5
Okubà masù omu kulinga okuyisha kwa Nyakasane
1 Oku nsiku n’amango, bene wîrhu, ntà bulagîrire mugwêrhe bw’okubiyandikirwa.
2 Ninyu mwêne mukumanyire bwinjà: Olusiku lwa Nyakasane kwo luyisha nka cishambo c’omu budufu.
3 Amango abantu baderhe mpu: «Murhûla na kalembe», lyo obuhanya bwâbahonere oku caligumiza, kula emikero mibishi enarhogera omukazi oli izîmi, barhakanabona oku bayâka.
4 Mwêhe, bene wîrhu, murhali omu mwizimya, mpu olwo lusiku lummurhibukirekwo nka cishambo.
5 Mweshi muli bâna b'obumoleke n’ab’omûshi. Rhurhali bâna ba budufu nîsi erhi ba mwizimya.
6 Kuziga rhurhajaga îrò ak’abandi, ci rhubè masù erhikwo, rhurhanabaga badâdà.
7 Abajà îrò, budufu balijà, n’abalaluka, budufu balaluka.
8 Ci rhwêhe, rhwe b’omûshi, rhurhabaga badâdà; rhuyôrhe rhufumbasire empenzi y’obuyêmêre n’obuzigire, rhuyambale n’ensirha y’obulangâlire bw’obucire.
9 Bulya Nyamuzinda arharhulemeraga bukunizi, ci mpu rhubone obucire Nnawîrhu Yezu Kristu orhumire.
10 Arhufîrire mpu rhukabà rhuzîne erhi rhukabà rhurhazîni, rhulame rhulungîne naye.
11 Ntyo mukaz’irhûlirizanya mwêne na nnene, munakahânana olwiganyo lwinjà, nk’okûla munajira.
Oku ababà haguma bakwânîne okuyôrha
12 Rhummuhûnyire, bene wîrhu, nti mukâkenga balya bammuluhira, abammukulîre muli Nyakasane, banakammuhanûla.
13 Mubazigire kwâgo-kwâgo omukolo gwâbo gurhumire. Mubè n’omurhûla ekarhî kinyu.
14 Mâshi, bene wîrhu rhummuhûnyire nti muhanûle abalerha akavulindi, muhè abwôba omurhima, muzibuhye engonyi, munakalembera abantu boshi.
15 Mumanye hankajira owagalulira omuntu obubî oku bubî; ci ngasi mango mucihangâne okujirirana aminjà mwêne na nnene, mugajirire n’abantu boshi.
16 Mukâyôrha mushagalusire ensiku zoshi.
17 Mukâshenga oburhahusa.
18 Oku ngasi kantu mukaz’ivuga omunkwa, bulya ntyo kwo Nnâmahanga alonza kuli mwe, muli Kristu Yezu.
19 Murhazimagya Mûka Mutagatîfu;
20 murhagayaguzagya enshôkano y’obulêbi;
21 ci mulole bwinjà ngasi kantu, n’ebiri binjà byo muyôrhanage.
22 Mucîlange oku ngasi coshi ciderhwa cibî.
Obwangà n’omusingo
23 Nyamuzinda w’omurhûla yêne ammujire batagatîfu lwoshi Lwoshi, alange emyûka n’emirhima n’emibiri yinyu buzira izâbyo kuhika olusiku Nnawîrhu Yezu Kristu ayisha.
24 Ommuhamagire arhatwa omu kanwa kâge, yêne ye wajira okwo.
25 Murhusengerere nîrhu, bene wîrhu.
26 Mulamuse bene wîrhu boshi n’ehinûnugurho hitagatîfu.
27 Mmuhûnyire bwenêne muli Nyakasane nti aga maruba gasomerwe bene wîrhu boshi.
28 Enshôkano ya Nnawîrhu Yezu Kristu ebè ninyu!