2
Jain senenres Ibo Diossen yoia
1 Netékainxonra en ninkatai itan jato koirannai sontáro jawen itinko iká keskára ea iti iki,
jaweki Ibon ea yoiai ixonra en ninkáti iki, jakonma shinanni joikin,
en yoiaki jawe
ea yoiai ixonra en ninkáti iki.
2 Ibonra ea yoia iki:
“Ja en mia oinmai mapó tablanin wishawe,
ishton yoyo ati itiakin.
3 Nato min oinna jawéki
jatian senenti nokotamapari ikaxbira;
iamama senenti jake,
Ja min oinna basiainbi, miabiribi manáreswe:
ja ititianbiribira nokóti jake.
4 Jakonma jonibora rabitaibo iki ixon wishawe,
ikaxbi atikeskabiakin senen akaibora, Dioski yoiti ikax jati iki”, akin.
Jakonmabo jakonmain nokoti
5 Rabí jonibora, joni koshi itin keenbo iki;
ja ikaskin benai tantiyamaira jatíbitian bebon keenboreskanai,
ja koshi iká jakonmamis ikenbi.
Jaton kexa chopeara jain mawá minti kini keska iki,
mawá keskáribi tantiti onanmabora ikanai,
jaskara ixonra jaton maibo, jato bichinbotankanai.
6 Ikaxbi jato mai bichinkanabora
jatikaxbi jan jato bichinaboki
shirokanti iki, jatokira bewakanti iki:
“¡Jawe ireskiai panon mato, matonama
ikenbi wetsabaon jakon kopí
jawékibo biax mato icha jawékia banétabo!
¿Jawetian kamanki mato ribina kopí bixon,
icha jakon kopí jawéki tsamani mato jenetai?”
7 Maton shinannamainbira, ja maton ribinabo matoki nokoti iki,
jan mato masá tenemaibo matoki pikóxonra,
jawebioma
mato banékanti iki.
8 Maibotiibi ikábora bianananax,
mato akí matoki bechiakekanti iki,
jatianra maton jato aká keskáribiakin,
maton jawéki keyokin mato bichinkanti iki.
Jatíbi eséki ramíkin maton aká kopíra,
mato kopíamati iki, ja mainxon
jemaboki itan jainoa joniboki
bechiakexon maton meskó
jakonma aká kopíribira mato kopíamakanti iki.
9 ¡Jawe ireskiai panon mato,
yometsokin bia jawékininra
maton xobo, maton bochoake,
jatíbi jakonmabaon mato akaitian,
jan mato xabaatira maton ake!
10 Jaskáxonra maton xobon iká
rarebobo maton rabintiake,
ja maibotiibi ikábo ras axonra,
matonbi jan mato keyoti ake.
11 Ja jema chiké makanbobi itan ja xobo
jiwi kanobobira matoki bechiaketax, mato ramiai saí ikanti iki.
12 ¡Jawe ireskiai panon mato,
jemabo akinra, esekan yoiaibo ayamaakin,
itan atikeskabiakin jaskara ati maton ayamaa iki!
13 Jatíbi atipana Ibon imaara
mato teeta,
jainoax ja mato teeti paxkinairibi yanka iti iki,
jatíbi maton tee akábora chiikan keyokin menoti iki.
14 Jenen aniparo bochoa
keskáakinra, Ibo jaskáaxon onanti
shinan koshi nato main jatíbiain bochoti iki.
15 ¡Jawe ireskiai panon mato,
mato patax ikábora paeya
meskoxon jan beyósti rao maton
jato xeamai, namanbires
shinanmeexon keyokin
jaton chopa jopeta oinnoxon!
16 Rabítitianbira, mato rabinresti iki,
wetsabo maton aká keskáribiakinra
Ibon mato ati iki,
mato panaa chopa jopemaxon maton jakina
rebichi maton xateama jato oinmai
keskára mato ati iki,
jatianra rabítitianbi mato namanbires shinanmeeti iki.
17 Líbano manan jaskáati
ikenmabi maton jakonma akára
matoki bechiaketi iki, jainoa
yoinabo reteaxa mato ratéti iki.
Ja mainmea jemaboki itan jaínoa
joniboki bechiakexon esekan yoiai ayamaketian
itan jakonmabires maton
jato aká kopíra, matoki jaskara
jawékibo nokóti jaki.
18 ¿Ja rabiti jawéki jatonbi aká
moa akin senenhakanatonki noa akinti iki?
¿Jawekeskaxonki jan jansotires ixon,
ja rabiti jatonbi akátonin noa akinti iki?
Ja rabiti jatonbi akára yoyo iti atipanyamake;
¿Jawekeskataxki jan jaskara akaibo ikonhax jatoki koshiti iki?
19 ¡Jawe ireskiaipanon mato,
ja rabiti aká jawéki jiwira maton jishtenwe akin akai,
ja yoyo iosma makanra maton niwé akin akai!
¿Jabaonki joi bexon noa yoiti atipana? ¡Jawe
akamakan, jara oro itan platanin rapoa ikaxbi jiriomabobi iki!
20 Ikaxbi Ibora jawen jakon ani xobonko iki: ¡Jatíbi nato mainmea
jonibo já bebonmeax netékanwe!