19
Matananu di parpara agas kabin Babilon ákte sák!
1 Má namur iak longrai kaungán táit a ngoro lala matananu taladeng imi naul bát, má dik lu binbin ngo,
“Aleluiá! Parpara agas uri narsán ái Káláu!
Ái Káláu kángit Tám Araliu!
Ái Káláu a rakrakai!
Ái Káláu a tuan alal sang!
2 Kán nagogon a támin,
má kán rangrangas a oboi a nokwan!
Ái Káláu ákte nagogon i wák án sál er tasim,
koner a abawi naul bim mai kán araturán sáksák!
Ái Káláu ákte oboi rangrangas ur on
suri kosoi dárán kán tan toptop a up bingi.”
3 Má dik bin mul má dik parai ngo,
“Aleluiá! Parpara agas uri narsán ái Káláu!
Sauh tili bimán rum er a bam, ák lu taptapam má ekes pala!”
4 Má namur, aru i sángul mai ahat á kálámul pakta má ahat i liuán táit mul di no di pur dirtapul i mátán táil ái Káláu er a sukis i nián kabisit, má dik lotu uri narsán má dik parai ngo, “A támin! Parpara agas uri narsán ái Káláu!”
5 Má tilatung i nián kabisit kaungán kes a bin ngoromin,
“Gama parpara agas uri narsán kángit Káláu,
á gam erei kán tan toptop,
wa gam no er gam rumrum on,
gam bos pakpakta
má gam tan gengen mul!”
Namnam án akila káián Sipsip
6 Má namur iak longrai kaungán táit a ngoro tilik lala matananu, má a ngoro irngán lala dan ngo ngorer i kaungán pár a rakrakai sang. Iak longrai di parai ngoromin,
“Aleluiá! Parpara agas uri narsán ái Káláu!
Ái Konom, kángit Káláu, Tám Rakrakai Sorsorliu,
ái á kabisit sang!
7 Gita parmat má giták laes
má gita parpara agas uri narsán!
A kabin ákte hut má i pákánbung suri na kila ái Sipsip,
má kalik átlái er na kila pasi, ákte eran suri.
8 Ái Káláu ákte sormángát tari tahlik er
suri na sulu mai lain lusán a tuan bal má a tuan pilpilpil.”
(Lain lusán erei a tur arwat mai tan táit a nokwan tan tám ruruna dikte longoi.)
9 Má namur angelo a parai singing ngo, “Una le i worwor min. Di tuan kuluk pala ái rung er ái Káláu a long pas di suri da han suri namnam án akila káián Sipsip.” Má angelo a parai mul ngo, “Minái á midán muswan ái Káláu.”
10 Iau longrai ngorer má iak pur dirtapul i narsán keken angelo er suri ina lotu uri narsán, mái sár angelo a parai singing ngo,
“Koion á ngorer! Wa iau tárim sár. Iau ngorer i iáu má rang tuam, git no á toptop sár si Káláu. Á iáu má iau, gitar aru kálámul sár, gitar lu taram i pinpidan si Káláu má gitar lu para talsai kán lain arbin sur Iesu. Ái Káláu sár, ái ái koner una lotu uri narsán! Kabin midán tan tám worwor tus sur Iesu a káplabin sang singin Tanián ái Káláu, má ái ái koner a káplabin mul á tan támin táit má tan aratintin a inngasi ái Iesu i pákánbung a liu main i naul bim.”
Ái Mesaia a arup mai rokoi
11 Má namur iau mákái naul bát a pasbat má kesi hos a bal iatung, má kesi kálámul a sukis on, ái koner di utngi mai Muswan má mai Támin, má ái ái koner a lu nagogon mai nokwan má a lu arup suri táit a kuluk.
12 Má mátán ái koner a ngoro kurmen kámnah, má iatung i lul tikai pákpákur káián kabisit. Má kesi ngisán dikte sir páptai on, má ngis erei kápte kes sang a mánán on, ái masik sár a mánán.
13 Má kesá ngisán sang mul di utngi ngo Pinpidan si Káláu, má lusán a oboi ákte talbap no mai dár.
14 Má tan tám arup tilami naul bát, di báiruruh namurwai kálámul er. Má di mul di sukis i tan hos a bal, má dikte oboi lusán i di a bal má a tuan alal.
15 Mái koner a táilna di, kesi tilik is a tuan inan a so tili ngudun, má is erei na top on suri na han suka bámiai tan mát on á naul matmatngan pokon. Na lu kátlán i di mai kán rakrakai a tuan sorliu sang, má na lu suka peksai tan wán wain pasi suir er a tur arwat mai kán togor ái Káláu Tám Rakrakai Sorsorliu.
16 Má iatung i lusán má iatung i páwán sang, ngisán a kis ngoromin ngo Kabisit káián tan Kabisit má Konom Sorsorliu.
17 Má namur iau mákái kesi angelo a sámtur iamuni mátán nas, má angelo erei a bin mai lala kaungán ur singin tan man no di roh iamuni armongoh, má ák parai si di ngoromin, “Gam lákám be suri gama namnam i tilik longsit si Káláu!
18 Gam lákám suri gama ani pinsán tan buli minái, pinsán rung di kálámul pakta tungu ngorer i tan kabisit má bos pakpakta káián tan tám arup má tan tám arup sang mul. Má gama ani pinsán tan hos mái rung di lu kis on, má pinsán tan matananu no ngorer i rung di kis án toptop mái rung di láuláuwán, tan pakpakta má tan gengen mul!”
19 Má namur iau mákái rokoi má tan kabisit tili naul bim dikte hut talum tiklik mai kándi tan tám arup suri da arup mam koner a kis i hos má mai kán tan tám arup.
20 Má dik turpasi arup ngorer. Má namur ái koner si Mesaia er a kis i hos, ái a tolai rokoi má a tolai mul i angagur án tám worwor tus, ái koner a lu longoi tan akiláng tungu, má ngorer ákte agur pasi tan kálámul er dik lu lotu uri narsán tantanián rokoi mái rung dikte oboi kán akiláng iatung i kápán páplun i di. Ái Mesaia a tola diar ngorer má kápate up bing diar. A buswa diar uri dan taliu án kámnah, má kámnah erei a lala málmálas má a tuan sangin.
21 Má kándiar tan tám arup ái rugar er, a sá bing di á tilik is a so tili ngudun ái koner a kis i hos. Io, dik mat ngorer, má namur tan man di han má dik ani tan pinsán buli er má dik mas tigán te páplun buli iatung.