22
Dawda don ka albarka daŋ Irkoy se
(Zaburey 18)
1 Waatoo kaŋ Abadantaa na Dawda kaa nga iberey kul kabey ra kʼa kaa Sawul kaboo ra, nga ra Dawda na baytoo woo kalimawey don ka Abadantaa saabu.
2 A nee: «Abadantaa ti ay Tondoo,
nda ay nongu gaabantaa, nda ay feerikaa.
3 Irkoy ti ay Tondoo, nga ga ay ga wakkal,
nga ti ay koraa, nga ti hilloo kaŋ gʼay hallasi,
nga ti ay wakkalkaa, nongoo kaŋ ra ay ga tugu.
Ay faabakaa, nʼgʼay kaa boro futantey kone.
4 Ay ga kaati ka nee: ‹Albarka ma bara Abadantaa se!›
Ay hallasi agay iberey ra.
5 Bondawey kaŋ ga wiiya nʼay daabu,
ay hunbur sanda isa kaŋ futu ka boosu.
6 Alaahara karfey nʼay kuubi kʼay bere,
buuyan filijey goo ay jine.
7 Ay binemarayyanoo ra, ay na Abadantaa cee,
ay kaati kʼay Koyoo cee.
A na haŋajer ya ne nga hugoo ra,
ay faaba ceeci kaatiroo huru haŋawey ra.
8 Laboo guzuguzu, a jijiri,
beenaa asaasey jijiri,
i guzuguzandi, zama Abadantaa nka futu.
9 Dullu no ma hun niiney ra,
nuune kaŋ ga wiiya ga hun miɲoo ra,
denji cirayyaŋ ga hun a ra.
10 A na beenaa šiirandi ka zunbu,
nda duula koma kaŋ goo cewey cire.
11 A mana kaaru kala almalayka boŋ kaŋ se i ga nee šerib ka deeši,
boro ga dii a hewoo bande.
12 A na kubaa tee nga tendaa,
a nʼa tee hari beeri nda duula komanteyaŋ.
13 Gaay ga dii a jine,
denji cirayyaŋ ga dii gaayoo ra.
14 Abadantaa kaatoo jiŋjiŋyanoo hun beenaa ra,
Koy Jerantaa na nga jindoo jer.
15 A na biraw-izeyaŋ warra kʼi say,
a na meley ka ngi lakkaley tunandi.
16 Abadantaa burbusuyanoo ga,
nga futuyanoo hewoo ga, teekoo ciroo hayey bangandi,
aduɲɲa asaasey fatawandi.
17 Irkoy goo beene,
a ga nga kaboo šerre kʼay zaa,
kʼay kaa hari beerey ra.
18 A gʼay kaa agay iberi gaabantaa ra,
kʼay kaa borey ra kaŋ ga konna agay, kaŋyaŋ gaabey bisa ay wanoo.
19 Ay bonaa zaaroo hane iberey kay ay jine ngi mʼay tangam,
amma Abadantaa kay ya ne.
20 A nʼay kaa ifutu ra kʼay feeri,
a nʼay hallasi, zama ay ga kan a se.
21 Abadantaa nʼay šerretaraa guna ka goy ya ne,
a nʼay bana ka sawa nda ay kabe goyey henanyanoo,
22 zama ay na Abadantaa fondawey gana,
ya nʼay Koyoo tooɲe.
23 Nga hantumey kaŋ kayandi kul goo ay jine,
ay sʼay boŋ moorandi nga hantumey ga.
24 Ay laadir a jine,
ay nʼay boŋ dii ifutu kul ga.
25 Woo se Abadantaa nʼay bana ka sawa nda ay šerretaraa,
ka sawa nda ay henanyanoo a jine.
26 Boro kaŋ ga laadir, nʼga goy a se nda laadirtaray,
boro kaŋ binoo ti affoo, nʼga goy a se nda bine foo.
27 Boro kaŋ ga henan, nʼga goy a se nda henanyan,
boro kaŋ ga šiiri, nʼga goy a se nda carmay.
28 Nʼga boro yalaafantey hallasi,
ni moɲey ga borey kaŋ ga ngi boŋ jer yeeti ganda.
29 Abadantaa, ni ti ay fitillaa,
Abadantaa ga gaay daŋ ay kubaa ra.
30 Ni bande ay ga sar ka gum wongu-ize jama ga,
ay Koyoo bande ay ga hin ka cete sar.
31 Irkoy fondaa tee ka timme,
Abadantaa šennoo si tun,
koray no borey kul se kaŋ ga ngi boŋ talfi a ga.
32 Adiši may ti Irkoy nda manʼti Abadantaa?
May ti tondi kaŋ ga boro ga hin ka talfi nda manʼti ir Koyoo?
33 Irkoy ti ay nongu gaabantaa,
nga no mʼay fondaa hanse boryo.
34 A gʼay cewey cahãndi sanda jeeri,
a gʼay kayandi hodaddawey boŋ.
35 A gʼay kabey waanandi wongu,
ay kabey ga alhan biraw taabu.
36 Nʼgʼay noo ni koraa kʼay hallasi,
ni zaaboo gʼay tonton.
37 Nʼgʼay cee diraa fondaa hayandi,
ay cewey si cabu.
38 Ay ga agay iberey gaarandi, ay gʼi halaci.
Ay si willi kate nda ay manʼi tuusu kʼi benandi.
39 Ay gʼi wii kʼi halaci,
i si yee ka tun,
i ga kaŋ ay cewey cire.
40 Nʼna albarka tee ya ne gamahaw wongoo se,
nʼga agay nkuwawey taabu ay cire.
41 Nʼga agay iberey zurandi ay jine,
ay ga borey kaŋ ga konna agay halaci.
42 I ga guna nongoo kul here, amma hallasikaw sii no.
I ga Abadantaa cee, amma a si tuuru i se.
43 Ay gʼi tutubu kʼi tee hamni sanda bolongu.
Ay gʼi dur kʼi taama-taama sanda lolaa laboo.
44 Nʼgʼay kaa ay jamaa gurgay ra,
nʼgʼay daŋ gandawey jine,
jama kaŋ ay sʼa bay ga boŋdum ya ne.
45 Yawyaŋ gʼay zanzaŋ,
za ay šelaŋ, nga no i ga hayaa tee.
46 Yawey alfaydaa ben,
i ga fatta ngi tugudogey ra nda jijiriyan.
47 Abadantaa ga huna, albarka ma bara ay Tondoo se!
Irkoy kaŋ ti ay hallasiroo Tondoo ma jerandi.
48 Irkoy ga faasa ya ne,
ka gandayaŋ daŋ ay hinoo cire.
49 A gʼay hallasi kʼay kaa agay iberey ra.
Nʼgʼay fur agay nkuwawey boŋ,
nʼgʼay kaa boro futu ra.
50 Woo maaganda se, Abadantaa, ay ga albarka daŋ ma ne gandawey ra,
ka don ni maaɲoo se.
51 Abadantaa ga haya beeriyaŋ tee nga kokoyoo hallasiroo se.
A ga goy nda borohennataray nga suubantaa kaŋ yonandi se,
maanaa Dawda nda nga hayroo se hala abada.»