27
Ntabîhaga, ntankanabiha, nyîshi obukulu bwa Nyamuzinda
1 Ayubu ashubiyûshûla ebinwa byâge aderha, erhi:
2 Oku izîno lya Nyamuzinda Ozîne, olya ohakanyire okûmpà olubanja, Oku izîno ly’Ogala-byoshi olya onyunjuzize maganya,
3 Oku nanciyisa omûka, oku Omûka gwa Nyamuzinda gunacibà omu mazûlu gâni,
4 Akanwa kâni ntà mango kànâderhe ebigalu-galu, olulimi lwâni lurhakaderha eby’obunywesi.
5 Zije kuli na nâni enkengêro z’okukubwîra oku oyâzize, kuhika nfè erhi n’omu bwihangânyi nanciba,
6 Narhondîre okucîyûmânyanya ntanakuleke, omurhima gwâni gurhankabona nshonyi ciru n’oku lusiku luguma lw’akalamo kâni.
7 Omushombanyi wâni àjirîrwe kula banajirira omwîsi, n’omwanzi wâni nka muntu, orhajira bushinganyanya!
8 Bulya ngahi buligi obulangâlire bw’omuntu mugalugalu? Hano Nyamuzinda amuhenangula, hano amunyaga omûka gwâge?
9 Ka Nyamuzinda ayumva omulenge gwâge, hano obuhanya bumuyishira?
10 K’amasîma gâge muli Nyamuzinda Ogala-byoshi agakûla? K’anakaziyâkûza Nyamuzinda ngasi mango?
11 Namuyigîriza olugendo lwa Nyamuzinda, ntakabafulika kurhi ajira Ogala-byoshi.
12 Loli oku mwenene mwacibwinire byoshi, bici mwaciyahagirakwo?
Iderha ly’olya Sofari wahehêrîrwe!
13 Alagi ecigabi omwîsi abona emwa Nyamuzinda, omwânya baciri-misî babâhwa n’Ogala-byoshi,
14 Nk’agwêrhe bagala bâge banji, onamanye oku oku ngôrho bahwêra, emîmo yâge erhankayigurha mugati
15 Emisigala yâge, nayo lufù lwayigendana, n’abakana bâge barharhoze mulenge.
16 Ciru ankalunda enfaranga nka katulo, ciru ankarhondeka emyambalo ebè nka karhondo k’ibûmba,
17 anarhondeka emishangi n’omushinganyanya ayiyambale, n’enfaranga zâge zibè kashambala ka mwêru-kwêru.
18 Amâyûbaka enyumpa yâge nka ya cishôlero, nka cifùmba ca mulanzi wa mizâbîbu,
19 Omugale anagwîshîre erhi bo na buzinda, anaheneke erhi ananafîre.
20 Obôba bunacîrhunike kuli ye nka mîshi, budufu omuhûsi gunamugêndane.
21 Empûsi y’ebuzûka-zûba enamuyêhûkane ehunjuke; emukûle aha mwâge.
22 Banamuhimbaguliza n’empîmbo buzira bônjo, acihangâne mpu: ekulî eyo akola ayâkira.
23 Ago mango banakoma akagasha erhi ye rhumire, bahebe n’olushungûrho bakola bamukûla aha mwâge.