HABAKUKI, HAVAKUK
Enshokolezi
Omulêbi Habakuki aganîra na Nyamuzinda. Amulakira kabirhi, naye Nyamuzinda amushuza kabirhi. Ebyo byoshi byàbâga omu cigabi cirhanzi c’ecitabu ca Habakuki. Omu cigabi ca kabirhi, Nyamuzinda ahehêrera nyankolamaligo karhanu. Omu cigabi ca kasharhu, omulêbi ayimba omu lulanga okuhimana kwa Nyamuzinda.
Habakuki ayigîrizagya omu Yûda omu mwâka gwa 600 embere ly’okuburhwa kwa Kristu, amango ga Yehoyakimu, mwâmi w’e Yûda. Nyamuzinda arhuma Abakaldeyi okuhana olubaga lwâge; ci kwône nabo bayish’ihanwa erhi kukola amaligo kurhuma.
Habakuki abà ayêmîre oku Yûda avunyire irhegeko lya Nnâmahanga. Adôsa Nnâmahanga ecirhumire ankacîshoga Abakaldeyi babà bapagani mpu bacîhôlere ye; cirhumire ankahana omubî n’owundi mubî kulusha; cirhumire okukola amaligo kwankayîma omw’igulu kurhanashinganini?
Nyamuzinda amushuza, erhi: «Aha buzinda okuli kwayish’ihima byoshi. Omushinganyanya ayish’ilamira oku buyêmêre bwâge» (2, 4). Paolo Ntumwa ahizire ebyo binwa omu buhamîrizi bwâge bw’obuyêmêre (Rom 1, 17; Gal 3, 11).
EBIRIMWO
1. Omulêbi Habakuki ashambâla na Nyamuzinda: cigabi ca 1
2. Nyamuzinda ahehêrera abantu babî: cigabi 2, 5-20
3. Omulêbi ahûna Nyamuzinda oburhabâle: cigabi ca 3
1
Izîno ly’ecitabu
1 Aka kali kanwa Nyamuzinda afulûliraga omulêbi Habakuki.
I. Omulêbi aganîra na Nyamuzinda wâge
Omulêbi àhamagala Nyamuzinda mpu arhabâle
2 Mâshi Nyakasane, kuhika mangaci, nieki nahamagala nti oyîshe ongwâse orhanayumve. Ka kwo nayakûzagya emunda oli nti: «Mâshi wampâna, wampâna», orhanalikûze?
3 Carhuma wanyêreka obulyâlya, ogal’ilolêreza obubisha? Ntacidwîrhi nabona oburhali buhagwe n’akamene. Ekola ntambala n’enongwe byône bigandâzize.
4 Irhegeko lyàcîfîrîre n’obwinjà bwahwîre! Bulya nyankola-maligo ashimbulîre omushinganyanya, n’obucîranuzi ntâbo!
Ishuzo lya Nyamuzinda: Okurhêra kw’Abakaldeyi
5 Mulole amashanja, enshonyi zimmugwârhe. Oku mucihali, nacijira ebirhangâzo ebi murhankayêmîre erhi bakammuganirire byo.
6 Nêci! Mumanye oku nashûbûza Abakaldeyi, lula lubaga luminya lw’ebishwankegerhe? Olujà lwacinagira omu bishagala byoshi by’ecihugo mpu luje lwanyaga amashwa ga bene.
7 Omurhwe gwâbo gwo nyandumà, gwo gubuka abantu ifumufumu, emisî yagwo yo eguhà n’obukulu bwâgwo.
8 Ebiterusi byâgwo byo bikanya kulusha akakiri, byo bigesha kulusha empangaza z’ebijingo. Abarhabâzi bâbo bayisha bacinagira, barhenga erhali hôfi, kwo bahalala nka kula ikozi linashiha omunyama gwâlyo.
9 Boshi bayishîre obuhagwe; bamêsize amasù nka mpûsi y’ebushoshôkero bw’izûba, bayisha bashûkuza ebigorogo nka mushenyi gw’oku nyanja.
10 Ogwo murhwe gwo gushekera abâmi, gubona abaluzi gushekere oku kabwajiko. Ebyôgo bizibuzibu bibà busha kuli gwo. Gunacinge emibarhabarha y’idaho gubulibiduha!
11 Abo bantu banagere nka kalemêra bacibirindike handi; emisî yâbo kwo banayibona oku ye na nyamuzinda wâbo.
Okushub’icîduza kw’omulêbi
12 Kurhenga mîra we Nyakasane, we Nyamuzinda wâni, Mutagatîfu orhankafà. Nyakasane, we Kabuye nyâkiraho, wacîshozire olu lubaga wanaluzibuhya, mpu lyo lurhurhûlakwo obuhane bwâwe.
13 Ci kwône amasù gâwe gabà mimâna bwenêne g’okurhalembera okubona oku mabî, orhankanayêmêra wabà ndolêrezi y’okubona obuhanya. Cirhumirage oyêmêra walola ebi ezi ndyâlya z’abantu zidwîrhe zajira okanacihulikira? Cirhumire ohulika amango endyâlya zidwîrhe zarhindagira abazilushire bushinganyanya?
14 Cirhumire abantu obahira cihembe ciguma n’enfî n’eminyole byo birhajira murhambo?
15 Abakaldeyi bali bagwârha abantu nka kula enfî zigwârhwa oku lulobo banabahire omu rhwêshe rhwâbo. Okwôla kwabayunjuzize mwishingo.
16 Bakola bakaz’irhûla orhwêshe rhwâbo enterekêro, bulya orhwo rhwêshe rhwo rhurhuma nabo balabula oku biryo binjà binjà byankanaderhwa.
17 Ka barhakacihusa okulabaganya engôrho zâbo mpu lyo bajà bahungumula ezindi mbaga buzira lukogo?