1 Omuntu erhi aburhwa n’omukazi, alama nsiku nsungunu erhi zinayunjwiîe mirhanyo. 2 Anafunyûke nka bwâso, buzinda ayûme, ayâke nka cintûza burhayimânga! 3 Kàli bene oyo y’onamôlera amasù, oyôla y’odesirage mpu wajîsa lubanja? 4 Ndigi wankarhenza ehinjà omu hibî? Ntâye! 5 Na bulya ensiku zâge ziri ngânje, bulya emyêzi yâge we yigwêrhe, bulya wamutwîrîre olubibi arhankarhaluka, 6 Omurhenzagye kw’amasù omuleke, kuhika naye nka mulimya, ayûkirize omulegerege gwâge. 7 Omurhi gujira obulangâlire, Banagutwe gunashub’ishabuka, gurhanaleke okujakwo emishabuka. 8 Ciru akabà emizî yagwo yàyumire ekuzimu, n’ecisiki cagwo cikola cirhôndire calûndwa, 9 erhi gunayûmva amîshi gunashubimera, gushabuke gunalêrhe amashami nka murhi murhò. 10 Omuntu yêhe akanafà erhi na hoshi aho; erhi mwene omuntu anarhengamwo omûka erhi lwanahûmbire. 11 Olwîshi lunagane luyûme, amîshi g’omu nyânja ganagane? 12 Ci omuntu yêhe halya alambûkire arhankacihazûka, kuhik’aha kuhwa kw’amalunga, arhâcicîzûse, arhacicîkûle omu irò lyâge. 13 Ndi wankabona ônfulika nâni omu kuzimu, ônambêzemwo kuhik’oburhè bwâwe butwîke, onantwîre amango wênene wâshub’inkengera! 14 Omuntu nk’amâfà, k’ankacishubilama? Omu nsiku zâni zoshi nakola, erhi nandwîrhe nâlingûza kuhika ba ntenze. 15 Wanahamagaza nâni nânashuza, wanashub’ilolêreza obushânja bw’amaboko gâwe. 16 Ci bunôla odwîrhe waganja amakano g’amagulu gâni, ka wankabulaga kulolêreza ebyâha byâni? 17 Amabî gâni wagafûnikîre omu cirhimbiri, wanahira obulêmbo bw’ecizibwe oku byâha byâni. 18 Ci aye! Nka kula entondo nayo buzinda ekunduka, nka kula ibuye lirhenga aha lyàmereraga. 19 Nka kula amîshi gahùla amabuye, nka kula ecihônzi cihêka amabuye, ntyo kwo ohirigisa obukengêre bw’omuntu. 20 Wamamurhingamira erhi na boshi aho, amânahûnjuka, onamuheze enshusho ogal’imulika. 21 Abâna bâge bakayishij’irenge, arhankacimanya, bakacinaguzibwa ntâco cacimumanyisa. 22 Malumwa ga mubiri gwâge gwonene ayumva, arhalakira wundi ci magala gâge gônene.