AMOSI
Enshokolezi
Amosi ali mungere embere arhondêre omukolo gw’obulêbi. Abàga omu ci- shagala c’e Tekowa, hofi n’olubibi Iw’irungu ly’e Yuda (1, 1), ci yehe arhàli mwâna wa mulêbi. Nyakasane àcimwîshoga erhi ali oku irango, ayâbwîre, àmurhuma mpu ajiyigîriza omu bwâmi bw’Israheli. Ci kwônene hisangi hitya hyône arhondîre omukolo, àlibirhwakwo mpu arhenge omu Israheli. Amosi ayigîrizagya amango ga Yerobwami wa kabirhi. Ago mango obwâmi bwa Israheli bwalijire enyanya bwenêne. Ci kwône obwo bugale bwàli bw’en’igulu. Abakulu b’ecihugo bakagilama omu bugale. Obwo bugale bwarhengaga omu kulyâlyanya n’omu kulibuza abakenyi bwenêne. Oburherekêre bwâbo burhàli bw’okuli. Obwo bwôrhere bwâbo bwagayisa Nyamuzinda bwenêne. Akalihira olugendo lubî lw’obugamba bwa Israheli: okushubuka, okulyanyanya, okulangâlira oburherekêre bw’obunywesi. Nyamubâho, Mwâmi w’Igulu, ahana amashanja goshi; ayishihana Israheli bwenene kulya kubà Nyamuzinda acîshogagaye, kumurhegesire abè mushinganyanya bwenêne omu bwôrhere bwâge. «Olusiku lwa Nyamubâho» lwayishibà lusiku lwa mwizimya mudârhi ci arhali lwa bulangashane. Olwihôlo lwayishibà ludârhi. Amosi amanyîsa oku obulangâlire ho buciri, oku iburha lya Yakôbo n’oku basigire omu mulala gwa Yozefu. Israheli ayishigaluka omu bwôrhere bwâge burhanzi n’okuhâbwa akalamo kinjà kashushîne n’ak’omu ishwa ly’amasîma.
EBIRIMWO
1. Okutwîrwa olubanja kwa Israheli n’agandi mashanja: cigabi 1, 1—2, 16
2. Okurhondwa kwa Israheli: cigabi 3, 1—6, 14
3. Okubonekerwa karhanu: cigabi 7, 1—8, 10
4. Israheli ayishishubizibwa omu bwôrhere bwâge burhanzi: cigabi 9, 11-15
1
Izîno ly’ecitabu
1 Ebinwa bya Amosi. muguma muli balungere b’e Tekowa, ebi àbwîne biyêrekîre Israheli oku ngoma ya Oziyasi w’e Yûda, n’oku ngoma ya Yerobwâmi, mugala wa Yowasi, mwâmi w’Israheli, myâka ibirhi embere amango igulu lyageragamwo omusisi.
2 Anaciderha, erhi: «Nyamuzinda amakungulira e Siyoni, amâyumvîsa izîno lyâge kurhenga e Yeruzalemu, obulambo bw’abangere bukola omu mishîbo, obusongerwe bwa Karmeli bwamâyûma».
I. Olubanja lw’amashanja gayegîre Israheli n’olwa Israheli yêne
Damasi
3 Ntya kwo Nyakasane adesire: «Oku mabî asharhu ga Damasi n’oku anni, nahizire burhashubira nyuma! Kulya kubà bàtûntumire Galadi n’ebyûma bajà bakulula.
4 “Nkola nâdûlika muliro enyumpa ya Hazaheli, n’enyumpa za Ben-Hadadi zisingônoke”.
5 “Nâherêrekeza oli oku ntebe aha Bikeat-Avena n’oyîmire aha Bet-Edeni, n’olubaga lwa Aramu luhêkwe omu bujà e Kiri, ntyo kwo Nyakasane adesire”».
Gaza na Filistiya
6 Ntya kwo Nyakasane adesire: «Oku mabî asharhu ga Gaza n’oku anni, nahizire burhashubira nyuma. Kuli kubà bàkundwire embaga zoshi, mpu bazihêke omu bujà e Edomu.
7 “Nkola nadûlika muliro ebyôgo bya Gaza, bisingônoke n’enyumpa zâge”.
8 “Nâherêrekeza oli oku ntebe aha Ashidodi, n’oyîmire aha Askeloni, nâyêrekeza okuboko kwâni emunda Ekroni ali, na ngasi hicisigire hya Bafilistini hiherêrekere hyoshi, ntyo kwo Nyakasane adesire”».
Tiri na Fenisiya
9 Ntya kwo Nyakasane adesire: «Oku mabî asharhu ga Tiri n’oku anni, nahizire burhashubira nyuma! Kulya kubà bàhânyire embaga z’e Edomu omu bajà, buzira kukengêra ecihango ca bene wâbo.
10 “Nkola nalîkira omuliro oku byôgo bya Tiri, gumuyôkere enyumpa.”»
Edomu
11 Ntya kwo Nyakasane adesire: «Oku mabî asharhu ga Edomu n’oku anni, nahizire burhashubira nyuma! Kulya kubà àhivulwîre mwene wâbo n’engôrho, buzira, lukogo, abîka n’omujina gurhahwa, n’obumvu ensiku zoshi.
12 Nkola nâlîkira omuliro kuli Temani, gusingônole enyumpa za Bosra.»
Amoni
13 Ntya kwo Nyakasane adesire: «Oku mabî asharhu ga bene Amoni n’oku anni, nahizire burhashubira nyuma. Kulya kubà bàbwâgwire enda z’abakazi bali mazîmi b’e Galadi, mpu lyo bagalihya ecihugo câbo.
14 Nkola nâyâkiza omuliro oku byôgo bya Raba, gusingônole enyumpa zâge, ebè ndûlù y’ebîrha, omu lusiku lw’okulwa, omu malibuko, olusiku lw’ecihûsi.
15 Na mwâmi wâbo ahêkwe bujà, ye haguma n’abarhambo bâge boshi», ntyo kwo Nyakasane adesire.