2
Okuburhwa kwa Mûsa
1 Muntu muguma w’omu bûko bwa Levi anacijà aho, ayanka omunyere w’omu bûko bwa Levi.
2 Nyamukazi anacirhôla izîmi, aburha mugala. Erhi abona oku ali mwinjà, ajira myêzi isharhu erhi kufulika amufulika.
3 Lêro erhi acibula oku ankacishub’ikâmufulika, arhôla ecirhimbiri c’enfinjo, acîshîga ebizibwe n’obulembo, acihiramwo olya mwâna, acidekereza omu masheke eburhambi bw’olwîshi.
4 Mwâli wâbo nyamwâna abêra kuli hitya mpu alole kurhi abà.
5 Lêro mwâli wa Faraoni mwâmi w’e Mîsiri anaciyandagalira ebwa lwîshi mpu aj’icîshuka, oku abajà-nyere bâge barhambika oku lwîshi. Anacilangîra ecirhimbiri omu masheke, àrhuma omujà-nyere wâge mpu ajicilêrha.
6 Anacicifunula, abona omwâna: ali mwâna-rhabana odwîrhe alaka. Obwonjo bwamugwârha, anaciderha, erhi: «Mwâna wa Bayahudi oyu».
7 Okubundi mwâliwâbo nyamwâna anacibwîra mwâli wa Faraoni mwâmi w’e Mîsiri, erhi: «Ka walonza njihamagala omulezi omu bakazi b’Abayahudi akazikuyonkekeza oyu mwâna?»
8 Mwâli wa Faraoni mwâmi w’e Mîsiri amubwîra, erhi: «Gendaga omulonze.» Olya munyere agendihamagala nnina wa nyamwâna.
9 Mwâli wa Faraoni mwâmi w’e Mîsiri amubwîra, erhi: «Mpêkera oyu mwâna, ojikamuyonsa, niene nayishikuhêmba.» Olya mukazi anacirhôla omwâna, akamuyonsa.
10 Erhi omwâna akula, amuhêkera mwâli wa Faraoni mwâmi w’e Mîsiri. Naye amuyankirira nka mugala; amuyîrika izîno lya «Mûsa», erhi: «Namurhôlaga omu mîshi.»
Mûsa ayàkira e Madiyani
11 Muli ezo nsiku, Mûsa erhi akolaga mukulu, àkanya mpu agendilamusa bene wâbo, abona kurhi barhindibusire n’emikolo y’obujà. Abona oku Omunya-Mîsiri ashûrha mwene wâbo w’Omuyahudi.
12 Alola eyi n’eyi, abona ntâye omubwîne, àniga olya Munya-Mîsiri anamufulika omu mushenyi.
13 Erhi buca, kandi ashubigenda: ashimâna Bayahudi babirhi badwîrhe balwa. Anacibwîra owalihalalîre owâbo, erhi: «Cici oshûrhire owinyu?»
14 Olya mulume amubwîra, erhi: «Ndi wakujiraga murhambo na mucîranuzi wîrhu? K’omanyire mpu nâni wanyîrha nka kulya wayîrhaga olya Munya-Mîsiri?» Mûsa àyôboha, erhi: «Kuziga kulya kwamanyîkîne!»
15 Faraoni mwâmi w’e Mîsiri ayumva baderha ogwo mwanzi, ahiga okuyîrha Mûsa. Ci Mûsa abunga, ayâka Faraoni mwâmi w’e Mîsiri; acijîra omu cihugo c’e Madiyani, aburhamala hôfi n’iriba.
16 Omudâhwa w’e Madiyani ali agwêrhe banyere bâge nda. Banaciyisha balidôma n’okuyunjuza ebiranga mpu banywese amasò g’ebintu by’îshe.
17 Abangere banaciyisha, babalibirhakwo. Lêro Mûsa anaciyimuka, abarhabâla ananywêsa amasò gâbo.
18 Erhi bagaluka emw’îshe Reweli, abadôsa, erhi: «Lêro càrhumire mubiduha ntya ene?»
19 Bamushuza, mpu: «Munya-Mîsiri muguma warhushugunwire omu maboko g’abangere, ciru ye wanarhudomire ananywêsa amasò!»
20 Anacibwîra abâli, erhi: «Ngahi ali? Carhumaga musiga oyo muntu? Hamagali ye, ayîshe alyè!»
21 Mûsa ayêmêra okubêra aha mw’oyo mulume, naye anacimuhà omwâli Sipora.
22 Nyamuhya anaciburha omwâna-rhabana. Mûsa amuyîrika izîno lya Gershomi, erhi: «Bulya ndi mubunga omu cihugo c’ihanga.»
Nyamuzinda ayumva izù lya Bene-Israheli
23 Erhi nsiku nyinji zigera, omwâmi w’e Mîsiri afà. Mwo bulya bujà bwâbo, bene-Israheli balakira Nyamuzinda, babanda endûlù, na kurhenga omu bujà bwâbo, endûlù yâbo yasôkera emwa Nyamuzinda.
24 Nyamuzinda ayumva endûlù yâbo; Nyamuzinda akengêra endagâno yâge bo n’Abrahamu, Izaki na Yakôbo.
25 Nyamuzinda abona bene-Israheli oku balagîrîre; Nyamuzinda abamanyirira.