8
Obiba empûsi, ayishisârûla omulaba
1 Bûha omushekera. Nka nyunda, obuhanya bwamacihunika oku nyumpa ya Nyamuzinda w’Israheli, bulya bàvunyire eciragâne câni, banakabulira irhegeko lyâni.
2 Ciru bakâyâma, mpu: «Mâshi Nyamuzinda w’Israheli, rhukumanyire.»
3 Israheli àkabulire aminjà, lêro omushombanyi amuhâbwa.
Ishâbâbè omu Samâriya n’okukaziharâmya akanina k’amasholo
4 Bâcihîre abâmi, ci kwône buzira okundôsa. Banayîmike abarhambo, ci kwône buzira okummanyîsa. Banarhôle ensaranga zâbo n’amasholo, bajiremwo abazimu. Bwo bulyo bwinjà bw’okubaheza!
5 Mwe bantu b’e Samâriya, aka kanina kinyu k’amasholo, ntakalonza, mwanzukize obukunizi. Bene Israheli, kuhika mangaci mwayôrhe buzira kutumula?
6 N’obwo we Israheli! Nako akanina kâwe, mubumbi wakajiraga, karhali nyamuzinda. Okuli, akanina ka Samâriya kabunduka kajônjolekane.
7 Kulya kubà mwarhwezire empûsi, mukolaga mwasârûla omusirûla: engano yinyu erhajekwo muhuli. Nk’oku omugani gudesire, mpu: «Engano buzira muhuli, erhajira nshâno». Na ciru gwankajakwo empara-mîno z’emahanga zo zâgulya.