengêre bunji”. 9 “Obûnji bw’emyâka arhali bwo burhimanya, ciru n’obushosi burhankahindula omuntu mushinganyanya”. 10 “Nâni, mmulalisirage nti muntege amarhwîri, bulya nâni nkolaga nayâlagaza obwâmi bumanye”. 11 “Kuhika mwa kano kasanzi nacikâg’ilînda ebinwa binyu, nalintezire amarhwîri nti nyumvîrhize engerêrezo zinyu, erhi na ngasi muguma adwîrhe alongereza ebi ashuza”. 12 “Nalintegêrîre ene mukaz’iderha na buno oku mwashubishuza, ci kwônene ntâye nabwîne agânya Ayubu omu nderho zâge, ntâye muli mwe walahîre ebi anashambalaga”. 13 “Mumanye mwankaderha, erhi: Rhwayumvîrhe lêro oburhimanya, ebi rhuyêmêra bibà bya bunyamuzinda ci birhali bya bumuntu”» 14 Niehe arhali ntyo ko nankajizire, nali nashuza Ayubu omu bindi binwa. 15 Bôhe bamaduma, ntà ishuzo ciru n’eliguma, bamabula obuderhe. 16 Nâni namâlingûzagya lêro namâbona ntâye ocidesire kanwa, Boshi bahwekêra, kuziga erhi n’ebinwa byabahwêrîre. 17 Nâni nkolaga nacîheba eluhya, nyâlagaze obwâmi bumanye. 18 Bulya nyunjwire binwa, bibirindisirwe n’omûka gumbamwo. 19 Omurhima gwâni kwo gunali nk’idivayi lyalingihôngolwa, lidwîrhe lyabirabira, n’okulonz’ibûndula orhubindi rhuhyâhya. 20 Ka nderhage nâni, lyo ntîmûkwa! nabumbûla akanwa mpâne ishuzo. 21 Ntalondôle ciru n’omuntu muguma, ntaderhe nti oyu ye nayinginga. 22 Cabà! Nie wa bene ntishi oku balimîrhiza, rhinga owandemaga mîra antingamiraga.